Nan ane 1987, Lyman Swingle, yon manm Kolèj santral la, t ap pale devan 63 580 moun ki te rasanble nan Plaza Monumental, nan vil Valencia, nan peyi Venezyela. Anpil moun te vwayaje pandan yon nuit pou yo ka vin koute pwogram nan. Men sa frè Swingle te di foul moun ki te la yo: “Kounye a, nou pa yon ti filyal ankò. Nou vin gen yon filyal ki pi gwo. E lè nou byen gade, gen yon jou k ap rive, n ap fè pati gwoup peyi ki gen 100 000 pwoklamatè yo.”

Nan peyi Venezyela, te gen 38 000 pwoklamatè Temwen Jewova aktif ki t ap preche bon nouvèl konsènan Wayòm nan nan ane 1987. Nan epòk sa a, se uit peyi sèlman ki te gen plis pase 100 000 pwoklamatè.

Fason Temwen Jewova yo te vin ap ogmante nan monn nan te enpresyonan. Apre Premye Gè mondyal la, yo te kèk milye ki t ap anonse Wayòm Bondye a an piblik. Men, sa te vin chanje. Men sa liv Liv aktivite Temwen Jewova yo 1943 (fransè) te fè konnen: “Byenke rapò mondyal pou ane 1942 a pa fin konplè, akoz mwayen kominikasyon yo ki pa fasil, nou gen prèv Bondye beni l. [...] Paske, rapò sa a montre sou tout tè a gen plis pase 106 000 pwoklamatè k ap preche bon nouvèl konsènan Wayòm nan.” Menmsi te gen ajitasyon pandan Dezyèm Gè mondyal la, anpil moun te byen reyaji devan mesaj ki sot nan Bib la. Nan ane 1950, Etazini se te sèl peyi ki te atenn 100 000 pwoklamatè.

Nan ane 1974, peyi Nijerya se te dezyèm peyi ki te atenn 100 000 pwoklamatè.

Nan ane ki te vin apre a, kantite pwoklamatè nan peyi Brezil ak nan peyi Almay te depase 100 000. Kalite akwasman sa a montre verite ki nan Bib la te rive touche anpil moun.

Kantite moun ki aksepte bon nouvèl konsènan Wayòm nan kontinye ap ogmante sou tout tè a. Sa te verifye sa Bib la te anonse alavans. Men sa l te di: “Sa ki pa anpil la ap tounen 1 000 E sa ki toupiti a ap tounen yon gwo nasyon. Mwen menm, Jewova, m ap akselere travay sa a nan lè l gen pou l fèt la.” — Ezayi 60:22.

Rapò pou ane sèvis 2014 la montre gen 24 peyi ki atenn plis pase 100 000 pwoklamatè. Pami peyi sa yo, gen Venezyela ki te atenn chif sa a nan ane 2007. Gen anviwon 8 201 545 pwoklamatè nan 115 416 kongregasyon Temwen Jewova yo genyen nan lemonnantye.