Plizyè milye moun ki te vin nan ekspozisyon entènasyonal ki te fèt nan vil Rouwen an an 2014, nan nò peyi Lafrans, te wè yon stann ki te kapte atansyon yo e ki te met aksan sou tèm sa a: “Labib: Yè, jodi a ak demen.”

Deyò stann nan te gen plizyè ekran ki t ap pase yon ti videyo sou maniskri yo te konn itilize nan tan lontan yo e ekran sa yo te atire anpil vizitè. Anndan stann nan vizitè yo te ka jwenn enfòmasyon sou kèk konsèy pratik ki gen nan Bib la, fason li egzak nan domèn istorik ak nan domèn syantifik, e jan li se yon liv yo pibliye anpil.

Mete sou sa, ekspozisyon an te montre jan yo pa t ka rive detwi Labib nan syèk ki te pase yo e l te montre plizyè milya moun ka li Labib swa sou papye swa sou fòma elektwonik. Vizitè yo te jwenn yon bib Tradiksyon monn nouvo a gratis, se Temwen Jewova yo ki pibliye Bib sa a nan plis pase 120 lang.

Anpil vizitè te di jan yo apresye inisyativ Temwen Jewova yo pran pou yo met Labib disponib pou piblik la. Men sa yon moun k ap travay ak jèn adolesan e ki te ansanm ak yon gwoup jèn fè konnen: “Labib se yon liv tout moun kapab genyen. Se yon liv ki vivan. Chak fwa mwen li l, mwen jwenn solisyon pwoblèm mwen yo.”

Gen yon granmè ki gen 60 an ki te sezi aprann li ka gen yon bib gratis. Men sa l te di: “Nou tout dwe rekòmanse li l ankò, paske n bezwen sa.”