De travayè k ap monte blòk pa deyò bilding nan ap sèvi ak zouti pou fè jwen blòk yo pandan y ap monte yo. Yo kole brik sa yo ki mens sou sifas metalik ki nan mi yo pou kache yo.

Yon travayè nan ekip achitèk la ap pran mezi pou detèmine kote y ap plase mi apatman yo k ap bay sou deyò, e pou sa, li sèvi ak yon aparèy lazè ki sou trepye ak yon lòt pou vize. Anmenmtan nan Rezidans F la nou kapab wè pa dèyè nan foto a, travay ebenis yo ap fè anndan apatman yo ap byen vanse.

Yon travayè k ap flite yon ti dlo sou randui yo te mete sou yon mi pou l fè finisyon an ak yon tiwèl. Pou yo pa gaspiye dlo, Depatman finisyon an sèvi ak yon aparèy ki retire imidite nan lokal la, e yo pran dlo a pou yo prepare randui y ap bezwen ak siman pou poze seramik yo.

Pa deyò Rezidans E a, travayè yon konpayi ki gen kontra pou sa ap koule asfalt sou youn nan wout ki bay aksè ak espas la.

Yon mason ki gen 71 an ap monte mi k ap sou deyò Rezidans F la. Depi kòmansman travay la, se plis pase yon santèn Temwen ki gen plis pase 70 an ki bay patisipasyon yo nan travay la, selon kapasite ak eksperyans yo genyen.

Sa se yon foto ki montre pati wès chantye a. Do kay tout rezidans yo gen kapasite pou yo enstale jaden sou yo. Depi yo fè sa ki nesesè pou yo anpeche dlo a travèse dal a e yo fè drenaj dlo a, yo gen pou yo plante semans plant ki pouse nan zòn nan. Kalite do kay sa yo se yon avantaj pou bèt ki nan zòn nan, yo pèmèt depanse mwens enèji e yo pèmèt pou redui fason dlo ap koule desann lè gen lapli. Devan nan foto a, nou wè baz yo fè pou Rezidans A ak fondasyon yo fè pou yon pati nan bilding ki pral gen biwo yo.

Ebenis yo ap enstale yon chanbrann pòt pou youn nan apatman yo. Chanbrann yo ak pòt yo pa bezwen yo pentire yo e pou yo enstale gon yo ak seri yo lè yo fin livre sou chantye a, konsa li pi fasil pou fabrike yo e pou enstale yo.

Pandan solèy la ap kouche, yon konpayi ap enstale fondasyon pou bilding ki pral gen biwo yo. Nan mitan foto a, anplwaye konpayi a ap foure poto yo nan twou yo fèk koule beton ladan yo. Yo te fouye sa yo a anviwon 65 pye. Nou ka wè Rezidans B a pa dèyè chantye a.

Youn nan travayè yo ap enstale sipò ki pral pote tiyo k ap sèvi pou chofaj la anba dal pakin nan ki anba bilding nan. Yo pral enstale pano ki fèt ak yon materyo ki pou anpeche fredi a travèse dal la pou l antre nan rezidans yo ki anlè pakin nan.

Yon travayè nan ekip finisyon an ap fin sable mi yo ak yon aparèy ki fèt pou sa. Aparèy la gen yon seri ti twou nan sable a ki rale tout pousyè a. Apre sa, y ap poze papye ki pou kouvri mi yo.

De travayè nan ekip jeni sivil la ap prepare sifas yon wout k ap mennen nan yon batiman teknik. Yo sèvi ak yon tòch pou yo ka boule fòm moul ki te sèvi pou koule beton wout la, sa ki pral pèmèt gazon pouse nan twou k ap rete yo. Lè konsa, wout la ap pèmèt pou dlo lapli pa kouri desann men, pou l antre nan sòl la.

Travayè k ap flite yon dènye kouch penti nan kuizin youn nan apatman yo ap sèvi ak yon aparèy a presyon pou fè sa.

Ekip ki monte echafo yo ap demonte yon pati nan echafo yo pou pèmèt yo enstale balkon yo. Gwo tiyo wouj yo nou wè nan mitan foto a pote van cho anndan apatman yo pou seche siman ki fè sòl yo, randui ak penti ki sou mi yo.

Yon travayè nan ekip finisyon an ap sèvi ak yon zouti pou l retire lè ki anba tapi fen ki fèt ak yon materyo spesyal yo rele vinil ki pral kouvri mi a. Yo kapab lave materyo sa a byen fasil, li kapab dire anpil tan e li trè pratik pou zòn kote anpil moun ap pase. Dèyè do li, gen lòt manm ekip la k ap pentire mi a e y ap koupe moso tapi pou yo kouvri mi a.

Travayè yo ap asiste yon reyinyon anvan yo kòmanse travay nan asiyasyon yo pou jounen an. Responsab ekip la mete aksan plis sou sekirite moun k ap travay yo e li montre ki danje ki ka genyen sou chantye a. Plizyè moun k ap travay nan diferan depatman ap fè travay siplemantè pou yo netwaye apatman nan Rezidans F la ak alantou yo, anvan pou premye moun k ap vin rete ladan yo vini.

Grasa yon aparèy ki gen yon platfòm, yon konpayi ap enstale balkon Rezidans F la. Koulè yo chwazi pou balkon bilding yo ap ede idantifye yo e yo marye byen ak koulè pyebwa yo gen nan zòn nan pandan mwa oktòb novanm yo. Nan bilding ki dèyè a, nou kapab wè y ap retire plizyè gwo prela nan Rezidans E a anvan yo retire echafo yo.

Apre lè travay yo, yon koup mari ak madanm k ap bwote zafè yo nan yon apatman ki nan Rezidans F la yo fèk fini yon jou anvan sa. Lè yo mete moun k ap travay sou chantye a nan lojman yo fèk fini yo, sa pèmèt yo redui nan kòb sa koute pou loje moun yo e pou deplase yo, san konte sa pèmèt travay yo travay pi byen.

Pandan l aswè, yon konpayi yo peye pou sa, ap koule beton dal yon pakin. Pa dèyè, ou kapab wè Rezidans B a.

Yon mari ak madanm li ki fè pati ekip ebenis la, ap sèvi ak yon si elektrik ki gen yon aspiratè ki rale pousyè a, pou yo dekoupe yon moso kontwa kuizin ki fèt ak yon materyo ki tankou granit. Lè yo koupe materyo yo sou plas, nan kuizin nan, sa evite pou yo transpòte l, sa ki ka koze dega.