Nan jou ki te 20 me 2015 lan, chèf administrasyon vil Wostòv sou Don an, ki se pi gwo vil nan sid peyi Larisi, te voye yon lèt bay Temwen Jewova yo pou l eksprime rekonesans li e pou l felisite yo “lefètke yo te patisipe aktivman nan anbeli vil la nan sezon prentan an”.

Pandan moun nan zòn nan t ap fè efò pou anbeli vil Wostòv sou Don an, Temwen Jewova nan kat kongregasyon te ranmase fatra ak debri ki te vin gonfle nan wout vil la ak arebò rivyè yo. Nan sèlman kèk èdtan, yo te ranmase anviwon 300 sache fatra e kamyon te vin pran yo annapre.

Poukisa Temwen yo te chofe konsa pou ede kominote a? Men sa Raisa, ki gen 67 an, fè konnen: “Mwen pa ka ret bwa kwaze. M vle pou vil mwen an rete pwòp yon fason pou tout moun ka viv nan bon kondisyon. Menmsi se yon tikras moun sèlman ki konn sa n te fè a, m pran plezi kanmenm nan fè travay la. Dayè, Jewova Dye wè sa n fè a.” Men sa Aleksander ajoute: “Nou pa sèlman preche lòt moun, men, nou rann yo kèk sèvis pou ede yo tou. Lefètke m ka fè yon bagay pou ede vwazen m yo, sa fè m santi m kontan e m ranpli ak satisfaksyon.”

Gen kèk moun k ap gade ki te apresye bèl etadespri Temwen Jewova yo te demontre a. Gen yon moun ki abite nan zòn nan ki te sezi aprann Temwen Jewova yo pa touche pou travay y ap fè a. Li te deside al ede yo nan travay netwayaj la, e men sa l te di annapre: “M pa t ap janm imajine l posib pou yon moun pran plezi nan fè netwayaj e pou l satisfè nan pwen sa a!” Men sa l te ajoute: “Gen nan nou ki pap menm viv isit la, aktout sa, nou vin netwaye pou nou!”

Gen yon fonksyonè nan vil la ki te remake gen yon ti gwoup Temwen ki ranmase yon gwo kantite sache fatra. Li te fè foto yo pandan yo kanpe bò sache fatra yo yon fason pou l “montre lòt moun fason travay la dwe fèt”.