¿Jitaʼchik neʼets ti éb?

KA TʼOJON TI

An tokʼtsixtaláb axi in binál an Biblia

A Dios in kwaʼalits tákudh jitaʼchik neʼets ka kʼalej ti éb abal tam ka tsemets ka kʼwajiychik ti éb (1 Pedro 1:3, 4). Talbél ti takuyámej kwaʼal kin áynanchij kin tsapikmédhaʼ in bélomtal ani kin tʼajaʼ i alwaʼ tʼajbiláb, max imbáj yab neʼets kin éjtow kin koʼoy an aychixtaláb abal ka kʼalejchik ti éb (Efesios 5:5; Filipenses 3:12-14).

¿Jantʼoj neʼetschik kin tʼajaʼ tanáʼ?

Axéʼchik axi tákudh neʼets kin tʼajaʼchik ti éyal ani sacerdotes junax kʼal a Jesús mil i támub (Revelación [Apocalipsis] 5:9, 10; 20:6). Axéʼ játs axi tákudhchik abal ti éyal ti éb (an Biblia in bíjiyalchik an «ít éyalchik») Játs axi neʼets kin béletnaʼ an atiklábchik axi u bélkax o an («ít kʼwajílomchik»). Antsanáʼ jantʼiniʼ tin kwaʼalakits tsalpadh kin tʼajaʼ a Dios (Isaías 65:17; 2 Pedro 3:13).

¿Jáy neʼets ka kʼalejchik ti éb?

An Biblia in ulal abal 144.000 neʼets ka tsab tsʼakbáj abal ka kʼalejchik ti éb (Revelación 7:4). Al jun i tsuʼbixtaláb an abatwálej Juan in éjtow kin tsuʼuw «an Codero pel a [Jesús] axi tsab tsʼakbáj kubat ban bólchal axi in bij Sion ani kʼal jajáʼ an 144.000» (Revelación 14:1-3; Juan 1:29; 1 Pedro 1:19). An bólchal Sión in léʼ kin uluw abal pidhnének i kʼadhpich uchbiláb kʼal a Dios, jantʼiniʼ a Jesús ani an 144.000 axi neʼets kin tʼajaʼchik ti tsʼalej ti éb (Salmo 2:6; Hebreos 12:22).

Axi «tákudhchik» abal ti éyal kʼal a Jesucristo tin éyaltal a Dios. Jayej u exlábchik jantʼiniʼ an «tsakam mukeʼ» (Revelación 17:14; Lucas 12:32). Nixéʼ in tejwamedhál abal axi tákudhchik lej wéʼ, max ki jumbiy kʼal an mukeʼ i ovejas in kʼál a Cristo (Juan 10:16).

Tsalap axi yab tekedh kʼal axi neʼetschik ti éb

Jawaʼ talchik i atikláb in tsálpayal: Patalchik axi in tʼajál i alwaʼ tʼajbiláb neʼets ti éb.

An chubaxtaláb: Jawaʼ in kʼej ulúmal a Dios, an atiklábchik axi bélkax neʼets ka kʼwajiy ti ít alabél Tsabál (Salmo 37:11, 29, 34).

A Jesús in uluw: «Ni jun i inik kʼalnek ti éb» (Juan 3:13). Kʼal axéʼ in tejwamédhaʼ abal an atiklábchik axi alwaʼ axi tsemets ókʼxidh kʼal jajáʼ, ejtíl a Abrahán, a Moisés, a Job ani a David, yab kʼalejchik ti éb (Hechos 2:29, 34). Jajáʼchik in kwaʼalak an aychixtaláb abalka tsab tsʼakbáj, abal ka kʼwajiychik tejéʼ ti Tsabál (Job 14:13-15).
Axi tákudhchik abal ka kʼalej ti éb u bijiyábchik ti «an kʼaʼál tsʼakbantaláb» (Revelación 20:6). Jaxtám neʼets ka wáʼtsin júnakej i tsʼakbantaláb tejéʼ ti Tsabál.
An Biblia in olnál abal tin Éyaltal a Dios«yabáts neʼets ka wáʼtsin an tsemláj» (Revelación 21:3, 4). Nixéʼ xi olchixtaláb kwaʼal kin tsuʼuw kʼal an tsabál, kom tiwaʼ ti éb yab waʼtsinének i tsemláj.

Jawaʼ talchik i atikláb in belál: An atiklábchik in éjtowal kin tákuy juʼtáj tin léʼ ti kʼwajíl ti éb o ti Tsabál.

An chubaxtaláb: Pel a Dios axi in tákuyal jitaʼ tam atikláb axi pútudh «axi neʼets kin batsʼuw an lablixtaláb abal ka kʼalej ti éb», an aychixtaláb abal ka kʼwajiychik ti éb (Filipenses 3:14). Axéʼ xi aychixtaláb yab pel jantʼoj axi wawáʼ neʼets ki tákuy (Mateo 20:20-23).

Jawaʼ talchik i atikláb in belál: An aychixtaláb abal ki kʼwajiy abal etsʼey tejéʼ ti tsabál, tokot in batsʼkʼuwal jitaʼ yab neʼets ti éyal tiwaʼ ti éb.

An chubaxtaláb: Jitaʼchik neʼets ka kʼwajiy abal etsʼey ti ít Tsabál a Dios in bíjiyal «u bichówil», «axi tákudh» ani «láblidh kʼal a Jehová» (Isaías 65:21-23). Jajáʼchik in kwaʼal an lablixtaláb abal kin putuw in kulbétal a Dios jawaʼ in ulúmal ma tin tujtal: abal an atiklábchik axi bélkax, ka kʼwajiy abal etsʼey al jun i ít alabél Tsabál (Génesis 1:28; Salmo 115:16; Isaías 45:18).

Jawaʼ talchik i atikláb in belál: An número 144.000 axi in ulal ti Apocalipsis pel jun i tʼiplab.

An chubaxtaláb: Bélits abal waʼats i números axi pel i tʼiplab, junchik lej chubax. Jun i tʼiplab pel «an doce i bijláb kʼal an doce i aykólchik kʼal Jesús» (Revelación 21:14). Ki tsuʼuw júnakej i tʼiplab axi in tejwamedhál abal an 144.000 pel chubax.

Revelación (Apocalipsis)7:4 in tejwamedhál «jáy játs axi tákudh [axi neʼetschik ti kʼwajíl ti éb], 144.000» ani jayej «waʼats jun i púlik mukeʼ axi ni jitaʼ in éjtowal kin ajiy». Axéʼ xi «púlik mukeʼ» jayej neʼets kin batsʼuw an kʼanixtaláb (Revelación 7:9, 10). Max an 144.000 pelak jun i tʼiplab ani max ka junkun patal an atiklábchik, yabáts neʼets ka tejwaméj abal u kaw kʼal tsab i mukeʼ. a

Ani an 144.000 axi «kʼalej kaldhach kʼal an atiklábchik jantʼiniʼ i pidhobláb» (Revelación 14:4). An kaw «pidhobláb» in léʼ kin uluw abal kʼalej kaldhach tsʼejel kʼal patal an atiklábchik. Jaxtám in alwaʼ tejwamedhál jitaʼ neʼets ti éyalchik kʼal a Cristo, abal kin béletnaʼ an púlik mukeʼ axi ti Tsabál (Revelación 5:10).

a An profesor Robert Thomas in dhuchaʼ tin kwéntaj an 144.000 kʼal jawaʼ in ulal Apocalipsis 7:4: «Axéʼ pel in yanél kʼal axi kʼwajatitschik bijidh ani junpukʼeʼ kʼwajat an atiklábchik axi ni jitaʼ in éjtowal kin ajiy, kʼal jawaʼ in ulal 7:9. Max ki uluw abal axéʼ pel jun i tʼiplab, yab i éjtowal kin uluw abal axéʼ pel chubax jawaʼ in ulal an libro» (Revelation 1-7: An Exegetical Commentary [Exobintaláb kaldhach ti Revelación 1-7], página 474).