Sa pa gen twò lontan, nan Kwins, nan Nouyòk, 23 Temwen Jewova te suiv yon kou pou yo aprann pale epi li bengali, yon lang yo pale nan peyi Bengladèch ak kèk kote nan peyi End. Yo te suiv yon kou lang kote gen lòt Temwen Jewova ki t ap montre yo ki jan pou yo pale Bengali byen rapid.

Kou yo te fè pou lang bengali a te sanble ak anpil lòt kou lang yo te fè nan peyi Etazini ak lòt peyi. Moun k al asiste kou sa yo fè sa nan objektif pou yo ka pataje mesaj ki nan Bib la ak moun ki pale lòt lang.

Men sa Magaly, youn nan sè ki te suiv kou lang bengali a, te esplike: “Kontinye vin gen pi plis moun ki pale lang bengali nan zòn nou an. Moun yo ap chèche repons yon seri kesyon enpòtan tankou: Poukisa gen anpil soufrans konsa? Lè m pale ak moun yo konsènan bèl pwomès Jewova fè pou lavni, yo vle konn plis toujou. Men, lang nan toujou yon obstak pou mwen.”

Pou enstriktè yo ede elèv yo aprann lang nan pi vit, yo te itilize yon seri metòd ansèyman ki bay kè kontan. Gen youn nan metòd yo kote yo fè elèv yo fè kèk mouvman toutpandan y ap aprann, konsa, elèv yo rive sonje sa y ap aprann yo.

Apre chak klas, elèv yo te itilize sa yo te aprann nan lè yo vizite moun ki pale bengali e yo envite yo pale sou kèk sijè ki nan Bib la. Magaly te di: “Moun yo te kontan e yo te vle konnen poukisa m ap aprann pale lang yo a. Lefètke m te pran tan pou m aprann lang yo a, sa te ede yo wè jan mesaj nou an enpòtan.”

Temwen Jewova yo pa sèlman aprann lang etranje, men yo jwenn fòmasyon pou yo anseye lang sa yo. Nan sèlman tèritwa ki sou responsablite filyal peyi Etazini an, soti janvye 2006 rive janvye 2012, yo te fè fòmasyon pou 2 244 enstriktè nan 38 seminè kou lang yo te òganize yo. Rive 1^ye septanm 2012, Temwen Jewova yo te òganize plis pase 1 500 klas pou anseye 37 lang nan tèritwa ki sou responsablite filyal peyi Etazini an.