Y ap pote yon pyès pou y al enstale nan antre yon pon ki nan yon zòn ki gen marekaj. Yo te met kawotchou anba l pou soutni l pandan yo t ap retire l nan yon kamyon. Pon an pral pwoteje zòn sa a kote anviwònman sansib anpil.

Do bilding nan kouvri nèt ak yon kalite plant gra ki rele sedum e ki chanje koulè anvan l sispann travay nan sezon ivè. Yo plante sis varyete sedum sou do bilding yo. Plant ki sou do bilding yo ede anviwònman an piske l kontwole gwo lapli, li redui depans enèji e n sèlman bezwen retire move zèb ladan l pou l ret an bon eta.

Yon bòs chapant k ap kouvri jwenti yon plaka kuizin nan yon chanm rezidans. Rive nan fen mwa fevriye 2016, sèvis ebenis la te gentan enstale plis pase 60 pousan plaka kuizin yo.

De elektrisyen k ap enstale kèk anpoul ki limen grasa dyòd, light-emitting diode (LED), pou pèmèt logo Watch Tower a limen sou mi fòtrès ki nan lakou a.

Bilding ki gen biwo ak lòt sèvis yo, fòtrès ki nan lakou a ansanm antre saldatant lan limen nan aswè. Fòtrès la ap pèmèt vizitè yo byen wè tout chantye a ansanm ak zòn ozalantou yo.

Kèk moun k ap koule beton nan yon wout y ap prepare pou machin ki la pou ijans. Twil ki kouvri pant ki pa dèyè a redui posiblite pou zòn nan deteryore pandan konstriksyon an.

Volontè yo ap enstale yon fenèt an vit anlè tèt asansè ki nan saldatant lan. Yo enstale onz fenèt konsa, ki pèmèt limyè solèy la klere anndan an, nan bilding ki gen biwo ak lòt sèvis yo.

Yon bòs soudi k ap sèvi ak yon machin (oxygen-acetylene beveling machine) pou l koupe kèk tiyo ki fèt ann asye kabòn pou yon sistèm dlo glase.

Yon bòs chapant k ap enstale yon chanbrann pou fenèt. Apre yo fin fè chanbrann nan nivo epi yo fin randui l, y ap enstale yon ankadreman fenèt ladan l.

Y ap poze adoken nan yon jou lapli. Adwat foto a, gen yon ti traktè blan ki la pou fè gravye a nivo. Devan nan foto a, gen yon machin k ap leve adoken pou plase l kote yo pral mete l la. Agoch, yo met yon gwo prela atè a pou anpeche tè a deteryore.

Kèk medam k ap rale yon fil mwayen tansyon nan yon stasyon elektrik ki pral pèmèt bilding Wòwik yo jwenn kouran.

Yon volontè k ap fini yon twati ki kouvri ti wout ki relye pakin vizitè yo ak bilding ki gen biwo ak lòt sèvis yo. Twati sa a pral pwoteje vizitè yo lè gen lapli ak nèj.

Yon teknisyen k ap ajiste bouton kontwòl yon machin ki bay dlo cho. Kounye a, yo gentan fin enstale toule kat machin k ap pèmèt bilding Wòwik yo jwenn dlo cho.

Kèk mekanisyen k ap enstale machin pou seche rad nan depatman biyandri a. Machin sa yo gen kapasite pou seche ant 6 a 45 kilogram rad. Yo gen pou enstale machin pou lave rad toutolon mi agoch la.

Frè Gerrit Lösch, yon manm Kolèj santral, k ap kondui etid Toudegad pou fanmi Betèl la. Volontè nan Wòwik ki abite nan lòt lokal yo rive wè pwogram nan grasa lyezon Entènèt.

Depatman ki fè travay anndan bilding yo ap debake kapèt pou youn nan bilding rezidans yo. Yo te fè demann plis pase 65 000 met kare kapèt pou bilding Wòwik yo.

Ant septanm 2015 rive fevriye 2016, nou te resevwa pèmi pou moun abite nan bilding rezidans C ak D, sa ki pèmèt volontè yo abite nan yo. Tout asansè pou bilding yo fin enstale. Wout ki mennen nan rezidans yo gentan fin konstwi e yo gentan fin poze adoken. Piske sezon ivè a pa t twò difisil, sa pèmèt nou pran devan nan kalandriye nou te fikse pou amenajman jaden yo.

Youn nan moun ki travay nan ekip k ap enstale fo plafon yo ki kanpe sou yon sipò metalik ki menm jan ak yon janm de bwa pou l enstale fo plafon. Se depatman ki travay nan mi ak fo plafon yo ki responsab ankadreman, izole tiyo, poze playwoud epi fini yo, krepi ak randui epi enstale izolan nan fant mi kote tiyo pase yo pou pwoteje kont dife.