An 2014, Kolèj santral Temwen Jewova yo te bay enstriksyon konsènan yon nouvo pwogram pou pote mesaj ki nan Bib la byen lwen nan zòn nò ki ann Ewòp ak Amerik dinò yo (Travay 1:8). Okòmansman, pwogram nan te plis met aksan sou kominote ki ann Alaska (Etazini), Lapland (Fenlann), ansanm ak kominote ki nan Ninavit ak kominote ki nan Tèritwa Nòdwès yo (Kanada).

Pandan plizyè dizèn ane, Temwen Jewova yo te konn al nan zòn sa yo pou yo preche. Men, Temwen yo te konn rete la pou yon ti tan sèlman, e se sèlman bay yo te konn bay piblikasyon ki baze sou Bib la.

Grasa pwogram sa a, filyal k ap sipèvize travay Temwen Jewova nan zòn sa yo te envite sèvitè aplentan (pyonye yo) pou yo rete nan tèritwa sa yo pandan twa mwa pou pi piti. Si gen anpil moun nan yon zòn ki enterese etidye Bib la, pyonye sa yo ka rete plis tan e yo ka menm fè reyinyon.

Jan nou ka imajine, zòn ki nan nò yo gen difikilte pa yo. Yo te voye de pyonye ann Alaska nan vil Barrow. Anvan sa, youn ladan yo t ap viv nan sid Kalifòni e lòt la t ap viv Jòji, Ozetazini. Pandan premye sezon fredi yo te pase nan vil Barrow, tanperati a te konn desann rive mwens pase 38 degre Sèlsiyis! Poutan, kèk mwa apre yo te rive nan zòn nan, yo te gentan vizite anviwon 95 pousan kay ki nan vil la e yo te kòmanse 4 etid biblik. E youn ladan yo se te ak yon jèn gason ki rele John. Li menm ak fi l te renmen avè l la t ap etidye nan liv Ki sa Labib anseye toutbonvre? a e li pataje sa l aprann yo ak zanmi l ak moun k ap travay menm kote avè l. Epitou, li itilize aplikasyon JW Library a sou telefòn li pou l li tèks pou jounen an nan bwochi Ann egzamine Ekriti yo chak jou a.

Gen yon zòn nan Ninavit nan peyi Kanada ki rele Rankin Inlet, e pa gen wout ki mennen ladan l. Gen de pyonye ki te pran avyon pou ale nan ti bouk tou piti sa a. Lè yo rive, yo kòmanse plizyè etid biblik. Apre yon mesye te fin gade videyo ki rele Ki sa yo fè nan yon Sal Wayòm?, li te mande ki lè y ap konstwi yon Sal Wayòm nan zòn nan. Men sa l te di ankò: “Si m la toujou lè nou konstwi l, m ap vin nan reyinyon.”

Gen yon vil nan peyi Fenlann ki rele Savukoski, e nan vil sa a gen dis fwa plis bèt ki rele rèn nan pase moun. Pyonye yo te voye nan vil sa a fè konnen se yon zòn ki “fè frèt anpil e ki gen anpil nèj”. Malgre sa, yo di yo te rive nan yon bon moman. Sa k fè sa? Men sa yo di: “Nou te rive preche tèritwa a afon paske yo te retire nèj ki te nan wout yo, e te gen plis moun ki rete lakay yo akoz fredi a.”

Gen moun ki te remake efò nou te fè pou n pataje verite ki nan Bib la ak moun ki nan zòn ki nan nò yo. Apre de pyonye te fin vizite majistra youn nan vil ann Alaska yo, majistra a te poste yon bèl mesaj sou yon rezo sosyal konsènan konvèsasyon li te genyen avèk pyonye yo e li te mete imaj feyè Ki sa Wayòm Bondye a ye? sou rezo sosyal sa a tou.

Gen de pyonye nan vil Haines, ann Alaska, ki te byen kontan akeyi 8 moun nan reyinyon yo te fè nan yon bibliyotèk piblik. Jounal zòn nan te fè konnen gen de mesye ki soti Tegzas ak Kawolin dinò ki nan vil la e k ap ofri moun etid biblik lakay yo. Li te di tou: “Ale sou sit jw.org la pou nou jwenn plis enfòmasyon.”