Nan lanmè ki rele Lanmè Nò a, toupre kot lwès eta Schleswig-Holstein nan peyi Almay, gen anviwon 300 moun k ap viv sou yon seri ti zile ki gaye ki rele Halligen. Ki jan moun sa yo fè rive tande mesaj ki nan Bib la Temwen Jewova yo ap preche a? — Matye 24:14.

Temwen Jewova yo pran bato pou y al sou kèk nan ti zile sa yo. Men, pou yo kontakte moun k ap viv sou lòt ti zile yo, gen yon ti gwoup Temwen ki itilize yon lòt metòd: yo mache anviwon senk kilomèt nan mitan lanmè. Ki jan sa fè posib?

Sekrè a se lè lanmè a bese. Pandan anviwon sizèdtan, lanmè yo rele Lanmè Nò a, nan zòn Halligen, konn monte oswa bese anviwon twa mèt (10 pye)! Lè l bese konsa, gen yon bon pati anba lanmè a ki parèt, sa ki pèmèt Temwen yo al nan twa nan ti zile yo apye.

Ki jan vwayaj sa a rive fèt? Men sa Ulrich, yon gid ki gen anpil eksperyans ki t ap dirije gwoup la, fè konnen: “Sa pran anviwon dezèdtan pou n rive nan youn nan Halligen yo. Nou fè pifò vwayaj la pye atè. Se fason ki pi bon e ki pi konfòtab pou n travèse mitan lanmè a. Lè l fè frèt, nou mete bòt nan pye nou.”

Sa ka parèt etranj. Men sa Ulrich di: “Ou ka gen enpresyon w ap mache sou yon lòt planèt. Gen pati nan fon lanmè a ki plen labou, gen lòt pati ki chaje ak tèt wòch, e gen lòt pati ankò ki kouvri ak zèb lanmè. Ou wè yon pakèt zwazo ki viv bò lanmè, ou wè krab ak lòt bèt ankò.” Pafwa, gwoup la oblije travèse yon seri pas dlo ki rele Priele ann alman ki nan ma labou yo.

Moun ki fè vwayaj la konn jwenn anpil pwoblèm. Men sa Ulrich fè konnen: “Ou ka pèdi byen fasil, sitou lè gen bwouya. Se sa k fè nou sèvi ak yon bousòl ak yon aparèy GPS e nou suiv yon orè ki strik pou lanmè a pa anvayi nou.”

Èske sa vo lapèn pou yo fè tout efò sa yo? Ulrich te rakonte istwa yon mesye ki gen plis pase 90 an ki konn li Toudegad ak Reveye n! regilyèman. Men sa l te di: “Yon jou, nou pa t gen ase tan pou n vizite mesye sa a. Anvan n te retounen, mesye a te vin dèyè nou sou bisiklèt li, epi li di n: ‘Nou pap ban m Toudegad pa m nan?’ Anfèt, nou te kontan ba li l.”