An espíritu santo pel an tsapláb axi in eyendhál a Dios abal kin t’aja’ jant’oj (Miqueas 3:8; Lucas 1:35). Tam a Dios in abál an espíritu santo, in lé’ kin uluw abal in eyendhál abal ka t’ajan in kulbétal (Salmo 104:30; 139:7).

 An kaw axi u eyendháb ti Biblia abal «espíritu» pel rúaj ti hebreo, ani pnéuma ti griego. Axé’ xi tsab i kaw u lej eyendháb abal tam u kaw tin kwéntaj an espíritu santo, an tsapláb in k’ál a Dios (Génesis 1:2). Jayej u eyendháb abal ka uluwat k’e’at jant’oj, ejtíl:

•   Ixk’al ani ejatliy (Habacuc 2:19; Revelación [Apocalipsis]13:15).

•   Ik’ (Génesis 8:1; Juan 3:8).

•   An ixak’ axi tu pidhál an tsapláb abal ku k’wajiy ejat wawá’ ani an ko’nél (Job 34:14, 15).

•   Jant’ini’ u tsalpax jun i atikláb (Números 14:24).

•   Jita’chik u k’wajíl ti éb, ejtíl a Dios ani an ángeles (1 Reyes 22:21; Juan 4:24).

 Patal axé’ yab i tsu’tal, pero i exlál abal taná’ k’wajat ani wa’ats. An espíritu santo «pel ejtíl an ik’, yab tejwa’, yab in kwa’al in iniktal ani lej tsapik» (Diccionario expositivo de palabras del Antiguo y del Nuevo Testamento exhaustivo, de William E. Vine).

 Ti Biblia, an espíritu santo u júmbinal k’al in «k’ubak» o in «ch’uchub» a Dios (Salmo 8:3; 19:1; Lucas 11:20; ka jumbiy k’al Mateo 12:28). Antsaná’ jant’ini’ jun i ts’ejkom pach in eyendhál in k’ubak abal kin ts’ejka’, a Dios in eyendhámal an espíritu santo abal kin ts’ejka’ axé’:

•   Abal kin ts’ejka’ an k’aylál (Salmo 33:6; Isaías 66:1, 2).

•   Abal ka ts’ejkáj an Biblia (2 Pedro 1:20, 21).

•   Abal in t’ojnálil axi ti biyál kin t’aja’ i labidh t’ajbiláb ani ka olnomáts (Lucas 4:18; Hechos 1:8; 1 Corintios 12:4-11).

•   Abal kin tólmiy in t’ojnálil kin t’aja’ tin ejatal jawa’ in exobnál (Gálatas 5:22, 23).

An espíritu santo yab pel jun i atikláb

 Al talchik i pejach, an Biblia in júmbiyal an espíritu santo k’al in «k’ubak», k’al in «ch’uchub» ani k’al in «ixak’» a Dios. Axé’ in tejwamedhál abal espíritu santo yab pel jun i atikláb (Éxodo 15:8, 10). In k’ubak jun i ts’ejkom pach yab u t’ojnal kwetém, in yéjenchal kin eyendha’ patal in iniktal ani in katsin. Antsaná’ jayej, an espíritu santo yab u t’ojnal kwetém, in yéjenchal abatnadh k’al a Jehová (Lucas 11:13). An Biblia jayej in júmbiyal an espíritu santo k’al i ja’, ani in ulal abal k’wajat júnkudh k’al an belomtaláb ani an exlomtaláb. Axé’ jayej in tejwamedhál abal an espíritu santo yab pel jun i atikláb (Isaías 44:3; Hechos 6:5; 2 Corintios 6:6).

 Ti Biblia i elál in bij a Dios, Jehová ani in tsakámil Jesucristo, pero yab i elchal max an espíritu santo in kwa’al jun in bij (Isaías 42:8; Lucas 1:31). Tam ti an aykol Esteban in tsu’uw jun i tsu’bixtaláb yab in tsu’uw ox i atikláb, expidh in tsu’uw tsab. An Biblia in ulal: «A Esteban jun putat ko’onchábej in ichích k’al an espíritu santo. Tokat in met’ál ti éb ani in tsu’chal in lej ts’alát a Dios, jayej in tsu’tal a Jesús kubat tin wínab k’ubak a Dios» (Hechos 7:55). An espíritu santo pel an tsapláb axi in eyendha’ a Dios abal kin tsu’bindha’ a Esteban.

 Jawa’ talchik in belál: An espíritu santo pel jun i atikláb ani ox tin eb. Antsaná’ tin tejwamedhál talchik i Biblia ejtíl an Torres Amat ani an Reina-Valera ti 1 Juan 5:7, 8

 An chubaxtaláb: An versión Torres Amat in ulal ti 1 Juan 5:7, 8: «Wa’ats ox i ólnom ti éb, [...] i Tátaj Dios, [...] axi u bijiyáb ti Kaw, ani [...] an Espíritu Santo, [ani axé’ ox pel junkats tin eb, ani] wa’ats jayej ox i ólnom tejé’ Tsabál». Talchik i atikláb axi exoblámadh in t’ajamal ti kwéntaj abal axé’ xi kaw yab in dhucha’ an abatwálej Juan. Jaxtám yab in tomnál ka k’wajiy ti Biblia. Jun i t’iplab, an biblista Bruce M. Metzger in uluw: «Axé’ xi kaw yab chubax uluwat, jaxtám yab in tomnál ka k’wajiy ban nuevo testamento» (Un comentario textual al nuevo testamento griego).

 Jawa’ talchik in belál: An Biblia u kaw tin kwéntaj an espíritu santo jant’ini’ max pelak jun i atikláb.

 An chubaxtaláb: Tam junchikíl, an Biblia in tejwamedhál an espíritu santo jant’ini’ max pelak jun i atikláb. Jun i t’iplab, a Jesús in uluw abal an espíritu santo pel jun i tólmix (paráclito) axi ne’etsak ka chich, ne’etsak ti kaw, ne’etsak ti ólnom, ne’etsak kin t’aja’ abal ka puwénchat a Jesús ani ma ne’etsak ka pidhan jant’oj k’al a Jesús (Juan 16:7-15). Pero nixé’ yab in lé’ kin uluw abal pel jun i atikláb. Jayetsej in ulal tin kwéntaj an tsalpadhtaláb, an walabtaláb ani an tsemláj (Proverbios 1:20; Romanos 5:17, 21). Ejtíl, an Biblia in ulal abal an tsalpadhtaláb in kwa’al in tsakámil. Ani tin kwéntaj an walabtaláb in ulal abal u k’ambix, u tsémdhom ani u jaylom (Mateo 11:19; Lucas 7:35; Romanos 7:8, 11).

 Jawa’ talchik in belál: Tam jun ka pujan, u pujnal tin bij an espíritu santo, jaxtám ti ulal abal pel jun i atikláb.

 An chubaxtaláb: Ti Biblia, junchikíl u eyendháb an kaw «bijláb» abal ka tejwamedháj abal jun i atikláb pidhnének in éy ani i tsapláb k’al jita’ más (Deuteronomio 18:5, 19-22; Ester 8:10). An atikláb axi u pujnal tin bij an espíritu santo, játs kom in éxbayal abal a Dios in eyendhál axé’ xi tsapláb abal kin putuw in tsálapil (Mateo 28:19).

 Jawa’ talchik in belál: In aykolil a Jesús ani ma in abatwálej in belálak abal an espíritu santo pel jun i atikláb.

 An chubaxtaláb: Yab jita’ in tejwamedhámal abal nixé’ chubax, nibál an Biblia. An Encyclopædia Britannica in ulal abal «axé’ xi exobchixtaláb kaldháj ban tamub 381 talbél k’al a Cristo». Uluwat ban concilio de Constantinopla. Axé’ xi tamkuntaláb t’ajan wat’adh 200 i támub talbél ti tsémenek an abatwálej Juan.