Yon jou, yon Temwen Jewova ki rele Eliso t ap etidye Labib avèk yon dam lakay li. Sanzatann, dam nan te resevwa de vizitè, yon chèf relijye ak madanm li. Eliso te aprann sa fè sèlman de semèn depi sèl pitit gason yo te genyen an te vin malad e l te mouri.

 Lè Eliso te swete chèf relijye a ak madanm li kondoleyans, yo te kòmanse kriye anpil. Apre sa, pandan l tou fache, men sa chèf relijye a di: “M pa konprann poukisa Bondye fè m sibi yon gwo eprèv konsa! Ki jan l fè pran sèl pitit gason m nan? M gen 28 an depi m ap sèvi l, m fè anpil byen e se sa l fè m! Poukisa Bondye pran pitit gason m nan?”

 Eliso te esplike yo Bondye pa t pran pitit gason yo a. Epitou, li te pale avèk yo sou ranson an, sou rezirèksyon an ak sou rezon ki fè Bondye pèmèt move bagay rive. Chèf relijye a ak madanm li te di Eliso li te fè yo jwenn repons priyè yo, paske yo te konn ap priye Bondye sou kesyon sa yo.

 Nan semèn apre a, chèf relijye a ak madanm li te retounen lakay dam nan pou yo te ka suiv etid la. Eliso t ap pale sou chapit ki gen tit: “Yon espwa reyèl pou moun pa nou yo ki mouri,” nan liv Ki sa Labib anseye toutbonvre? a. Chèf relijye a ak madanm li te kontan patisipe nan etid la.

 Yon ti tan annapre, yo toude te asiste kongrè espesyal Temwen Jewova yo ki te fèt nan vil Tbilisi, nan peyi Jeyòji. Sa te vrèman touche yo pou yo wè gwo lanmou ak tèt ansanm ki genyen nan mitan frè ak sè yo. Chèf relijye a ak madanm li te konn ankouraje manm legliz yo a pou yo gen menm kalite sa yo tou, men yo pa t reyisi fè sa.