Chak ane, Temwen Jewova yo pwodui plizyè videyo pou yo pase nan kongrè yo fè yo. Pifò videyo sa yo fèt ann anglè. Nan ka sa a, ki jan plizyè milye moun ki vin asiste kongrè yo e ki pa pale anglè fè rive konprann videyo sa yo? Pou anpil nan lang sa yo, yo tradui videyo yo yon fason pou moun k ap koute yo pa tande vwa anglè a, men vwa moun k ap pale lang yo konprann nan. Ki efè sa genyen sou moun ki asiste kongrè yo?

Men kòmantè kèk moun ki pa Temwen e ki te asiste kongrè nan Meksik ak nan Amerik santral te fè konsènan videyo sa yo:

• “Nonsèlman mwen te konprann fim nan, men se kòmsi mwen te nan fim nan tou. Li te touche kè m.” — Yon moun ki te asiste kongrè nan lang popolouka, nan Verakwouz, Meksik.

• “Mwen te santi se kòmsi mwen nan peyi m, m ap pale ak yon bon zanmi. Sa te pi bon pase sinema paske mwen te konprann tout bagay.” — Yon moun ki te asiste kongrè nan lang nahuatl, nan Nwevo Leyonn, Meksik.

• “Lè m te wè videyo yo nan lang mwen, mwen te santi se kòmsi aktè yo se avè m yo t ap pale.” — Yon moun ki te asiste kongrè nan lang chol, nan Tabasko, Meksik.

• “Òganizasyon sa a gen sousi pou l ede moun yo aprann nan lang yo. Pa gen lòt òganizasyon tankou l!” — Yon moun ki te asiste kongrè nan lang kakchike, nan Solola, Gwatemala.

Kòm se pa teknisyen ak aktè pwofesyonèl Temwen Jewova yo pran pou fè travay sa a, e kòm byen souvan, se nan zòn izole ki pa devlope yo fè anrejistreman yo, ki jan yo fè pwodui videyo bon kalite konsa?

Sa pa gen lontan, filyal Amerik santral Temwen Jewova yo te òganize tradiksyon videyo kongrè ann espayòl ak nan 38 lang lokal moun yo pale. Gen anviwon 2 500 moun ki te travay kòm volontè nan pwojè sa a. Teknisyen yo ak ekip tradiksyon lokal yo te anrejistre pati odyo pa yo a nan filyal la, nan biwo tradiksyon ki pa nan filyal la oswa lòt kote ankò kote yo te sèvi ak stidyo anrejistreman yo te mete sou pye pou okazyon an. Antou, ekip yo te anrejistre nan plis pase 20 zòn nan Beliz, Gwatemala, Ondiras, Meksik ak Panama.

Sa te mande anpil travay ak imajinasyon pou yo rive mete stidyo anrejistreman sa yo sou pye. Pou yo te fè son deyò pa rive anndan stidyo yo, yo te sèvi ak materyèl yo te gen sou plas tankou lenn ak matla.

Anpil nan moun ki te bay vwa yo kòm aktè pa gen gwo mwayen ekonomik e yo te fè gwo sakrifis pou yo vwayaje al nan stidyo anrejistreman ki pi pre yo a. Kèk nan yo te vwayaje pandan 14 èdtan! Gen yon papa ak pitit gason l ki te mache anviwon uit èdtan pou yo rive nan stidyo anrejistreman an.

Toutpandan Naomi t ap grandi, li te konn ede fanmi l mete stidyo anrejistreman sa yo sou pye. Men sa l di: “Nou te konn chofe ap tann semèn y ap anrejistre a. Papa m te konn travay san pran souf pou l kowòdone bagay yo. Pafwa, manman m konn kuit manje pou 30 volontè.” Kounye a, Naomi ap travay kòm volontè nan biwo tradiksyon ki Meksik la. Li di: “Se pa ti kontan mwen kontan dèske m bay tout tan m pou m ede moun yo tande mesaj Bib la nan lang manman yo. Se travay ki bay plis satisfaksyon mwen ta ka imajine.”

Temwen Jewova yo fè kongrè chak ane toupatou nan monn nan e tout moun ka vini. Gade paj ki make KONGRÈ a pou w jwenn plis enfòmasyon.