¿Chubax wa’ats jun axi u bijiyáb ti Diablo?

KA TʼOJON TI

Jawa’ in ulal an Biblia

Aníts. An Diablo pel jun i ángel axi tujey kin ko’oy i kidháb tsalap ani in jek’ómna’ a Dios. Jajá’ játs an «abatnom k’al an xe’tsintaláb» (Juan 14:30; Efesios 6:11, 12). An Biblia in eyendhál pilchik i kaw abal kin ólna’ jant’ini’ játs in ey axé’ xi pojkax ángel. Ki tsu’uw talchik i t’iplab:

Satanás, in lé’ kin uluw «Tomolnax» (Job 1:6).
Diablo, in lé’ kin uluw «Kawilix» (Revelación [Apocalipsis] 12:9).
Tsan, ti Biblia axé’ xi kaw u eyendháb abal jita’ axi u k’ambix (2 Corintios 11:3).
Jita’ axi in k’wajbál i takaxtaláb (Mateo 4:3).
Janamkaw (Juan 8:44).

An Diablo yab expidh in t’ipoyal an pojkaxtaláb, nibal pel jant’oj axi i neʼdhál ti ál

Wa’ats axi in tsálpayal abal an Diablo expidh in t’ipoyal an pojkaxtaláb o pel jant’oj axi patal wawá’, ma a Dios, i kwa’al ti ál. An Biblia u kaw tin kwéntaj jun a k’icháj, tam ti a Dios t’ilmáts k’al an Diablo. A Dios pel jita’ axi t’okat, jaxtám yab in éjtowal kin ko’oy i pojkaxtaláb tin ichích (Deuteronomio 32:4; Job 2:1-6.) Jun a k’icháj, a Jesús jayej t’ilmáts k’al an Diablo, pero a Jesús jayej pel jita’ axi t’okat (Mateo 4:8-10; 1 Juan 3:5.) An Biblia tu exóbchal abal an Diablo yab expidh in t’ipoyal an pojkaxtaláb, pel jita’ axi chubax ejat.

Wa’ats yan i atikláb axi in tsálpayal abal an Diablo yab ejat, expidh in t’ipoyal an pojkaxtaláb. Yab i jik’pál axé’, kom an Biblia in ulal abal a Satanás in eyendhál i janamtaláb abal kin k’ambiy an atiklábchik. (2 Tesalonicenses 2:9, 10). Jun i janamtaláb axi in lej buk’umal játs kin t’aja’ kin tsalpay an atiklábchik, abal jajá’ yab chubax ejat (2 Corintios 4:4).

Tsalap axi yab tekedh tin kwéntaj an Diablo

Janamtaláb: An Diablo jayej u bijiyáb ti Lucifer.

An chubaxtaláb: An kaw «Lucifer» tal ti Hebreo, ani talchik i biblias in eyendhál, pero axé’ xi kaw in lé’ kin uluw «tajk’anal» (Isaías 14:12). Axé’ xi kaw u tejwamél al jun i k’ej kaw ti Biblia, pero pel abal ka bíjiyat an eyalchik axi ti Babilonia, jajachik ne’etsak ka talabedháj k’al a Dios kom in lej k’adhatnálak tin ba’ (Isaías 14:4, 13-20). Tam ti talabedháj axé’chik xi eyal, an Biblia in uluw abal talabedháj «axi u tajk’nal».

Janamtaláb: An Diablo in t’ojonchal a Dios.

An chubaxtaláb: An Diablo in tomolnál a Dios. Yab pel in t’ojnalil. A Satanás jayej in tomolnál jita’ in t’ojonchal a Dios, jaxtám in odhnál ani in kawíliyal (1 Pedro 5:8; Revelación 12:10).