Yon jou kote te gen gwo van e li te fè frèt, Bòb t ap kondui a yon vitès 100 kilomèt alè sou yon wout nan Albèta nan peyi Kanada. Bridsoukou, kawotchou ki sou bò goch nan wou dèyè ti bis li a eklate. Lè sa a, Bòb pa t konprann sa k te pase a, donk li kontinye kondui senk kilomèt ki te rete a pou l rive lakay li.

 Men sa Bòb te ekri nan yon lèt li te voye bay Temwen Jewova nan Sal Wayòm ki nan zòn nan konsènan sa k te rive l annapre: “Gen senk jèn ki avanse machin yo a bò kote machin pa m nan e ki desann vit yo pou fè m konnen kawotchou m nan te eklate. Nou raze nou sou kote wout la epi yo di m y ap chanje kawotchou a pou mwen. M pa t menm konnen si m te gen yon kawotchou derechany ak yon djak. Pandan m te rete sou chèz woulant mwen an akote wout la, yo antre anba bis la pou yo jwenn ni derechany lan ni djak la, e konsa, yo chanje kawotchou a pou mwen. Li te fè frèt anpil e te gen nèj ki t ap tonbe byen fò. Yo te byen abiye, men yo fè travay la pou yo te pèmèt mwen pran wout la ankò. M pa t ap ka fè sa poukont mwen.

 “M ap di senk jèn Temwen ki te ede m yo mèsi. Yo t ap vizite moun yo lakay yo pou preche yo. Jèn sa yo vrèman mete an pratik sa y ap preche a. Pa gen dout nan sa, yo te ede m soti nan yon gwo pwoblèm e m vrèman apresye sa yo te fè pou mwen an. Kiyès ki te konnen si jèn sa yo t ap la pou mwen tankou senk zanj pou vin ede m jou sa a?”