Soti 22 out rive 28 out 2016, Temwen Jewova yo nan Botswana, peyi ki gen pi gwo min dyaman nan monn nan, te ekspoze yon lòt kalite bijou nan yon aktivite yo fè chak ane ki rele “Salon des consommateurs”. Stann yo a te gen piblikasyon ki baze sou Bib la, li te atire atansyon sou sit jw.org la ak videyo ki ankouraje bon relasyon nan fanmi.

Paran ak timoun ki te vizite stann nan te kontan wè seri videyo Fè zanmi ak Jewova ki montre ki jan nou ka aplike prensip ki nan Bib la. Kòm pa gen anpil desen anime nan setswana, lang nasyonal Botswana a, anpil nan moun ki te la yo te mande ki jan yo ka fè gen videyo yo.

Vizitè yo ki te soti toupatou nan peyi a te jwenn anviwon 10 000 piblikasyon e gen 120 moun ki te mande pou yon moun vin etidye Labib gratis avè yo. Gen anpil moun ki te sezi aprann te gen ni kongregasyon anglè ni kongregasyon setswana ki te kolabore nan evènman sa a.

Lè moun ki t ap òganize aktivite sa a t ap bay pri pou stann ak ekspozisyon ki te genyen nan evènman sa a, yo te bay Temwen Jewova yo premye pri.