Gen yon sè ki rele Yanmei k ap viv ann Azi ki te ofri yon dam avèg ki rele Mingjie pou l ede l travèse lari a a. Mingjie te reponn: “Mèsi, m swete Bondye beni w!” Apre sa, Yanmei te mande Mingjie si l ta renmen yo rankontre pou yo pale sou Bib la ansanm. Annapre, Mingjie te di l se chak jou li t ap priye pou Bondye fè l jwenn vrè kongregasyon an. Poukisa se sa l te konn mande Bondye?

 Mingjie te esplike l an 2008 li te aksepte envitasyon yon zanmi l te fè l pou l al nan yon legliz ki pou moun ki andikape. Apre Mingjie te fin koute prèch la, li te mande prèt la nan ki liv li te jwenn sa l t ap di yo. Prèt la te di l se nan Bib la, Pawòl Bondye a ki se laverite. Mingjie te vrèman santi l vle li l. Li te jwenn yon Bib an bray chinwa e l te rive fin li tout 32 volim yo nan anviwon sis mwa. Toutpandan Mingjie t ap li Bib la, li te vin rann li kont doktrin Trinite a, yon doktrin yo te pale de li nan legliz li te vizite a, se manti, epitou li te aprann Bondye rele Jewova.

 Avèk letan, Mingjie te vin santi l dekouraje akoz konpòtman moun nan legliz yo. Li te rann li kont yo pa t ap viv ann amoni ak sa li t ap li nan Bib la. Pa egzanp, yo te bay moun avèg yo rès manje ki te rete, alòske yo te bay moun ki wè yo manje yo te fèk prepare. Enjistis sa yo te fè Mingjie mal, donk li te kòmanse chèche yon lòt legliz nan zòn li an. Se pou rezon sa a ki fè Mingjie t ap priye pou Bondye ede l jwenn vrè kongregasyon kretyen an.

 Lefètke Yanmei te janti ak Mingjie, Mingjie te aksepte pou l etidye Labib avè l. Apre sa, Mingjie te asiste premye reyinyon l ak Temwen Jewova yo. Men sa Mingjie di: “M pap janm bliye premye reyinyon m te asiste. Frè ak sè yo te byen resevwa m. Sa te touche m anpil. Menm lè m avèg, m te santi yo gen yon lanmou ki san patipri.”

 Mingjie te pwogrese nan etid li a, e li te kòmanse asiste reyinyon yo regilyèman. Li te sitou renmen chante kantik yo, men li te santi l limite paske yo pa t gen liv kantik la an bray. Donk, avèk èd frè ak sè yo nan kongregasyon an, Mingjie te fè liv kantik pa l. Li te pran 22 èdtan pou l te mete 151 kantik yo an bray! Ann avril 2018, Mingjie te kòmanse patisipe nan travay predikasyon an e li te konn pase anviwon 30 èdtan nan travay predikasyon an chak mwa.

 Pou Yanmei te ka ede Mingjie prepare l pou l batize, li te fè yon anrejistreman ki gen kesyon ak vèsè ki sot nan liv Nou òganize pou nou fè volonte Jewova a. Mingjie te batize an jiyè 2018. Men sa Mingjie di: “Lanmou frè ak sè yo te demontre pou mwen nan kongrè sa a te touche m. Dlo te koule nan je m paske m te resi fè pati kongregasyon Bondye a.” ​(Jan 13:34, 35). Kounye a, Mingjie se yon moun k ap preche bon nouvèl la aplentan paske li vle demontre menm lanmou li te resevwa a.