Aníts, an Biblia in olnál talchik i t’ipláb jant’ini’ a Dios in ots’owiyal an oláb axi t’ajchin. An Biblia in ulal: «Jajá’ in pidhál jawa’ in yéjenchal k’al jita’ tu belkab ani in ot’sowiyal k’al jita’ tu konchinal i tolmixtaláb ani in k’aniyál» (Salmo 145:19). Pero abal a Dios tu ku tok’tsiy kwa’al ki t’aja’ jant’ini’ jaja’ tin lé’.

Jawa’ a Dios tu konchal

•   Kwa’al ki olonchij expidh a Dios, yab ki olonchij a Jesús, a Maria, an ángeles, nibal an imágenes. An Biblia in ulal abal a Dios pel an «ots’owix k’al an oláb» (Salmo 65:2).

•   Yab ki konoy ti olábil jawa’ a Jehová in ulal ban Biblia abal yab tekedh (1 Juan 5:14).

•   Tam ki ólonchij a Jehová, ki éyendhanchij in bij a Jesús antsaná’ i tejwamedhál abal i pidhál in jalbil an uchbiláb axi in kwa’al. A Jesús in uluw: «Expidh k’al nana’ ne’ets kit ulits k’al u tátaj ti éb» (Juan 14:6).

•   Ka lej béla’ ani max in k’ibchal ka konchij abal ti pidha’ más (Mateo 21:22; Lucas 17:5).

•   Ki ko’oy i tsa’ataláb ani ki ólchij jawa’ i ats’ál ti ichích. An Biblia in ulal: «A Jehová lej púlik in ey pero in t’ajal ti kwéntaj jita’ tsa’at in ey» (Salmo 138:6).

•   Yab ka jila’ tit ól. A Jesús in uluw: «Max ka áynanchij ka konoy, Jaja’ ne’ets ti pidha’» (Lucas 11:9).

Jawa’ a Dios yab in t’ajál ti kwéntaj

•   Jant’ini’ u walkidh nibal i bichówil. «A Dios yab u pok’odh tsu’ux k’al an inikchik, a Dios patal in bats’uwal, jitákitsk’ij tam inik axi k’ak’nax k’al Jaja’ ani in t’ajál alwa’ jant’ini’ in lé’ jaja’» (Hechos 10:34, 35.)

•   Jant’ini’ ku ólon. I éjtowal ki t’aja’ tudhuchik i k’walál, kubat o pak’uch (1 Crónicas 17:16; Nehemías 8:6; Daniel 6:10; Marcos 11:25).

•   Max ku ólon tsapik o kwek’ij. A Dios in ats’ál an oláb axi i t’ajál ma ti lej ichích (Nehemías 2:1-6).

•   Bélits max an t’e’pintaláb axi i kwa’al we’ o lej púlik. An Biblia tu uchal: «Ka t’ajat wat’banchij a Dios, patal an t’e’pintaláb axi a kwa’al ta ichích» (1 Pedro 5:7).