Yo fè yon nouvo Sal asanble nan mitan forè Amazòn ki enpresyone anpil moun. Yo fè konstriksyon sa a sou anviwon 41 kawo tè nan yon zòn ki chaje forè, nan nò vil Manawous, nan peyi Brezil. Gen pèwokè tout koulè, gen toukan ak lòt zwazo ankò k ap chante anlè tèt yon seri gwo pwebwa nan peyi Brezil ki rele cupuaçu ansanm ak yon seri gwo pye mapou. Poukisa se la a yo konstwi Sal asanble sa a?

Vil Manawous twouve l nan yon distans 1 450 kilomèt parapò ak tèt Rivyè Amazòn nan e gen prèske de milyon moun k ap viv ladan l. Gen plis pase 7 000 Temwen Jewova ki abite nan vil Manawous oswa toupre vil la k ap itilize Sal asanble sa a, san wete sila yo ki rete nan vilaj ki sou kote Rivyè Amazòn nan ak ozalantou yo. São Gabriel de Cachoeira se vil ki pi lwen an, li chita kò l alwès vil Manawous nan yon distans ki plis pase 800 kilomèt. Gen kèk Temwen Jewova ki vwayaje pandan twa jou nan bato pou yo vin asiste asanble oswa kongrè nan Sal asanble sa a.

Konstwi yon Sal asanble nan mitan forè Amazòn mande anpil travay. Yo te oblije transpòte 13 konntenè materyo konstriksyon soti nan pò ki Santòs lan, nan Eta Sawo Polo, yo vwayaje avèk yo sou kòt Brezil answit sou Rivyè Amazòn nan pou yo rive avèk yo sou chantye a.

Sa fè 27^yèm Sal asanble yo konstwi nan peyi Brezil. Jou dimanch ki te 4 me 2014 la, gen anviwon 1 956 moun ki te la nan inogirasyon an. Anpil moun te kontan anpil paske se te premye fwa yo t ap asiste reyinyon nan yon Sal asanble.

Moun ki t ap asiste yo pa t sèlman tande oratè a k ap pale, men yo te kapab wè l tou. Yo te apresye chanjman sa a anpil, paske anvan sa, asanble yo ak kongrè yo te konn fèt sou plas piblik e anpil moun pa t konn wè ni estrad la ni oratè a. Men sa yon Temwen te di: “Sa gen plizyè ane depi m ap asiste asanble, men, mwen pa t janm ka wè yon dram biblik. Se tande m te konn tande yo sèlman.” Kounye a tout moun ka wè estrad la.