Mwen te grandi nan yon zòn byen kalm ki gen anpil pyebwa andeyò vil Tampere, nan peyi Fenlann. Fanmi mwen pa t twò enterese nan relijyon men yo te bay edikasyon ak bòn manyè anpil valè. Manman m fèt nan peyi Almay donk, lè m te piti, m te konn al pase vakans ann Almay delès lakay gran paran m yo.

 M te renmen spò depi m te toupiti. Lè m te piti, m te pratike tout kalite spò men, lè m te vin gen 14 an m te chwazi konsantre sou spò tenis la pito. Lè m te vin gen 16 an, m te antrene de a twa fwa pa jou, sa vle di m te gen de antrènman pwofesyonèl nan jounen an e apre m te antrene poukont mwen nan aswè. Se tout fasèt nan spò sa a ki te vrèman atire m; tenis te ban m okazyon pou m teste tèt mwen mantalman e fizikman. Byenke tanzantan m te byen renmen bwè yon byè ak zanmi m yo epi pase tan avèk yo, m pa t janm tonbe nan pwoblèm dwòg oswa nan pwoblèm alkòl. Tout lavi m te konsantre sou tenis, se li ki te gen plis enpòtans nan vi m.

 Mwen te kòmanse patisipe nan chanpyona tenis pwofesyonèl ATP yo lè m te gen 17 an. a Lefètke mwen te genyen kèk nan chanpyona pwofesyonèl sa yo, tout moun nan peyi a te vin konnen m. Lè m te gen 22 an, m te fè pati 50 pi gwo jwè tenis nan monn nan.

 Pandan plizyè ane, m te vwayaje nan lemonnantye pou m jwe tenis antanke pwofesyonèl. Mwen te vizite plizyè bèl kote nan monn nan men sa te tou fè m pran konsyans pwoblèm ki gen nan monn nan, tankou krim, dwòg moun yo pran ak pwoblèm anviwònman. Pa egzanp, lè n te Ozetazini, gen katye yo te mande n pou n pa vizite nan kèk vil nou te pase paske nivo krim yo wo anpil nan katye sa yo. Tout bagay sa yo te kontrarye m anpil. Men sa k te pi di a, se lè nan fen jounen an, m pa t santi lavi m gen sans menm lè m t ap fè yon bagay mwen renmen.

 Mennaj mwen, Sanna, te kòmanse yon etid Labib ak Temwen Jewova yo. Sa te fè m sezi lefètke l te vle konn plis sou zafè relijyon men, m pa t gen pwoblèm ak sa. Nou te marye an 1990 e li te vin batize antanke Temwen Jewova yon ane apre. Byenke m te toujou panse Bondye egziste, m pa t twò vle rantre nan yon relijyon. M sonje granmè m ann Almay te renmen li Labib toutan e l te menm aprann mwen ki jan pou m priye.

 Yon jou, lè Sanna avè m t al lakay yon koup Temwen, mari a ki te rele Kari, te montre m nan Bib la pwofesi ki gen rapò ak “dènye jou yo” (2 Timote 3:1-5). Sa te vrèman enpresyone m paske m te vin reyalize se rezon sa a ki fè bagay yo tèt anba konsa nan monn nan. Jou sa a, nou pa t pale twòp pase sa sou relijyon. Men, depi lè a, m te kontinye pale avèk Kari sou Bib la e tout sa m te aprann yo te fè sans. Etandone m te vrèman okipe akoz deplasman m te toujou ap fè yo, li te difisil pou n te chita ansanm regilyèman men, Kari pa t dekouraje. Li te konn ekri m yon seri lèt pou l reponn kesyon m te poze pandan etid la. Bib la te ban m repons tout kesyon enpòtan ki gen nan lavi a yon fason ki lojik, e tikras pa tikras, m te vin konprann Bib la pale prensipalman sou Wayòm Bondye a ki pral reyalize objektif Bondye gen pou tè a. Lè m te vin aprann konnen Jewova se non Bondye, e lè m te vin konprann tout sa li fè pou nou yo, sa te fè yon gwo enpresyon sou mwen (Sòm 83:18). Sa ki te plis touche m se ranson an, dispozisyon sa a Jewova pran an ki pa t yon senp pwoblèm teknik pou l rezoud sèlman oswa yon senp aranjman legal pou regle kesyon an men, yon dispozisyon ki montre aklè jan li renmen nou (Jan 3:16). M te aprann tou posiblite m genyen pou m vin zanmi Bondye e pou m viv pou toutan nan lapè nan yon paradi (Jak 4:8). M te kòmanse mande tèt mwen ki jan m te ka montre mwen rekonesan pou sa?

 M te pran tan pou m byen analize lavi m. Bib la t ap aprann mwen nou jwenn vrè kè kontan an lè n bay, e se konsa m te vin anvi pataje kwayans mwen yo ak lòt moun (Travay 20:35). Antanke jwè pwofesyonèl, m te deplase souvan pou m al nan chanpyona yo, sa ki fè m pa t avèk fanmi m pandan 200 jou nan yon ane. Tout lavi manm fanmi an te konsantre sou pwòp aktivite pa m, sou antrènman m, sou aktivite m yo ak karyè m. M te vin reyalize sitiyasyon an te dwe chanje.

 M te konnen moun pa t ap konprann ditou rezon ki fè m te abandone yon bèl karyè nan spò pou m antre nan yon relijyon. Desizyon an te fasil pou mwen paske m te gen opòtinite pou m vin konn Jewova pi byen ak posiblite pou m jwenn lavi pou toutan an, sa ki gen plis valè lontan pase kèlkeswa pri m te ka genyen nan jwe tenis. M te pran detèminasyon pou m pa bay sa moun ap di yo okenn enpòtans paske se te pwòp desizyon pa m. Yon vèsè ki te ede m kenbe tennfas devan presyon moun yo t ap fè a se Sòm 118:6 ki di: “Jewova avè m, mwen pap pè. Ki sa lòm ka fè m?”

 Nan epòk sa a, konpayi yo te fè bèl aranjman avè m pou kòb, sa ki t ap pèmèt mwen jwe tenis antanke pwofesyonèl pandan anpil ane, san kè sote. Men, m te gentan pran desizyon m, donk, m pa t aksepte òf yo te fè m nan e finalman m te sispann jwe nan chanpyona ATP yo. M te kontinye etid biblik mwen an epi, nan dat 2 jiyè 1994, m te batize antanke Temwen Jewova.

 Nan ka pa m, se pa yon evènman grav nan lavi m ki te fè m panse ak Bondye. E, m pa konsidere tèt mwen kòm yon moun ki t ap chèche laverite. M te panse m t ap viv byen e m pa t ka mande plis. Men, sanzatann, m vin dekouvri lavi a gen plis pase sa, kòmsi laverite t ap tann mwen dekouvri l, e se konsa lavi m te vin pi bèl pase sa m te ka imajine! Fanmi m pi djanm e li gen plis tèt ansanm pase jan l te ye a. Mwen kontan anpil dèske twa pitit gason m yo suiv chemen m pran an, pa antanke spòtif, men antanke kretyen.

 M toujou renmen jwe tenis. Pandan ane yo t ap pase, m vin ap travay nan aktivite ki gen rapò ak tenis, antanke antrenè epi kòm manadjè yon sant spòtif kote yo jwe tenis. Lavi m pa konsantre sou spò ankò. Anvan sa, se pandan plizyè èdtan m te konn antrene m chak semèn, pou m ka vin pi fò e pou m ka vin yon chanpyon. Jodi a, m travay nan predikasyon an aplentan, e m kontan sèvi ak tan m pou m ede lòt moun aprann prensip ki nan Bib la, ki te chanje lavi m, e pou m ede yo mete prensip sa yo an pratik. Pi gwo kè kontan m jwenn se lè m bay relasyon m gen avèk Jewova Dye premye plas nan lavi m e lè m pataje ak lòt moun espwa m genyen nan yon pi bèl avni. — 1 Timote 6:19.