Aníts. A Dios in t’ajál ti kwéntaj jita’chik u ya’úl. An Biblia in ulal: «A Jehová neʼets kin teynaʼ tam ka kʼwajiy moʼól ti yaʼul» (Salmo 41:3). Tejé’ k’wajat ox i tsalap axi ne’ets tu ku lej tólmiy max i kwa’al jun i yaw’láts axi yabáts ne’ets ka tixk’an:

1.   Ki konchij a Dios i tsapláb abal ki kuxuy. «An koyattaláb axi in k’ál a Dios» ne’ets tu ku tólmiy abal yab tu ku lej ata’ an t’e’pintaláb ani ne’ets tu ku pidha’ an tsapláb abal ki ejtow ki kuxuy (Filipenses 4:6, 7).

2.   Yab ki lej tsalpay k’al an yaw’láts axi i kwa’al. An Biblia in ulal: «An atikláb axi ets’ey xe’ets kulbél ne’ets ka k’wajiy más kanat, pero axi u lej t’e’pinal ne’ets ka taley in tsap» (Proverbios 17:22, Dios habla hoy [Versión Popular]). Ka tsápnanchij abal yab ka lej t’aja’ ti kwéntaj an yaw’láts, axé’ ne’ets ti lej tólmiy abal yab ki lej t’e’pin ani abal ka ats’a’ más wé’ kanat.

3.   Ets’ey ki t’ila’ an aychixtaláb. Ki t’ila’ an aychixtaláb axi i kwa’al, ne’ets tu ku tólmiy abal ku k’wajiy kulbél bélits max i kwa’al jun i yaw’láts (Romanos 12:12). An Biblia in ulal abal we’its ne’ets ka ulits a k’icháj tam yabáts jita’ ne’ets kin uluw: «In k’wajat ya’ul» (Isaías 33:24). A Dios ne’ets kin tixk’a’ patal an yaw’láts axi an ilálix yab in ejtowámal kin tixk’a’chik. Jayej ne’ets kin tixk’a’ patal an k’ibataláb axi i tametnál tam ku payey. An Biblia in ulal: «In t’u’úl ne’ets ka dhalambéj jant’ini’ tam ti tsákamej ani ne’ets ka wichiy in tsap jant’ini’ tam ti tsákamej» (Job 33:25).

 Nota: An ólchixchik k’al a Jehová i belál abal a Jehová u tólmix, pero tam u ya’ul jayej i aliyal an ilálix (Marcos 2:17). Yab i uchál nibal jita’ jant’oj tam ilál kwa’al kin eyendha’, axé’ pel jant’oj axi kwa’al ki takuy ti kwetemtal.