Gen anpil moun ki panse endyen ann Amerik yo ap viv nan yon seri rezèv (vil izole kote se endyen sèlman k ap viv) toupatou Ozetazini. Sepandan, gen plis pase 70 pousan nan endyen sa yo k ap viv aktyèlman nan yon seri zòn ki chaje moun. Nan dat 5 pou rive 7 jen 2015, endyen ann Amerik yo te òganize yon rasanbleman ki rele “Pòt ki ouvri sou nasyon yo” (oswa powwow *) nan Nouyòk ki se pi gwo vil Ozetazini. Lè kèk Temwen Jewova te vin okouran rasanbleman sa a, san pèdi tan, yo te fè aranjman pou yo ale. Poukisa?

Temwen Jewova tradui piblikasyon ki baze sou Bib la nan plizyè santèn lang, sa ki gen ladan l plizyè lang endyen ann Amerik yo pale tankou blakfout, dakota, kridèplèn, mohak, navajo, odawa ak opi. Konsa, pou rasanbleman sa a, Temwen yo te enstale yon seri bèl tab ak charyo piblikasyon. Yo te ekspoze plizyè piblikasyon ki baze sou Bib la san wete feyè Vous pouvez faire confiance au Créateur! la.

Sou sit Entènèt ofisyèl nou an, gen anrejistreman odyo ak videyo nan pifò lang ki parèt pi wo a. Temwen ki t al nan rasanbleman “Pòt ki ouvri sou nasyon yo” te pase yon bon kantite nan anrejistreman sa yo pou vizitè yo. Vizitè yo te rann yo kont se ann anglè oswa ann espayòl sèlman pifò lòt stann yo, pano ak lòt prezantasyon yo te ye.

Anpil nan moun ki te asiste evènman sa a te sezi aprann nonsèlman nou fè gwo efò pou n tradui nan anpil lang endyen ann Amerik yo pale, men tou, n ap fè yon travay ansèyman biblik nan vil yo ak nan rezèv yo. Apre youn nan moun ki fè pati staf ki te òganize rasanbleman sa a te fin tande pale de travay nou an, li te mande pou yo etidye Labib avè l epi l te di: “M pa ka tann pou nou vin vizite m epi pou m aprann plis bagay sou Bib la!”

Gen de endyen ki marye ansanm, yo toule de soud, ki te pwoche toupre youn nan stann nou yo, men, Temwen yo ki te la yo pa t ka pale ak yo. Sepandan, gen yon sè ki te aprann lang siy ki te vin parèt. Li te pase anviwon 30 minit ap fè konvèsasyon ak koup la e l te ede yo jwenn kote Temwen Jewova yo t ap fè yon kongrè nan lang siy nan zòn yo rete a.

Gen plis pase 50 Temwen Jewova ki te pwofite rasanbleman sa a pou yo fè konn mesaj ki nan Bib la, e pandan twa jou rasanbleman an te dire a, vizitè yo te aksepte plis pase 150 piblikasyon nan stann nou yo.