Ti Biblia, yaníl i elál abal a Jesús u bijiyáb tin «tsakámil a Dios» (Juan 1:49). Kʼal axéʼ xi kaw i éxbayal abal a Jesús tsʼejkáj kʼal a Dios, kom Jajáʼ játs axi in binál an ejataláb ani in tsʼejkaʼ patal jawaʼ waʼats (Salmo 36:9; Revelación [Apocalipsis] 4:11). An Biblia yab in ulal abal u bijiyáb a Dios ti Tataláb kom in tʼajaʼ ka waʼtsin a Jesús, antsanáʼ jantʼiniʼ an tatalábchik in koʼoyal in tsakámil.

 An Biblia jayej in ulal abal an ángeles, «pel in tsakámil a Dios» (Job 1:6). Ani in ulal abal an kʼaʼál inik, a Adán, jayej pelak in «tsakámil a Dios» (Lucas 3:38). An Biblia in ulal abal a Dios kwetém in tsʼejkaʼ a Jesús ani játs an kʼaʼál axi in tsʼejkaʼ, jaxtám a Jesús játs an tsakam axi más exbadh.

•  ¿Kʼwajiy a Jesús ti éb okʼxidh ka chich ti Tsabál?

•  ¿Jantʼoj in tʼajálak a Jesús ti éb, okʼxidh ka chich tejéʼ Tsabál?

 Aníts. Okʼxidh ka chich ti Tsabál, pelak jun i ángel tiwaʼ ti éb. Ma jajáʼ in uluw: «In tal ti eb» (Juan 6:38; 8:23).

 A Jesús játs axi kʼaʼál tsʼejkáj. Jaxtám an Biblia in ulal axéʼ:

•   A Jesús «játs an kʼaʼál axi tsʼejkaj kʼal patal jawaʼ waʼats» (Colosenses 1:15).

•   A Jesús játs axi okʼox tsʼejkáj kʼal a Dios (Revelación 3:14).

 Kʼal a Jesús putun an kaw axi in ulal abal jajáʼ kʼwajatakits ma ti biyál, okʼxidh ka tsʼejkáj patal jawaʼ waʼats (Miqueas 5:2; Mateo 2:4-6).

 In kwaʼalak jun in uchbíl lej exbadh tiwaʼ ti éb. Antsanáʼ in tejwamedhál jawaʼ in uluw a Jesús: «Tátaj ti éb, ti kin tʼojojonchij tiwaʼ ti éb [...] abal kin púwedhanchat u bij, juníl ejtíl tin puwedhanchámej u bij ti jaykʼiʼ, tam ti yabayej tsʼejkámej an éb ani an Tsabál ani patal jawaʼ waʼats» (Juan 17:5).

 In tólmiy in Tátaj abal kin tsʼejkaʼ patal jawaʼ waʼats. A Jesús tʼojon junkudh kʼal a Dios «jantʼiniʼ i tólmix tsʼejkom» (Proverbios 8:30). An Biblia in ulal abal a Jesús tólmixin «kin tsʼejkaʼ patal jawaʼ waʼats ti éb ani ti Tsabál» (Colosenses 1:16).

 A Dios in eyendhaʼ a Jesús abal kin tsʼejka ti éb i ángeles ani patal jawaʼ waʼats ti Tsabál (Revelación 5:11). An tʼojláb axi in tʼajaʼ a Jehová ani a Jesús pel ejtíl axi in tʼajál jun i atikláb axi in okʼnál jun i tʼojláb ani an tsʼejkom. Jitaʼ in okʼnál an tʼojláb játs in ulal jantʼiniʼ ti kwaʼal ka tsʼejkáj ani an tsʼejkom játs axi in tʼajál an tʼojláb.

 Jayej u bijiyáb an kaw. An Biblia in ulal abal a Jesús u bijiyábak ti «kaw» okʼxidh ka chich tejéʼ Tsabál (Juan 1:1). Axéʼ in léʼ kin uluw abal a Dios in eyendhaʼ a Jesús abal kin pidhaʼ i olchixtaláb axi más an ángeles.

 A Jesús jayej eyendháj abal kin watʼbanchij i olchixtaláb an atiklábchik. Ani walám játs jajáʼ axi eyendháj kʼal a Jehová abal kin pidhaʼ i olchixtaláb a Adán ani a Eva (Génesis 2:16, 17). Walám játs a Jesús axi in ókʼnaʼ an israelitas ban desierto ani játs jajáʼ axi kwaʼalak ka belkáj (Éxodo 23:20-23). a