Nan dat 6 Me 2017 la, gen apaprè 130 Temwen Jewova ki te ede nan netwayaj yo t ap fè nan forè yo rele Bryukhovychi ki akote vil Lviv, nan peyi Ikrèn. Moun ki te volontè pou travay sa a te gen ant 22 a 80 ane, e yo fè pati moun k ap viv e k ap travay nan filial Temwen Jewova yo nan peyi Ikrèn, ki toupre forè a. Yo chèche netwaye prèske 40 karo tè e yo ranmase prèske 1 300 liv fatra nan espas twazèdtan sèlman.

Men sa Mykhailo Splavinskyi, enjenyè responsab ki jere forè a nan sant ki nan vil Lviv ki rele Forest Breeding and Drilling Center, fè konnen: “Temwen Jewova yo te premye nan bay èd nan netwayaj nou fè nan forè a chak ane, e yo kontinye fè sa chak ane depi 2014.”

Dapre mesye Splavinskyi: “Gen de rezon ki fè fatra yo rive ateri nan forè a. En, moun lage fatra atè. De, moun vin avèk kamyon ki gen dechè ki soti nan konstriksyon ak lòt kote ankò e yo vin lage yo nan forè a.”

Fatra se yon pwoblèm grav pou forè a. Mesye Splavinskyi fè konnen: “Fatra a pran yon tan ki byen long pou l dekonpoze. Apre, li kontamine dlo ki nan sòl la, sa ki vin bay pwoblèm anviwònman.” Bagay ki fèt an vè yo jete atè kapab lakoz dife pran akoz reyon solèy yo frape fèy sèch ki atè yo plis. Bagay ki fèt an vè ki kase ak sereng yo lage atè konsa kapab vin yon danje, sitou pou timoun piti yo. Men sa li di ankò: “Nou ka evite tout pwoblèm sa yo si nou retire fatra yo la.”

Se pa yon ti bagay sa ye pou netwaye prèske 2 560 karo tè ki kouvri ak forè. Men sa li di ankò: “Se sèlman senk gad forestye nou te gen avèk nou, se sa k fè nou pa t ap kapab netwaye tout gwo espas sa a. Donk, chak ane, nou mande popilasyon an pou l patisipe avèk nou nan netwayaj forè a.”

Avèk gan nan men yo, sachè plastik ak rato nan men yo, Temwen yo ki te pote tèt yo kòm volontè te ranmase boutèy, kawotchou machin, vè, bout fè, papye, bagay an plastik ak sereng moun fin sèvi. Dapre Ihor Fedak, k ap travay antanke jeran forè nan tout zòn nan, men ki rezilta sa te bay: “Espas Temwen Jewova yo t ap netwaye a trè pwòp.”

Menm lè lalwa pa mande sa, volontè yo te triye fatra yo an twa kategori: vè, papye ak plastik pou yo ka resikle yo. Konsa, gen yon konpayi nan zòn nan ki okipe fatra ki te trete yo. Depi 2016, Temwen yo te menm peye ak kòb pa yo pou yo jete fatra yo te ranmase yo. Mesye Fedak di: “M di Temwen Jewova yo mèsi pou èd yo ban nou. Yo ede nou anpil.”

Temwen yo kontan patisipe nan netwayaj forè a otorite yo òganize chak ane. Yo renmen bay kontribisyon pa yo pou byennèt kominote a e pou forè a rete pwòp. Yon frè ki rele Volker fè n konnen jan li konsidere netwayaj la, e se konsa yo tout wè sa: “Fè netwayaj pa retire nan diyite m. Paske lè m rann lòt moun sèvis, sa bèl e sa ban m kè kontan.”

Yon sè ki rele Anzhelika di: “Pou mwen, sa ki pi enpòtan an, se pa kiyès ki jete fatra a atè men, se ki jan m ka jwenn yon fason pou m retire l kote l ye a.” Yon lòt sè ki rele Lois, ki gen 78 an, te patisipe nan kanpay la. Men sa li di: “Olye pou n fache poutèt fatra nou wè atè lè n ap pwonmennen, pito nou ranmase l pou n jete l.”

Men sa yon frè ki rele Wieslaw di: “Moun yo abitye wè n byen abiye ak kravat nan kou nou, pou n al pataje kwayans nou. Men, nou dispoze twouse manch chemiz nou pou n netwaye forè a e fè travay ki nan avantaj lòt moun tou.”