Ti biyál, a Jehová in uchaʼ an israelitas abal kwaʼalak kin bínaʼ an diezmo. Axéʼ in léʼ kin uluw abal kwaʼalak kin bínaʼ an diez por ciento a kʼal jawaʼ kin átaʼ tin naktal an támub, abal axéʼ ka éyan abal ka kʼakʼnáj a Jehová. Jajáʼ in uchaʼchik: «Kwaʼal ka bínaʼchik an diez por ciento [o «diezmo», Nueva Reina-Valera] kʼal patal jawaʼ ka tʼayaʼ támub ti támub» (Deuteronomio 14:22).

 An Ley mosaica in ulalak abal kwaʼal ka bináj an diezmo, pel i abatnaxtaláb axi pidhan an israelitas kʼal a Dios. Xowéʼ ta kʼicháj yabáts u kʼwajat al nixéʼ xi abatnaxtaláb, jaxtám yabáts kwaʼal ki bínaʼ an diezmo (Colosenses 2:13, 14). Xowéʼ i tʼajál jawaʼ in ulal an Biblia. Ta kwetémtal ka tʼajaʼ antsanáʼ «jantʼiniʼ ta tsalpayámalits ta ichích, yab kʼal i tsapláb, kom a Dios in kʼanidhál jitaʼ in binál kʼal in kulbétal» (2 Corintios 9:7).

•  Jawaʼ in ulal an Biblia tin kwéntaj an diezmo: an Antiguo Testamento

•  Jawaʼ in ulal an Biblia tin kwéntaj an diezmo: an Antiguo Testamento

 Ti Biblia ban Antiguo Testamento, i elál yaníl an kaw diezmo. Ókʼxidh ka pidhan an abatnaxtaláb a Moisés, i elálits an kaw diezmo. Pero tujchin ka eyendháj más tam ti an israelitas pidhan an abatnaxtaláb.

Ókʼxidh ka pidhan an israelitas an Ley mosaica

 An kʼaʼál atikláb axi in ulal an Biblia abal in bínaʼ an diezmo, pel a Abrán (Abrahán) (Génesis 14:18-20; Hebreos 7:4). Axéʼ pel jun i tsʼejwalixtaláb axi a Abrán in pidhaʼ an tsʼaleʼ ani sacerdote axi ti Salem, al jun a kʼicháj lej exbadh. An Biblia yab in olnál max a Abrahán o in tsakámil talbél in bínayejchik i diezmo.

 An tsabchíl atikláb axi in ulal an Biblia abal in bínaʼ jun i diezmo pel a Jacob, in momob a Abrahán. A Jacob in uchaʼ a Dios abal max ka lábliyat, neʼetsak kin pidhaʼ «an diez por ciento kʼal patal» jawaʼ kin batsʼuw (Génesis 28:20-22). Talchik i atikláb axi in exobnámal an Biblia, in ulal abal an diezmo axi in bínaʼ a Jacob, pel i koʼnél axi in bínaʼ ti tsʼakchixtaláb. Bélits abal jajáʼ in bínaʼ an diezmo, yab in tʼajaʼ abal in yanél jayej kin bínaʼ.

An Ley mosaica

 An israelitas kwaʼalakchik kin bínaʼ an diezmo, kom antsanáʼ neʼetsakchik kin koʼoy jawaʼ in yéjenchal abal kin kʼakʼnaʼ a Dios.

•   An diezmo u eyendhábak abal ka tólmiyat an atiklábchik axi in eyendhálak in éjatal abal kin tʼójonchij a Dios ani jajáʼchik yab in kwaʼalak i tsabál abal kin tʼáychij. Ejtíl an levitas ani an sacerdotes (Números 18:20, 21). An israelitas in pidhálak an diezmo an levitas ani jajáʼchik in pidhálak «an diez por ciento» kʼal jawaʼ in bátsʼuwal an sacerdotes (Números 18:26-29).

•   Jayej ti támub kwaʼalak ka bináj kʼeʼat i diezmo, axéʼ pel abal ka tólmiyat an levitas ani axi yab i levitas (Deuteronomio 14:22, 23). An israelitas in eyendhálak axéʼ abal kin tʼajaʼ talchik i ájib. Waʼatsak talchik i támub axi bijidhits abal ka eyendháj axéʼ, abal ka tólmiyat an atiklábchik axi lej tsʼejwantal (Deuteronomio 14:28, 29; 26:12).

 ¿Jantʼiniʼ tin exlálakchik abal játs an diezmo? Ti támub, an israelitas in dhayalak diez por ciento kʼal jawaʼ in tʼayalak (Levítico 27:30). Max in léʼchik kin bínaʼ an diezmo kʼal i tumín, tam kwaʼalakchik kin bínaʼ an 20 por ciento (Levítico 27:31). Ani max pel i koʼnél axi neʼets kin bínaʼ, jayej kwaʼalak kin bínaʼ, an «diez por ciento». Axéʼ in léʼ kin uluw, abal kwaʼal kin bínaʼ an diez por ciento kʼal an koʼnél axi in koʼoy ti támub (Levítico 27:32).

 bal an israelitas kin exlaʼchik jawaʼ játs an diezmo, in ájiyalakchik ti diez an koʼnél ani jawaʼ ka jilkʼon játs in binálakchik. An abatnaxtaláb in ulalak abal yab in éjtowalakchik kin tʼajaʼ ti kwéntaj max alwaʼ o yab alwaʼ nixéʼ xi koʼnél ani yab in éjtowalakchik kin jálkʼuy. Jayej yab in éjtowalakchik kin bínaʼ i tumín abal kin jálbiy an diezmo (Levítico 27:32, 33). Pero an diezmo axi u eyendhábak abal ka tʼajan an ájib ti támub, nixéʼ in éjtowalakchik kin jálbiy kʼal i tumín. Axéʼ u lej tolmiyábak an israelitas axi kwaʼalak ka beláts lej ow abal ka ulits kʼal an ájib (Deuteronomio 14:25, 26).

 ¿Jaykʼiʼ ti kwaʼalak kin bínaʼ an diezmo an israelitas? Kwaʼalakchik kin bínaʼ támub ti támub (Deuteronomio 14:22). Pero tam kin bajuw buk i támub lej juníts. An israelitas u koyolak ani yab in tʼójonchalak an tsabál (Levítico 25:4, 5). Al axéʼ xi támub lej exbadh yab u konoyábak an diezmo. Ban oxchíl ani ban akak i támub al axéʼ xi buk i támub, an israelitas in pidhálakchik an tsabchíl diezmo an levitas ani axi tsʼejwantal (Deuteronomio 14:28, 29).

 ¿Jantʼoj u tʼajchinalak jitaʼ yab kin bínaʼ an diezmo? An abatnaxtaláb axi pidhan a Moisés, yab i in ulalak jantʼoj kwaʼal ka tʼajchin jitaʼ yab kin bínaʼ an diezmo. An israelitas kwaʼalak kin putuw kʼal axéʼ xi abatnaxtaláb. An israelitas kwaʼalak kin tejwamédhaʼ tin tamét a Dios abal in putuwamal kʼal in uchbíl ani tam kin konchalakchik abal ka lábliyal (Deuteronomio 26:12-15). Abal a Dios jitaʼ yab kin jálbiy an diezmo pel ejtíl max kʼwájatak ti kweʼchinal Jajáʼ (Malaquías 3:8, 9).

 ¿Pelak jun i kitaláb ka konchin an israelitas an diezmo? Imbáj. A Jehová in uchaʼ an israelitas abal max jajáʼchik kin bínaʼ an diezmo, neʼets kin lej lábliychik ani etsʼey neʼets kin koʼoy jawaʼ kin yéjenchij (Malaquías 3:10). Pero tam yab in binálakchik an diezmo, yab in batsʼuwalak i alwaʼtaláb. Yab u labliyábakchik kʼal a Jehová. Ani kom yab in tólmiyalak an sacerdotes ani an levitas, yab in batsʼuwalak i alwataláb kʼal jawaʼ jajáʼchik in tʼajálak (Nehemías 13:10; Malaquías 3:7).

 Tin kʼichájil a Jesús, bélej u konoyábak an diezmo. Pero tam ti jajáʼ in bínaʼ in éjatal, yabáts in yéjenchalak ki bínaʼ.

Tam ti xeʼtsin a Jesús tejéʼ ti tsabál

 An Nuevo Testamento axi kʼwajat ti Biblia, in tejwamedhál abal tam ti xeʼtsin a Jesús tejéʼ ti tsabál, an israelitas bélej in binálakchik an diezmo. A Jesús in exlálak abal pelak jantʼoj axi an israelitas kwaʼal kin bínaʼ. Pero in kʼwiyaʼ jitaʼ in okʼnálchik an belomtaláb kom in ulalakchik abal kwaʼal ka bináj an diezmo. Pero yab in putuwalakchik «kʼal jawaʼ más exbadh. Ejtíl kin tejwamédhaʼ i bolidhtaláb, kin yajnanchij axi kʼeʼat ani ka kʼwajiychik pútudh» (Mateo 23:23).

Talbél ti tsemets a Jesús

 Tam ti a Jesús in bínaʼ in éjatal. Yabáts in tomnálak ka konoyat an diezmo. Tam ti a Jesús in bínaʼ in éjatal, in tixkʼaʼ an abatnaxtaláb axi pidhan a Moisés «Axéʼ in tejwamedhál abal yabáts kwaʼalak ka bináj an diezmo» (Hebreos 7:5, 18; Efesios 2:13-15; Colosenses 2:13, 14).