¿In ts’ejka’ a Dios júnkats i ko’nél abal tana’ ka wa’tsin patal axi más?

KA TʼOJON TI

Jawa’ in ulal an Biblia

Imbáj. An Biblia in ulal abal a Dios in ts’ejka’ an k’a’ál atikláb, a ani patal an ko’nél ani an ts’ojól ti júnchik (Génesis 1:12, 21, 25, 27; Apocalipsis 4:11). An Biblia in ulal abal patal an atikláb u tal k’al a Adán ani a Eva (Génesis 3:20; 4:1). An Biblia yab tu exóbchal max a Dios in ts’ejka’ júnkats i ko’nél abal taná’ ka kalej patal axi más. Pero an Biblia yab in ulal jant’oj k’al jawa’ yan i atikláb in t’ajamal ti kwéntaj, abal an ko’nél o jun ts’ojól in éjtowal ka wé’ jalk’un. b

¿Jant’oj in tsálpayal talchik i atikláb?

An kaw evolución teística yab expidh in kwa’al jun i tsalap. An Encyclopædia Britannica, in ulal abal jawa’ in wat’ál an ko’nél ani an ts’ojól pel a Dios axi in t’ajál abal antsaná’ ka wat’ey.

An evolución teística jayej in kwa’al axé’chik xi tsalap:

Patal an ejataláb axi wa’ats xowé’ wa’atsakits ma ti biyál.
Jun i ko’nél o jun i ts’ojól in éjtowal ka jalk’un ma ka wenk’on al k’e’at. Axé’ u bijiyáb ti macroevolución.
Pel a Dios axi in t’ajál abal ka k’ayum jalk’un.

¿Jayetsej tu exóbchal jawa’ in ulal an Biblia k’al jawa’ u tsalpayáb tin kwéntaj an evolución?

Max chubaxak an tsalap tin kwéntaj an evolución teística, tam yab tekedh jawa’ in ulal an libro in k’ál a Génesis abal a Dios in ts’ejka’ patal. Pero a Jesús in uluw abal chubax an t’ilab axi k’wajat ti Génesis (Génesis 1:26, 27; 2:18-24; Mateo 19:4-6). An Biblia in ulal abal a Jesús ok’xidh ka chích tejé’ ti Tsabál, k’wajiy tíwa’ ti éb k’al in tátaj ani in tólmiy kin ts’ejka’ «patal jawa’ wa’ats» (Juan 1:3). Jaxtám, an tsalap abal a Dios in ts’ejka’ júnkats i ko’nél abal taná’ ka kalej patal axi más, yab junat k’al jawa’ in ulal an Biblia.

Tam an ko’nél ani an ts’ojól u wé’ jálk’unalchik, ¿in lé’ kin uluw abal chubax jawa’ u tsalpayáb tin kwéntaj an evolución?

An Biblia yab in olnál jant’oj u wat’el k’al jun i ko’nél, o k’al jun i ts’ojól, ani max in éjtowal ka wé’ jalk’un. Talchik in t’ajamal ti kwéntaj abal jun i ko’nél o jun i ts’ojól in éjtowal ka wé’ jalk’un tam ka yaney. An Biblia yab in ulal max yab awits ka wat’ey axé’. Tam an ko’nélchik ani an ts’ojól ka wé’ jalk’un, talchik in tsálpayal abal nixé’ játs an evolución.

a An Biblia yab in eyendhál an kaw especie kom yab expidh k’wajat ti kaw k’al júnkats i ko’nél, jaxtám in eyendhál an kaw género. Tam junchikíl, an científicos in bíjiyal ti evolución tam jun i ko’nél u wé’ jálkunal. Pero wawá’ i éxbayal abal yab u wa’tsinal pil i ko’nél, expidh u wé’ jálk’unal.

b Tam jun i ko’nél o i ts’ojól u wé’ jálk’unal, u exláb ti microevolución.