An Armagedón játs an taltal pejextaláb kʼal a Dios ani an éyalchik axi tejéʼ ti tsabál. An éyalchik ani in tolmiwál kʼwajatchik in jekʼomnál a Dios ani in ábatnaxtal (Salmo 2:2). An pejextaláb axi ti Armagedón neʼets kin talabédhaʼ an Eyaltaláb in kʼál an atiklábchik (Daniel 2:44).

 An kaw Armagedón axi jayej u dhúchnal Har–Magedón, expidh juníl i elál ti Biblia, ban libro ti Apocalipsis. Al jun i kʼej kaw, axéʼ xi libro in ulal: «an tsʼalejchik axi tin puwél an tsabál» neʼetschik ka támkuyat «al an púlik pejextaláb in kʼál an Dios axi in kwaʼal más i tsapláb». Axéʼ xi pejextaláb neʼets ka watʼey «juʼtáj ti Hebreo u bijiyáb ti Har–Magedón» (Apocalipsis 16:14, 16).

 ¿Jitaʼ neʼets ka kʼwajiy al an púlik pejextaláb ti Armagedón? Neʼets ka tólmixin an ángeles axi kʼwajat ti éb, axi kʼwajat abatnadh kʼal a Jesucristo, játs axi neʼets kin talabédhaʼ jitaʼ in pojkál a Dios (Apocalipsis 19:11-16, 19-21). Axi neʼets ka talabedháj, játs jitaʼ in jekʼomnál a Dios ani jitaʼ in pojkál in ábatnaxtal (Ezequiel 39:7).

 ¿Walám kʼwajatits bíjidh juʼtáj ti neʼets ka wáʼtsin axéʼ xi púlik pejextaláb tejéʼ ti tsabál? Imbáj. Axéʼ xi pejextaláb neʼets ka kʼwajiy tin puwél an tsabál, axéʼ xi pejextaláb yab tokot neʼets ka wáʼtsin al jun i kwenchaláb (Jeremías 25:32-34; Ezequiel 39:17-20).

 An kaw Armagedón (ti hebreo, Har Meghiddóhn) in léʼ kin uluw «Bólchal Meguidó». Meguidó pelak jun i bichow juʼtáj u kʼwajílak ti biyál an israelitas. Tanáʼ ti biyál u waʼtsinalák i pextaláb, juʼtáj tokot u jilkʼonál jitaʼ in atál. An Biblia in tʼilál junchik kʼal nixéʼ (Jueces 5:19, 20; 2 Reyes 9:27; 23:29). Pero, Armagedón yab in léʼ kin uluw abal watʼey tanáʼ an pejextaláb ti Meguidó, kom tanáʼ yab waʼats ni jun i bólchal. Ani ti joʼchal Jezreel, axi kʼwajat ti Meguidó, yab neʼets ka exey patal axi neʼets kin tomólnaʼ a Dios. An chubaxtaláb, Armagedón játs juʼtáj neʼets ka tamkun an atiklábchik ani an éyalchik abal kin tomólnaʼ in Éyaltal a Dios.

 ¿Jantʼoj neʼets ka watʼey kʼal an púlik pejextaláb axi in bij Armagedón? Yab i exlál jantʼiniʼ ti neʼets kin éyendhaʼ a Dios in tsap, pero i lej belál abal neʼets kin tʼajaʼ jayétsekʼij jantʼiniʼ ti biyál, neʼets kin éyendhaʼ: i áb tʼujuw, neʼets ka tʼeleláts an tsabál, i pulik ukʼeltaláb, ne’ets kin aba’ i kʼamal ani azufre ani i ley ani yawláts axi dhaʼux (Job 38:22, 23; Ezequiel 38:19, 22; Habacuc 3:10, 11; Zacarías 14:12). Kom yab neʼets kin exlaʼ jantʼoj kʼwajat ti watʼel, an pójkaxchik neʼets ka tsemdháxin. Tin taltal neʼetschik kin exlaʼ abal pel a Dios axi u pejéx kʼal jajáʼchik (Ezequiel 38:21, 23; Zacarías 14:13).

 ¿Walám a Armagedón neʼets kin talabédhaʼ patal an kʼwajiltaláb? An Tsabál yab neʼets ka talabedháj ti Armagedón. An Tsabál tsʼejkáj abal an atiklábchik ka kʼwajiy abal etsʼey (Salmo 37:29; 96:10; Eclesiastés 1:4). Jaxtám, an Armagedón yab neʼets kin talabédhaʼ patal. An Armagedón neʼets kin tʼajaʼ abal «jun i púlik mukeʼ» axi pútudh in tʼojnálil a Dios ka kʼalej kʼanidh (Apocalipsis 7:9, 14; Salmo 37:34).

 Pero ¿yab in olnál an Biblia abal ti Armagedón neʼets ka taley «patal axéʼ xi xeʼtsintaláb»? Chubax abal talchik i versículos in eyendhál kaw kʼwajiltaláb abal ka káwin tin kwéntaj an tsabál. Jayej an Biblia in eyendhál axéʼ xi kaw abal kin tʼilaʼ an atiklábchik axi kʼwajat in tomolnál a Dios (1 Juan 2:15-17). Axéʼ in léʼ kin uluw abal an Armagedón neʼets kin talabédhaʼ «patal an atiklábchik axi pójkax» (Mateo 24:3, Biblia de Jerusalén).

 ¿Jaykʼiʼ neʼets ka tújey an púlik pejextaláb kʼal a Armagedón? Tam ti káwin kʼal «an púlik yajchiktaláb» axi neʼets kin tujchij kʼal an púlik pejextaláb ti Armagedón, a Jesús in uluw: «Ni jitaʼ tam inik yab in tsoʼob an hora, ni an ángelchik ti éb, ni nanáʼits tin Tsakámil a Dios yab u tsoʼob, expidh in tsoʼob u Tatáj ti éb» (Mateo 24:21, 36). Pero an Biblia in ulal abal Armagedón neʼets ka watʼey al jun i kʼij axi bíjidh abal neʼets ka kʼwajiy a Jesús, axi ujey ti 1914 (Mateo 24:37-39).