Temwen Jewova yo kontinye resevwa fòmasyon nan tout aspè nan lavi yo antanke kretyen, sa gen ladan l travay predikasyon yo gen pou yo fè a. Travay predikasyon an se yon travay Jezi te bay disip li yo lòd pou yo fè e li gen ladan l preche ak anseye bon nouvèl Wayòm nan (Matye 24:14; 28:19, 20). Nou resevwa fòmasyon sa a nan reyinyon nou yo ki fèt chak semèn, nan asanble ak nan kongrè nou yo ki fèt chak ane. Temwen Jewova ki gen responsablite nan kongregasyon an oswa nan òganizasyon an resevwa plis fòmasyon nan yon seri Lekòl biblik espesyal yo fè.

Nan atik sa a

•  Ki fòmasyon Temwen Jewova yo resevwa?

•  Diferan Lekòl biblik pou Temwen Jewova yo

•  Sou ki sa fòmasyon Temwen yo bay la baze?

•  Èske Temwen Jewova yo oblije peye pou fòmasyon sa yo?

•  Ki byenfè Temwen Jewova yo jwenn grasa fòmasyon yo resevwa a?

 Reyinyon kongregasyon yo. Chak semèn, nou asiste de reyinyon nan lokal kote nou adore Bondye ki rele Sal Wayòm. An jeneral, gen yon reyinyon ki fèt nan mitan semèn e lòt la fèt nan wikenn. Tout moun ka asiste e nou pa fè lakòlèt.

•   Reyinyon ki fèt lasemèn yo. Nou resevwa enstriksyon sou fason pou n fè lekti, konvèsasyon, pale an piblik, preche ak anseye. Yo bay fòmasyon sa yo sou fòm diskou, konvèsasyon, demonstrasyon ak prezantasyon videyo. Fòmasyon sa yo ede n vin pi efikas pou n pataje mesaj ki nan Bib la ak lòt moun e pou n kondui etid biblik ak moun ki enterese. Tout moun ki asiste reyinyon yo jwenn byenfè nan fòmasyon sa a. Anplis de sa, reyinyon sa yo fè lafwa nou nan Bondye, lanmou nou gen pou li ak lanmou nou gen pou kwayan parèy nou yo vin pi fò.

•   Reyinyon ki fèt nan wikenn yo. Reyinyon sa yo gen de pati. Premye pati a se yon diskou biblik ki fèt sitou pou moun ki pa Temwen ki vin asiste. Dezyèm pati a se yon konvèsasyon sou fòm kesyon repons ki fèt sou baz yon atik nan Toudegad a etid. Atik yo pale sou yon seri sijè ak prensip biblik ki ede nou ni nan travay predikasyon an ni nan lavi n ap mennen chak jou.

 Asanble ak kongrè. Chak ane, nou gen twa gwo rasanbleman e gen anpil kongregasyon ki asiste yo. Rasanbleman sa yo baze sou yon tèm nan Bib la e gen diskou, demonstrasyon, entèvyou ak videyo ladan yo. Menm jan ak reyinyon kongregasyon an, asanble yo ak kongrè yo ede n gen plis konesans sou Bib la, yo ede nou preche e anseye bon nouvèl la pi byen. Menm jan ak reyinyon kongregasyon an, tout moun ka asiste yo e nou pa fè lakòlèt.

 Gen kèk Temwen Jewova yo envite nan youn nan Lekòl biblik nou genyen yo pou yo ka resevwa plis fòmasyon. Ki jan Lekòl sa yo rele? Poukisa yo fè yo? Ki kantite tan yo dire e kiyès ki ka al ladan yo?

Lekòl pyonye

•   Poukisa yo fè l: Yo fè l pou yo bay pyonye b yo, moun ki preche aplentan, fòmasyon pou yo vin pi efikas nan travay preche ak anseye a. Nan kou a, yo fè konvèsasyon nan klas, gen demonstrasyon, diskou ak travay an gwoup.

•   Kantite tan sa pran: Sis jou.

•   Kiyès ki ka al ladan l: Yo envite moun ki gen yon ane ap sèvi kòm pyonye pèmanan pou al ladan l. Yo ka envite moun ki pyonye depi lontan e ki gen senkan depi dènye fwa yo te pase Lekòl la pou yo ale ankò.

Lekòl pou evanjelizatè Wayòm nan

•   Poukisa yo fè l: Yo fè l pou yo bay moun ki nan sèvis aplentan ki gen eksperyans plis fòmasyon. Elèv yo amelyore kapasite yo genyen pou yo preche ak anseye, yo etidye yon seri sijè biblik afon. Lè yo fin gradye, yo voye anpil ladan yo nan zòn kote ki bezwen plis moun pou preche.

•   Kantite tan sa pran: De mwa

•   Kiyès ki ka al ladan l: Pyonye ki ranpli kondisyon yo mande yo e ki kapab deplase al preche kèlkeswa kote sa nesesè kapab aplike.

Lekòl pou ansyen yo

•   Poukisa yo fè l: Yo fè l pou ede ansyen yo pi byen ranpli responsablite yo gen nan kongregasyon an, tankou anseye e pran swen twoupo Bondye a. Yo fè l tou pou ede ansyen yo vin gen plis lanmou pou Bondye e pou kwayan parèy yo. — 1 Pyè 5:2, 3.

•   Kantite tan sa pran: Senk jou.

•   Kiyès ki ka al ladan l: Yo envite frè ki fèk nome ansyen ansanm ak frè ki gen eksperyans ki gen senkan depi yo te al ladan l.

Lekòl pou siveyan sikonskripsyon yo ak madanm yo

•   Poukisa yo fè l: Yo fè l pou bay siveyan sikonskripsyon c yo fòmasyon pou yo pi byen ranpli responsablite yo (1 Timote 5:17). Pwogram Lekòl la ede yo menm ak madanm yo vin gen plis konesans sou Bib la.

•   Kantite tan sa pran: Yon mwa.

•   Kiyès ki ka al ladan l: Yo envite nouvo siveyan sikonskripsyon ak madanm yo apre yo fin pase yon ane ap fè travay la. Apre sa, yo envite yo ladan l ankò nan senk an.

Lekòl ministè Wayòm

•   Poukisa yo fè l: Yo fè l pou bay ansyen ak sèvitè ministeryèl d fòmasyon pou yo byen ranpli responsablite yo selon sitiyasyon, tandans ak bezwen kongregasyon yo (2 Timote 3:1). Yo pa fè Lekòl sa a chak ane.

•   Kantite tan sa pran: Li varye, men, souvan li dire yon jou.

•   Kiyès ki ka al ladan l: Siveyan sikonskripsyon, ansyen ak sèvitè ministeryèl

Lekòl pou moun k ap sèvi nan Betèl

•   Poukisa yo fè l: Yo fè l pou ede moun ki nan Betèl e reyisi nan travay y ap fè nan Betèl la, pou yo vin gen plis lanmou pou Bondye e pou lòt moun.

•   Kantite tan sa pran: Senk jou edmi.

•   Kiyès ki ka al ladan l: Nouvo moun ki vin nan Betèl dwe pase ladan l. Yo ka envite moun ki nan Betèl depi kèk tan e ki gentan gen senk an depi dènye fwa yo te pase Lekòl la pou yo ale ankò.

Lekòl Galaad

•   Poukisa yo fè l: Yo fè l pou ede elèv yo vin pi renmen Pawòl Bondye a e pou ede yo aplike sa yo aprann yo (1 Tesalonisyen 2:13). Frè ak sè fidèl sa yo ki pase nan Lekòl Galaad vin pi itil òganizasyon Jewova a e yo pi kalifye pou travay ansèyman biblik k ap fèt sou tout tè a. Apre yo fin gradye, yo ka voye yo al sèvi nan tèritwa oswa nan yon biwo filyal, swa nan peyi yo, swa nan yon lòt peyi.

•   Kantite tan sa pran: Senk mwa.

•   Kiyès ki ka al ladan l: Komite filyal yo chwazi moun k ap sèvi aplentan e yo mande yo aplike. Lekòl sa a fèt nan Sant ansèyman Temwen Jewova yo ki nan Patèsonn, Nouyòk.

Lekòl pou manm Komite filyal yo ak madanm yo

•   Poukisa yo fè l: Yo fè l pou bay manm Komite filyal f yo fòmasyon pou yo kapab sipèvize travay k ap fèt nan biwo filyal yo ak travay Temwen Jewova yo ap fè nan peyi ki sou kont biwo filyal la.

•   Kantite tan sa pran: De mwa.

•   Kiyès ki ka al ladan l: Kolèj santral la envite kèk manm Komite filyal yo chwazi ansanm ak madanm yo pou yo al nan Lekòl la ki fèt nan Sant ansèyman Temwen Jewova yo ki nan Patèsonn, Nouyòk.

 Se sou Bib la fòmasyon Temwen Jewova yo jwenn nan baze. Nou kwè se Bondye ki enspire Bib la e se nan Bib la nou jwenn pi bon enstriksyon pou tout aspè nan lavi yon kretyen. — 2 Timote 3:16, 17.

 Non. Fòmasyon yo gratis. Se grasa ofrann volontè Temwen Jewova yo rive fè tout travay yo. — 2 Korentyen 9:7.