Enprimri Temwen Jewova yo genyen nan Meksik la te resevwa sètifika Antrepriz ki pwòp la pou yon setyèm fwa youn dèyè lòt.

Jou ki te 26 septanm 2012 la, gouvènman Meksik la te remèt Temwen Jewova yo yon sètifika rekonesans “pou angajman yo pran nan pran swen ak pwoteje anviwònman an”.

Pwogram Antrepriz ki pwòp la ede antrepriz yo pou yo pwoteje anviwònman an. Temwen Jewova yo patisipe nan pwogram sa a chak ane, menmsi òganizasyon nou an se pa yon òganizasyon k ap chèche fè kòb. Yon pòtpawòl enprimri Meksik la fè konnen: “Pou nou te ka resevwa sètifika Antrepriz ki pwòp la, nou te dwe bay prèv fason nou fonksyone a pa gen move enpak sou anviwònman an e nou respekte lwa yo bay sou sèt bagay, ki se lè a, dlo, fatra yo, fatra ki reprezante gwo danje pou sante moun, kouran ak fòmasyon ki gen rapò ak pwoteksyon anviwònman an. Antrepriz yo pa oblije patisipe nan pwogram sa a. Men nou menm, nou deside patisipe.”

Temwen Jewova yo sou tout tè a fè tout sa yo kapab pou yo pwoteje anviwònman an.