An novanm 2011, gen yon gwoup Temwen Jewova ki te kòmanse mete yon seri tab ak charyo ki gen piblikasyon ki byen ranje pou ede moun Manatann vin abitye ak mesaj ki nan Bib la. Yo te fè kanpay sa a nan sid Manatann, pati ki gen plis aktivite nan pati ki pi ansyen nan vil Nouyòk.

Yo te separe zòn nan an kat seksyon. Nan chak seksyon sa yo te gen plizyè tab oswa charyo divès kote, ki gen piblikasyon ki baze sou Bib la ki byen ranje ak yon moun ki nan sèvis aplentan ki rete nan zòn nan pou ede moun k ap pase ki te fè yon ti kanpe pou gade yo. Yo te mete pifò nan tab oswa charyo yo bò stasyon, kote plizyè dizèn milye moun pase chak jou.

Nan zòn sa yo, moun kapab jwenn repons pou divès kesyon yo genyen sou Bib la. Moun ki pa vle rete yo kapab pran yon piblikasyon pou yo li annapre.

Gen piblikasyon nan plizyè lang. Si yon piblikasyon pa disponib nan lang yon moun bezwen, yo kapab kòmande l, e moun nan ka pase pran l apre kèk jou.

Ni moun nan zòn nan ni otorite yo te byen akeyi inisyativ sa a. Men sa yon polisye di: “Sa k fè nou pa t fè sa depi lontan? Nou vrèman gen sa moun yo bezwen.”

Gen yon lòt mesye ki te kanpe sèk lè l te wè liv Ki sa Labib anseye toutbonvre? a. Li di li te wè moun nan stasyon tren an ap li liv la e li t ap mande tèt li kote yo te jwenn li. Kounye a, li konnen.

Gen yon jèn gason ki te toujou pase devan youn nan tab yo chak jou lè l pral travay pandan sis semèn. Finalman, yon jou, li kanpe e li di: “M bezwen èd.” Moun ki te responsab tab la te byen kontan ede l. Yo te ba li yon Bib e yo te montre l ki jan pou l tire pwofi ladan l.

Gen moun ki te byen kontan kanpe pou yo pale sou kesyon espirityèl. Nan youn nan mwa ki sot pase yo sèlman, aktivite sa a te pèmèt piblik la resevwa 3 797 peryodik ak 7 986 liv.