Nou pa evite moun ki deja batize antanke Temwen Jewova men ki gen lontan depi yo pap preche bon nouvèl la e petèt ki menm sispann gen relasyon ak kwayan parèy yo. An reyalite, n ap chèche moun sa yo pou n eseye fè yo retounen vin gen bon relasyon ak Bondye ankò.

 Nou pa eskominye yon moun otomatikman paske li fè yon peche grav. Sepandan, si yon Temwen Jewova batize pran abitid fè bagay ki kontrè ak prensip moral ki nan Bib la epi li pa repanti, n ap evite moun sa a oswa n ap eskominye l. Bib la di nou byen klè: “Retire mechan an nan mitan nou.” — 1 Korentyen 5:13.

 Ki sa k rive lè yon mari eskominye men madanm li ak pitit li toujou rete Temwen Jewova? Li pap kapab gen aktivite espirityèl ak fanmi l ankò, men relasyon l gen ak yo antanke fanmi pap chanje. L ap kontinye gen bon relasyon ak madanm li antanke mari e l ap kontinye mennen yon vi fanmi ki nòmal.

 Moun ki eskominye yo kapab asiste reyinyon nou yo. Si yo vle, yo kapab jwenn konsèy ki baze sou Bib la nan men ansyen yo nan kongregasyon an. Objektif nou se ede yo retounen vin sèvi Jewova ankò. Si yon moun ki eskominye kite move konduit li te genyen an e li montre toutbonvre li vle viv ann amoni ak prensip ki nan Bib la, n ap kontan akeyi moun sa a antanke manm kongregasyon an ankò.