Nan ane 2014, Hugo ki te gen dizan te resevwa yon sètifika ki rele Diana Award yon òganizasyon nan peyi Angletè te ba li paske l te ede kèk elèv ki te jwenn brimad nan lekòl li.

Hugo di: “Mwen pran sètifika sa a grasa desen anime Venk yon moun k ap ba w brimad san batay! la. Mwen te vin ka ede moun fè fas ak brimad sèlman grasa sa m te aprann sou sit jw.org la.

Hugo te montre pwofesè l yo videyo Venk yon moun k ap ba w brimad san batay! la anvan. Yo te renmen videyo a, se sa k fè yo te fè aranjman pou tout elèv yo gen posiblite pou y ale sou sit jw.org la. Kounye a, pifò kamarad Hugo yo, ki nan laj uitan ak dizan, itilize sit jw.org la regilyèman. Elèv yo di sit sa a pa sèlman ede yo jere brimad yo, men tou, li ede yo pou jwenn repons pou kèk kesyon tankou Ki sa m ka fè pou m gen bon zanmi?

Nan yon lòt lekòl ankò ki nan peyi Angletè, Elijah ki gen sèlman uitan te konn pran brimad. Li menm ak fanmi l te byen analize videyo Venk yon moun k ap ba w brimad san batay! la. E yo te fè repetisyon ansanm sou sa Elijah ka di ak sa l ka fè lè l jwenn brimad. Sa te bay Elijah konfyans nan tèt li pou l byen jere pwoblèm sa a. Annapre, pandan semèn kote yo t ap ankouraje jèn yo pou yo pa bay brimad la, sansè Elijah a te montre tout lekòl la videyo a.

Natirèlman, se pa sèlman nan peyi Angletè pwoblèm brimad la egziste. Se yon bagay ki fèt nan lemonnnantye. Videyo sa a ki sou fòm desen anime a ede jèn tout kote.

Ivie gen dizan, l ap viv Ozetazini. Li te pè yon kamarad li ki te konn ba l brimad. Apre l te fin gade videyo Venk yon moun k ap ba w brimad san batay! la, li te vin gen kouraj pou l fè fas ak kamarad li a. Epitou, li te di profesè l la sa k ap pase a, e pwofesè a te ede l jere sitiyasyon an. Kamarad la te vin mande l padon, e kounye a, yo pa gen okenn pwoblèm antre yo.

Temwen Jewova yo enterese nan byennèt jèn yo. N ap kontinye pibliye konsèy pratik ki pou ede yo jere pwobèm y ap rankontre chak jou nan lavi yo, tankou pwoblèm brimad la.