Ti Biblia, an kaw alma pel néfesch ti hebreo, ani psykjé ti griego. Ti hebreo, in léʼ kin uluw «ejataláb axi u ixkʼal», ani ti griego in léʼ kin uluw «jun i ejataláb» o «jun i atikláb». a Tam, i éxbayal abal an alma pel jun i ejataláb, pel an atikláb. Yab pel jantʼoj axi i kwaʼal ti ál, axi u kalel ani in áynanchal ejat tam jun i atikláb ka tsemets. Ki tsuʼuw talchik i tʼiplab axi ti Biblia axi neʼets tu ku tólmiy ki exbay axéʼ.

•   A Adán yab pidhan jun i alma, «jajáʼ pelak jun i alma». Tam ti a Jehová in tsʼejkaʼ an kʼaʼál atikláb, a Adán, an Biblia in ulal abal wenkʼon ti jun i ejataláb (Génesis 2:7, Biblia Textual). Axéʼ in tejwamedhál abal a Adán yab pidhan jun i alma, jajáʼ pelak jun i alma, jun i ejataláb.

•   An Biblia in ulal abal jun i ejataláb in éjtowal kin takaʼ jun i tsemélom (Levítico 5:2, Jünemann), ka kʼapúts, (Levítico 7:20, Katznelson), ka tʼojon (Levítico 23:30, Huerin), kin léʼnaʼ kin kʼapuw i tʼuʼlek (Deuteronomio 12:20, Nácar-Colunga, 1974) ani ka bélkaxin (Romanos 13:1, Reina-Valera, 1909). Expidh jun i atikláb in éjtowal kin tʼajaʼ axéʼ.

¿Pel jant’oj axi yab u tsemel?

 Imbáj. An ejataláb u tsemel. Wa’ats talchik i textos ti Biblia, axi in tejwamedhál abal játs antsaná’. Ki tsu’uw talchik i t’iplab.

•   An Biblia in ulal: «An ejataláb axi u wálbinal u tsemel» (Ezequiel 18:4, 20, La Biblia de las Américas).

•   An Biblia in ulal: «An ejataláb axi ka wálbin ne’ets ka talabedháj» o «ka tixk’áj abal ets’ey». Axé’ pel abal kin tejwamédha’ abal max jun i israelita ka jek’ombéj, ne’etsak ka tsemdháj. (Éxodo 12:15, 19; 31:14, Reina-Valera, 1909; Levítico 7:20, 21, 27, Biblia de Ferrara). An Biblia, La Biblia de las familias católicas, in olnál ti Levítico 19:8, jawa’ ne’ets kin wat’a’ jun i atikláb max ka wálbin. In ulal antsanáʼ: «An ejataláb axi ka wálbin ne’ets ka tsemets».

•   Talchik i textos axi ti Biblia in eyendhál an kaw «ejataláb axi tsémenek» abal kin uluw, abal jun i atikláb tsemets (Levítico 21:11; Números 6:6). An Biblia in eyendhál an káw «in iniktal jun i atikláb axi tsémenek» o «jun i atikláb axi tsémenek», pero an kʼaʼál kaw axi eyendháj ti hebreo pel néfesch, axéʼ in léʼ kin uluw «alma».

Alma ani ejataláb

 Ti Biblia, jayej u eyendháb an kaw alma abal ka uluwat ejataláb. Jun i t’iplab, ti Job 33:22 eyendháj an kaw hebreo (néfesch) abal ka uluwat «alma» axi jayej in lé’ kin uluw «ejataláb». Tam jun i atikláb wé’ ka tsemets, an Biblia jayej in eyendhál an kaw, wé’ kin k’iba’ «in ejatal» (Éxodo 4:19; Jueces 9:17; Filipenses 2:30).

 Max ki exbay jant’oj in lé’ kin uluw alma, ne’ets ki ejtow ki exbay alwa’ k’e’at i versículos axi ti Biblia. Jun i t’iplab, ti Génesis 35:18 in ulal abal in ejatal jun i mimláb k’wajatak ti «kalel», o jant’ini’ tin ulal an versión Torres Amat, «k’wajatak ti talél in ejatal». Axé’ in lé’ak kin uluw abal in ejatal an mimláb k’wajatak ti talél. Jaxtám, talchik i biblias in ulal abal an mimláb «k’wajatak ti talél in ixak’» (La Biblia Latinoamérica, 2011).

¿Ju’táj ti tujey axé’ xi exobchixtaláb abal an ejataláb yab u tsemel?

 Axé’ xi exobchixtaláb, axi yan i atikláb in ujnam kin bela’, yab kaldhach ti Biblia. Pel an griegos axi tujey in belál axé’ xi exobchixtaláb. An Diccionario enciclopédico del Cristianismo in ulal: «Axé’ xi exobchixtaláb tin kwéntaj an alma, pel an griegos axi tújeychik in ulal, abal in iniktal jun i atikláb (sōma) lej pilits k’al an alma (psychḗ). Pero an Biblia, in ulal abal in iniktal jun i atikláb ani an alma, jayetsej».

 A Dios yab in lé’ abal ki xaluw jawa’ Jajá’ tu exóbchal k’al jawa’ an atiklábchik in belál, abal an ejataláb yab u tsemel. An Biblia tu uchál: «Ka t’aja’ ti kwéntaj, walám ka wa’tsin jita’ axi kin lé’na’ ti k’ambiy k’al i exobchixtaláb axi yab chubax, kom pel i tsalap axi ti tsabál». (Colosenses 2:8.)