Maud ap viv nan peyi Lafrans, li travay nan yon lekòl e travay li se ede kèk timoun ki andikape pandan y ap suiv kou yo. Sa pa gen lontan, yo t ap anseye elèv yo sou Olokos la ak sou kan konsantrasyon Nazi yo te fè yo. Prizonye nan kan an te dwe gen yon moso twal ki gen koulè sou inifòm yo. Koulè moso twal la ak fòm li te fè konnen rezon ki fè moun sa a te nan kan an.

 Lè Pwofesè a t ap esplike elèv yo rezon ki fè gen prizonye ki te gen yon triyang mov sou rad yo, li te di: “M panse se paske yo te omoseksyèl.” Apre kou a, Maud t al pale ak pwofesè a e li te esplike l Nazi yo te sèvi ak yon triyang mov pou yo idantifye Temwen Jewova yo a. Maud te ofri l pou l pote kèk dokiman sou sijè a pou li. Pwofesè a te aksepte òf la e li te mande Maud pou l pataje enfòmasyon an ak elèv yo.

 Gen yo lòt pwofesè nan yon lòt klas ki t ap pale sou menm sijè a, li te sèvi ak yon tablo pou l montre sa diferan fòm moso twal yo te vle di. Tablo a te kòrèk, li te montre triyang mov yo se te pou idantifye Temwen Jewova yo. Apre klas la, Maud te mande pwofesè a èske l ka pataje kèk enfòmasyon avè l sou sijè a. Pwofesè a te aksepte e li te fè aranjman pou Maud pale ak elèv yo.

 Maud te prepare yon prezantasyon 15 minit pou premye klas la, lè lè a te rive, pwofesè a te di l: “Ou ka pale pou inèdtan.” Maud te kòmanse ak yon videyo ki pale sou fason Nazi yo te konn pèsekite Temwen Jewova yo. Lè videyo a te fè konnen Nazi yo te pran 800 timoun ki Temwen Jewova kay paran yo, Maud te kanpe videyo a e li te li eksperyans twa nan timoun sa yo. Lè videyo a te fini, Maud te li yon lèt yon jèn Temwen ki rele Gerhard Steinacher te ekri an 1940. Nan lèt sa a, jèn frè sa a ki te gen 19 an te di paran l orevwa paske Nazi yo te gen pou touye l kèk èdtan annapre b.

 Maud te fè menm prezantasyon an pou dezyèm klas la. Grasa kran Maud te demontre, kounye a toule de pwofesè sa yo pale de Temwen Jewova yo lè y ap anseye elèv yo sou moun ki te viktim nan kan konsantrasyon Nazi yo.