Toupatou nan monn nan, moun yo vin abitye wè charyo ki gen piblikasyon ki baze sou Bib la Temwen Jewova pibliye. Pa egzanp, ann Almay, Temwen yo te mete charyo nan vil Bèlen, Kolòy, Anmbèg, Minik ak lòt vil ki gen anpil aktivite.

Men, èske moun nan ti vil ann Almay yo, vil kote moun yo konn al pase vakans, t ap enterese nan bèl charyo sa yo tou? Ki jan moun ki nan vil ki nan nò kote moun yo al pase vakans, moun nan zòn bò lanmè yo ak zile ki nan lanmè Nò ak lanmè Baltik ap reyaji lè yo wè charyo yo? An 2016, filyal Temwen Jewova ki ann Ewòp santral la te deside fè yon bagay espesyal pou yo jwenn repons kesyon sa yo. Soti me pou rive oktòb, gen anviwon 800 Temwen ki konn sèvi ak charyo piblikasyon nan gwo vil yo, e pami yo, te gen kèk ki soti byen lwen tankou Vyèn, ann Otrich, ki te pote yo volontè pou yo mete charyo yo nan anviwon 60 zòn nan nò Almay.

Yo te byen akeyi Temwen yo. Men sa youn nan Temwen yo di: “Moun yo te montre yo enterese. Yo te amikal, yo te vle konnen e yo te dispoze pale.” Men sa Heidi, youn nan moun ki te deplase al nan vil Plön, di: “Apre kèk jou, moun yo te konsidere nou kòm moun ki fè pati vil la. Kèk nan yo rekonèt nou e yo voye men ban nou lè yo wè nou.” Gen yon mesye ki soud ki di yo nan lang siy: “Nou tout kote!” Paske li menm ak kèk zanmi fèk soti nan yon rasanbleman yo t ap fè pou moun soud nan sid Almay, e yo te rankontre Temwen Jewova yo nan zòn sa a tou.

Gen kèk moun nan zòn yo ki te menm ede yo. Sou zile ki rele Vandèwoudj la, gen yon polisye ki te pwoche kèk Temwen e l te fè yo konnen jantiman ki jan yo ka rive touche plis moun. Nan vil Myouritz, kapitèn yon bato ki la pou moun vizite vil la te atire atansyon pasaje yo sou kèk kote enteresan nan vil la. Epi li lonje men l sou charyo piblikasyon ki te sou waf la, li di: “Epi, nou ka aprann kèk bagay sou Bondye.” Gen plizyè moun ki te vin an vakans ki te pwoche e ki te pran tan pou yo li afich ki te sou charyo yo.

Ni touris ni moun lokal te montre yo enterese nan twa bwochi ki annapre yo:

• Dieu se soucie-t-il vraiment de nous? Gen yon touris ki di: “Sa fè lontan mwen t ap poze tèt mwen kesyon sa a. Kounye a, pandan m an vakans lan, m ap resi gen tan pou m li yon bagay sou sa.”

• Bon nouvèl Bondye bay la! Gen yon mesye ki granmoun ki di Temwen yo li pa kwè nan relijyon ankò. Yo te ede l konprann pa gen yon moun sou tè a ki ka rezoud pwoblèm nou yo e se sèl Bondye ki ka fè sa. Mesye a te byen kontan pran bwochi a e li te pwomèt l ap li l.

• M ap aprann nan Bib la. Gen yon papa ki te dakò pou ti pitit fi l pran bwochi sa a, ki fèt espesyalman pou timoun piti. Epitou li menm, li te pran Liv istwa biblik mwen an, e li te di: “Sa ap bon pou fanmi m.”

Moun k ap pase yo te pran plis pase 3 600 piblikasyon. Gen kèk moun ki te mande Temwen yo pou vizite yo pou yo kontinye fè ti pale sou Bib la.

Temwen ki te patisipe nan aktivite sa a renmen eksperyans yo te fè a. Jörg ak madanm li, Marina, te vwayaje al nan yon zòn ki toupre Lanmè Baltik. Men sa yo di: “Se te yon kado espesyal. Nou te ka pale ak lòt moun de Bondye pandan n ap pwofite kreyasyon l lan.” Lukas ki gen 17 an di: “M te renmen eksperyans lan! Nonsèlman mwen te amize m, men tou mwen te gen posiblite pataje yon bagay ki gen valè ak lòt moun.”