¿Chubax wa’ats jun i Dios?
Jawa’ in ulal an Biblia
An Biblia tu tejwamédhanchal abal chubax wa’ats jun i Dios. Jayej tu exóbchal abal kwa’al ki éyendha’ i tsalápil abal ki bela’ k’al a Dios ani yab expidh ki bela’ jawa’ jitakits tu ku ólchij (1 Juan 5:20; Romanos 12:1). Ki tsu’uw talchik i tsalap axi in tejwamedhál abal chubax wa’ats jun i Dios.
Patal jawa’ wa’ats k’wajat alwa’ ts’ejkadh ani k’wajat ju’táj tin tomnál, nixé’ in tejwamedhál abal ts’ejkamej k’al jita’. An Biblia in ulal: «Patal an atájchik pel in ts’ejkábil i inik ani patal jawa’ wa’ats ti éb ani ti tsabál pel in ts’ejkábil a Dios» (Hebreos 3:4). Axé’ xi kaw jitakits in éxbayal, ma an atiklábchik axi lej exoblámadh in t’ajamal ti kwéntaj abal játs antsaná’. a
Patal i yéjenchal ki exla’ jale’ tu k’wajat tejé’ ban Tsabál. Max yab ki exla’, tam i ats’ál i yéjenchal jant’oj ti ejatal. Jawa’ i yéjenchal játs ki exla’ a Dios ani ki k’ak’na’ (Mateo 5:3; Revelación [Apocalipsis] 4:11). Axé’ in tejwamedhál abal wa’ats jun i Dios axi tu k’anidhál, axi tu ts’ejka’ k’al an yejenchixtaláb abal ku utey k’al Jajá’ abal antsaná’ ki ats’a’ kulbél (Mateo 4:4).
Yan i k’ej kaw axi k’wajat ti Biblia putun antsaná’ jant’ini’ ti dhuchan, bélits abal putun yan i támub talbél. Putun antsaná’ jant’ini’ ti uluwámej, axé’ in tejwamedhál abal yab pel in tsalápil i inik (2 Pedro 1:21).
Jita’chik in dhucha’ an Biblia pel ejtíl max in exlálakits jawa’ wa’ats ti éb ani ti Tsabál bélits abal yab jita’ in exlálak. Jun i t’iplab, ti biyál yan i atikláb in tsálpayalak abal an Tsabál kitkímtej k’al jun i elefante, jun i jabalí, jun i toro o k’e’at i ko’nél. Pero an Biblia in ulal abal an Tsabál «yab ju’táj ti palat» (Job 26:7). Jayej tu ólchal jant’ini’ játs an Tsabál, tu ólchal abal pel kwechochól jant’ini’ jun i «globo» (Isaías 40:22; Martín Nieto). Yan i atikláb in lej belál abal axé’chik xi dhuchum k’al an Biblia in ejtow kin éxla’chik axé’ kom ólchin k’al a Dios.
An Biblia in tók’tsiyal i konowixtaláb axi in t’ajámalchik i atikláb axi yab in belál k’al a Dios, ejtíl, max a Dios lej alwa’ inik ani tsapik, ¿jale’ tin jilál ka wa’tsin i yajchiktaláb? ¿Jale’ ti an k’ak’naxtaláb in t’ajamal abal ka wa’tsin yan i kidhabtaláb? (Tito 1:16.) An tok’tsixtaláb axi in binál an Biblia in éjtowal ti tólmiy abal ka bela’ k’al a Dios.
a Jun i t’iplab, an astrónomo Allan Sandage in uluw: «Yab u lej belál abal patal jawa’ wa’ats antsanák’ej ti wa’tsin. In ko’oy ka wa’tsin jita’ axi kin t’ojojoy. Yab u exlál max wa’ats jun i Dios, pero jayej yab u exlál max wa’ats jita’ más axi kin ejtow kin ts’ejka’ patal jawa’ wa’ats».
Puede que también le interese
TIN KWÉNTAJ WAWÁ’
U léʼ abal an ólchixchik kʼal a Jehová ti kin tsaʼbiy
¿A léʼ ka exlaʼ más tin kwéntaj an Biblia ani tin kwéntaj an ólchixchik kʼal a Jehová?