Nan ane ki sot pase yo, gen yon pakèt refijye ki sot ann Afrik, Mwayenn Oryan ak Azi disid ki pa t sispann debake ann Ewòp. Pou ede yo, gen kèk ajans leta ak kèk volontè ki te travay pou pèmèt yo jwenn manje, kay pou yo abite ak swen medikal.

Nòmalman, refijye yo bezwen plis pase èd nan domèn fizik. Gen anpil nan yo k ap soufri moralman, e konsa, yo bezwen konsolasyon ak espwa. Temwen Jewova ann Ewòp santral yo te fè gwo efò pou ede refijye yo konble bezwen sa a lè yo koute yo ak lè yo fè yo tande panse nan Bib la ki bay konsolasyon.

Depi mwa out 2015, gen Temwen ki soti nan plis pase 300 kongregasyon ann Otrich ak Almay ki te fè yon efò espesyal pou konsole refijye yo. Yo te remake refijye yo sitou renmen pale sou repons Bib la bay pou kesyon sa yo:

• Poukisa gen tout soufrans sa a?

• Ki sa k rive apre nou fin mouri?

• Ki bon nouvèl ki gen nan Ekriti yo?

• Èske Bondye gen yon non?

• Kiyès Temwen Jewova yo ye?

Ant mwa out pou rive oktòb 2015, Temwen nan zòn nan te kòmande plis pase kat tòn piblikasyon ki baze sou Bib la nan biwo filyal Ewòp santral la e yo te bay refijye yo piblikasyon sa yo gratis.

Gen anpil nan refijye yo ki pale lang manman yo sèlman. Se sa k fè Temwen yo te sèvi ak sit jw.org la ki chaje atik ak videyo nan plizyè santèn lang. Men sa Matthias ak Petra, k ap sèvi kòm volontè nan vil Erfurt, ann Almay, fè konnen: “Pafwa, nou konn fè jès e n konn sèvi ak foto ak desen pou n kominike ak yo.” Anplis de sa, Temwen yo konn sèvi ak aplikasyon JW Language la, yon aplikasyon pou aprann lang, pou yo ka ede yon refijye tande mesaj ki nan Bib la nan lang manman l. Gen lòt Temwen ki sèvi ak aplikasyon JW Library a, ki an plizyè lang, pou yo li vèsè epi montre videyo.

Men sa yon koup Temwen ki soti Schweinfurt, Almay, te di: “Gen yon pakèt moun ki te vin antoure nou. Nan dezèdtan edmi, refijye yo te aksepte anviwon 360 piblikasyon. Gen plizyè nan yo ki te sekwe tèt yo pou yo di nou mèsi.” Men sa Wolfgang, k ap sèvi kòm volontè nan vil Diez, ann Almay, fè konnen: “Refijye yo kontan lè yon moun demontre enterè pou yo. Pafwa, yo konn mande piblikasyon nan senk oswa sis lang.”

Gen anpil nan yo ki kòmanse li yon piblikasyon menm kote a e gen lòt ki konn retounen vin remèsye Temwen yo. Men sa Ilonca, yon Temwen nan vil Berlin, ann Almay, di: “Gen de jèn gason ki te pran kèk piblikasyon. Trant minit annapre, yo te retounen ak kèk pen kòm kado. Yo te mande n eskiz dèske yo pa t ka ofri n okenn lòt bagay pou yo ka di n mèsi.”

Moun k ap travay nan domèn sosyal, ofisyèl yo ak vwazen yo apresye efò Temwen yo ap fè. Men sa yon moun k ap travay nan domèn sosyal, e ki te pran swen anviwon 300 refijye, te di: “Mèsi! Mèsi anpil lefètke n montre n gen sousi pou byennèt rezidan etranje yo!” Gen yon lòt moun k ap travay nan domèn sosyal nan yon kan refijye ki di se yon bon bagay sa ye lefètke Temwen yo bay refijye yo yon bagay ki gen anpil valè pou yo li nan pwòp lang yo, “etandone, pou kounye a, lavi yo depann sèlman de twa plat manje chak jou”.

Marion ansanm ak mari l, Stefan, k ap viv ann Otrich, te esplike de ofisye polis, ki t ap fè patwouy, objektif travay y ap fè kòm volontè a. Ofisye yo te remèsye yo e yo te mande yo de liv. Men sa Marion di: “Polisye yo pa sispann felisite nou pou travay n ap fè a.”

Gen yon dam ann Otrich, ki konn fè don regilyèman nan yon kan, ki te remake kèlkeswa jan tan an ye, Temwen yo toujou met tèt yo disponib pou ede refijye yo. Men sa l te di yo yon jou: “Se sèten refijye yo bezwen èd materyèl. Men, sa yo plis bezwen se espwa. E se egzakteman sa nou pote pou yo.”