Ant ane 1999 pou rive ane 2015, Temwen Jewova yo te konstwi plis pase 5 000 Sal Wayòm ann Amerik santral * ak nan peyi Meksik. Anplis de sa, nou bezwen konstwi plis pase 700 lòt Sal Wayòm pou pèmèt yon milyon Temwen ansanm ak lòt moun ki konn asiste reyinyon nou yo nan zòn sa a rive jwenn kote pou yo reyini.

Anvan sa, li te difisil anpil pou kongregasyon ki nan zòn sa a rive konstwi kote pou yo adore. Pa egzanp, nan peyi Meksik, pifò Temwen yo te konn fè reyinyon nan kay prive. Sak fè sa? Youn nan rezon yo se paske pandan plizyè ane, lwa peyi a te fè konnen òganizasyon relijye yo pa t ka posede tè. Sepandan, nan ane 1990 yo, yo te chanje lwa a e Temwen Jewova yo te kòmanse konstwi anpil Sal Wayòm. Malgre sa, byen souvan, sa te konn pran plizyè mwa pou konstwi chak sal.

Nou te kòmanse ale pi vit nan konstriksyon yo an 1999 lè Gwoup konstriksyon Sal Wayòm yo te kòmanse suiv yon nouvo pwogram pou konstwi Sal Wayòm nan peyi kote frè yo pa gen anpil mwayen, sa ki gen ladan l peyi Meksik ansanm ak sèt peyi ki ann Amerik santral yo. Depi ane 2010, biwo filyal la ki twouve l nan peyi Meksik ap sipèvize travay konstriksyon k ap fèt nan tout zòn nan.

Sèvitè nan konstriksyon yo konn jwenn kèk gwo difikilte lè y ap konstwi Sal Wayòm nan zòn izole yo. Pa egzanp, nan peyi Panama, sèvitè nan konstriksyon yo te dwe vwayaje nan bato sou lanmè pandan anviwon twazèdtan pou yo rive nan yon pwojè. Epi, nan Eta o Meksik ki rele Chiapas la, gwoup konstriksyon an te dwe itilize yon ti avyon pou yo ka pote materyèl konstriksyon yo sou yon chantye ki izole.

Byen souvan, menm moun ki pa Temwen yo konn pa ka tann pou yo wè yon nouvo Sal Wayòm nan zòn kote y ap viv la. Pa egzanp, gen yon mesye nan peyi Ondiras ki te fè konnen anvan Temwen yo te konstwi yon Sal Wayòm nan zòn l ap viv la, gen kèk lòt moun ki te chofe pou yo sèvi ak teren an pou bati yon nayklèb. Men, mesye a pa t vle sa. Lè Temwen Jewova yo te fè l konnen yo planifye pou yo konstwi yon Sal Wayòm sou teren an, li te di: “Ala yon benediksyon!”

Nan anpil zòn, moun yo konn sezi lè yo wè jan frè ak sè yo bay tout yo menm nan travay la. Men sa yon mesye nan peyi Gwatemala te di: “Nan kilti pa nou, byen souvan, se sèlman nan kuizin medam yo travay. Men, medam sa yo ap fè menm travay ak mesye yo. Mwen sezi pou m wè jan medam yo ap mare fè ak jan y ap randui mi. Sa vrèman enpresyonan!” Gen kèk moun nan vwazinaj la ki te menm achte manje ak bagay pou bwè bay moun k ap travay nan konstriksyon an.

Anplis de sa, gen anpil moun ki renmen fason Sal Wayòm nou yo fèt. Nan peyi Nikaragwa, gen yon enjenyè ki te fè majistra youn nan vil yo konnen Sal Wayòm nan zòn nan se yon bèl konstriksyon ki fèt ak materyo bon kalite. Anfèt, li te di Sal Wayòm nan pi byen konstwi lontan pase tout lòt bilding ki konstwi nan vil la!

Nòmalman, Temwen Jewova yo kontan anpil tou dèske yo gen bonjan kote pou yo adore. Yo remake jan etidyan Labib yo pi anvi asiste reyinyon kongregasyon yo apre yo fin konstwi yon nouvo Sal Wayòm. Men ki jan kèk frè ak sè nan yon kongregasyon nan peyi Meksik ki te ede sèvitè konstriksyon yo bati yon nouvo Sal Wayòm te eksprime rekonesans yo: “Nou di Jewova mèsi pou privilèj nou genyen pou n konstwi yon Sal Wayòm ki fè non l jwenn glwa ak onè.”