Nan kòmansman mwa desanm 2012, Temwen Jewova yo nan peyi Taylann te mennen yon kanpay espesyal pou ede elèv yo reyisi lekòl. Gen ven Temwen ki te vizite lekòl ki nan zòn Bangkòk la. Yo te fè ti pale ak direktè chak lekòl e yo te bay pwofesè yo ak elèv yo Réveillez-vous! oktòb 2012 la ki gen tit: “Réussir sa scolarité.”

Piske Temwen yo te jwenn bon rezilta nan kanpay la, yo te fè sa nan tout peyi a. Pandan anviwon ennan edmi, yo te kontakte 830 lekòl epi yo te tèlman jwenn elèv ak pwofesè ki te vle jwenn Réveillez-vous! a, sa te fè yo enprime l twa fwa ankò yon fason pou yo te ka bay tout moun ki te mande yo. Premye kòmann yo te fè pou Réveillez-vous! oktòb 2012 la te anviwon 30 000 kopi. Sepandan, moun yo te tèlman renmen sijè a, finalman yo te distribye 650 000 kopi!

Direktè ak pwofesè lekòl yo pa t pran tan pou yo te wè jan Réveillez-vous! a enpòtan anpil. Men sa yon pwofesè te di: “Réveillez-vous! a ap ede elèv nou yo gen bon relasyon ak fanmi yo e l ap ede yo gen bèl objektif.” Gen kèk lekòl ki mete sijè ki nan Réveillez-vous! a nan pwogram lekòl la. Gen kèk lekòl ki sèvi avè l pou fè egzèsis lekti. Nan youn nan lekòl yo, yo te mande elèv yo pou yo prepare yon rapò ki baze sou Réveillez-vous! a. Yo te rekonpanse elèv ki te fè pi bon devwa yo.

Youn nan elèv yo, ki se yon fi, te apresye atik ki gen tit: “Jeunesse et obésité — La guerre est déclarée!” ki nan Réveillez-vous! a. Li te fè konnen gwosi depase limit se yon pwoblèm ki gaye toupatou e zanmi l yo pa renmen pale de sijè sa a. Men sa l di ankò: “Mèsi dèske m jwenn konsèy ki fasil pou m konprann e ki fasil pou m aplike.”

Paran yo tou te apresye Réveillez-vous! a. Gen yon manman ki te di Temwen yo mèsi apre li te fin resevwa Réveillez-vous! a lakay li. Men sa l te di: “Se yon bon zouti k ap ede pitit fi m nan travay pi byen lekòl.”

Men sa Mesye Pichai Petratyotin, pòtpawòl Temwen Jewova yo nan peyi Taylann, te di: “Réveillez-vous! met aksan sou konsèy saj nou jwenn nan Bib la ki itil moun jodi a. Temwen Jewova yo kwè nan valè edikasyon genyen, se sa k fè nou kontan distribye nimewo sa a bay tout moun gratis.”