An bijláb Miguel o «san Miguel», játs an bijláb kʼal axi tu exlábak a Jesús, okʼxidh ka chich ti Tsabál ani talbél ti wichiy ti éb. a An Biblia in ulal abal a Miguel pejéxin kʼal a Satanás, kom a Satanás in léʼak kin kweʼchij in iniktal a Moisés. Jayej in ulal abal jun i ángel in nenchij jun i kaw a Daniel (Daniel 10:13, 21; Judas 9). A Miguel u pejéx kʼal patal jitaʼ in léʼ kin tomólnaʼ a Jehová. Jaxtám in tomnál ka bíjiyat antsanáʼ, kom an bijláb Miguel in léʼ kin uluw «¿Jitaʼ Játs ejtíl a Dios?» (Daniel 12:1; Revelación [Apocalipsis] 12:7).

 Ki tsuʼuw jaleʼ ti lej belál abal a Jesús játs an arcángel Miguel.

•   A Miguel játs «an arcángel» (Judas 9). An kaw arcángel in léʼ kin uluw «axi in okʼnál an ángeles». Axéʼ xi kaw expidh u tejwamél tsabíl ti Biblia. Al tsablom an versículos expidh u bijiyáb junkats i arcángel, axéʼ in tejwamedhál abal expidh junkats i ángel u bijiyáb ti arcángel. Jun i versículo in ulal abal «a Jesús neʼets ka paʼiy ti éb ani neʼets ka kawin jantʼiniʼ i tsʼalej ángel o arcángel» (1 Tesalonicenses 4:16). Axéʼ xi versículo in tejwamedhál abal a Jesús u kaw ejtíl i arcángel. Jaxtám i éxbayal abal a Jesús pel a Miguel, an arcángel.

•   A Jesús in kwaʼal yan jitaʼ axi in abatnál tiwaʼ ti éb.

  «A Miguel ani kʼal yan i ángeles kʼal axi tu tólmiyab, pejéxin kʼal a Satanás» (Revelación 12:7). A Miguel in kwaʼal yan in éy ti éb. An Biblia in ulal abal pel «jun i príncipe axi in kwaʼal yan in éy» (Daniel 10:13, 21; 12:1). Axéʼ xi bijláb in tejwamedhál abal «játs axi in okʼnál an ángeles tiwaʼ ti eb». Antsanáʼ tin ulal a David Aune, ban Nuevo Testamento.

   Ban Biblia waʼats kʼeʼat i bijláb axi u eyendháb abal ka bíjiyat axéʼ xi ángel, axi in lej kwaʼal in éy. In ulal abal «a Jesús tal al i kʼamal lej tsʼumimíl in tajáx, neʼets ka chích junax kʼal i ángeles axi lej púlik in ey» (2 Tesalonicenses 1:7, 8; Mateo 16:27). Jayej, 1 Pedro 3:21, 22 in ulal «abal kʼadhiyits a Jesucristo ti éb, ani pel an abatnom kʼal patal an ángeles». Yab in tomnál ki tsalpay abal a Miguel ani a Jesús pel tsab i ángeles axi bijiyámejchik kin okʼnaʼchik axi kʼeʼat an ángeles. A Miguel ani a Jesús jayétsej.

•   A Miguel «neʼets ka tejwaméj al jun i kʼicháj tam neʼets ka waʼtsin i yajchiktaláb» (Daniel 12:1). Ban libro in kʼál a Daniel, an kaw «neʼets ka tejwamej» u eyendháb abal tam jun i eyal neʼets kin tujuw kin tʼajaʼ jun i exbadh tʼojláb (Daniel 11:2-4, 21). A Jesucristo, axi jayej u bijiyáb ti «kaw abadh kʼal a Dios», neʼets ka tejwaméj jantʼiniʼ i «tsʼalej» abal kin talabédhaʼ jitaʼchik in tomolnál a Dios ani neʼets kin béletnanchij in bichówil (Revelación 19:11-16). Neʼets kin tʼajaʼ axéʼ, al jun a kʼicháj tam ka waʼtsin i «kʼadhpich yajchiktaláb ejtíl axi yab jaykʼiʼ waʼtsinének» (Mateo 24:21, 42).