¿K’wajat a Dios ju’támkij?
Jawa’ in ulal an Biblia
A Dios in éjtowal kin tsu’uw jant’oj ani kin eyendha’ in tsap ju’támakits ka yéjenchat (Proverbios 15:3; Hebreos 4:13). Pero an Biblia yab tu exóbchal max a Dios k’wajat ju’támkij. Jawa’ tu exóbchal játs abal a Dios pel jun i espíritu ani abal in kwa’al ju’táj tu k’wajíl.
Jant’ini’ játs a Dios: Jajá’ pel jun i espíritu (Juan 4:24). Jaxtám, nibal jun i atikláb in éjtowal kin tsu’uw a Dios (Juan 1:18). Ban tsu’bixtaláb axi u tejwamél ban Biblia, ets’ey u tejwamél abal a Dios júnini’ ju’taj ti k’wajat. Yab xe’ets ju’támk’ij (Isaías 6:1, 2; Revelación [Apocalipsis] 4:2, 3, 8).
Ju’táj u k’wajíl: A Dios yab u k’wajíl ban éb axi wawá’ i bájuwal ki tsu’uw. U k’wajíl ju’táj ti lej wat’adh t’ek’at. Taná’ játs ju’táj Jajá’ in kwa’al in ko’ytal(1 Reyes 8:30). An Biblia in olnál abal jun a k’icháj, in t’ojnalil a Dios axi tíwa’ ti éb otsits tin tamét a Jehová, a axé’ in tejwamedhál abal a Dios in kwa’al ju’táj Jajá’ u k’wajíl (Job 1:6).
Max a Dios júnini’ ju’táj ti k’wajat, ¿chubax in éjtowal ti kin béletna’?
Aníts. Bélits abal a Dios u k’wajíl lej t’ek’at, Jajá’ in t’ajál ti kwéntaj patal jawa’ in wat’ál an atiklábchik. In t’ajál ti kwéntaj max i tsápnanchal ki belka’ ani tu tólmiyal (1 Reyes 8:39; 2 Crónicas 16:9). ¿Jant’ini’ tu tejwamédhanchal abal u t’e’pinal k’al wawá’ ani tu beletnál?
Tam i ólonchal: Tam wawá’ i ólonchal a Jehová, Jajá’ k’wajatits tu ats’ál (2 Crónicas 18:31).
Tam i ats’ál lej t’e’pidh i ichích: «A Jehová k’wajat utat k’al jita’ yajlidh in ichích ani in k’aniyal jita’chik in ats’ál abal yab jant’oj in ey» (Salmo 34:18).
Tam i yéjenchal jun i exobchixtaláb: A Jehová in eyendhál an Biblia abal tu ku pidha’ i tsalpadhtaláb ani abal antsaná’ ki exla’ jant’oj ki t’aja’ (Salmo 32:8).
Tsalap axi yab tekedh tin kwéntaj a Dios
Jawa’ talchik in belál: A Dios k’wajat ju’támkij, k’al patal jawa’ in ts’ejkamal.
An chubaxtaláb: A Dios yab u k’wajíl ban Tsabál nibal ban k’a’ylál (1 Reyes 8:27). An Biblia in ulal abal a ót ani k’e’at i ts’ejkabláb in tejwamedhál abal a Dios lej wat’adh púlik (Salmo 19:1). Pero axé’ yab in lé’ kin uluw abal a Dios u k’wajíl k’al jawa’ in ts’ejkamal, antsaná’ jant’ini’ jun i atikláb axi u mukul yab u kwajíl ban dibujo axi in ts’ejkál. K’al jun i dibujo, i éjtowal ki t’aja’ ti kwéntaj jant’ini’ játs an atikláb axi in ts’ejka’. Antsaná’ jayej, k’al patal jawa’ wa’ats, i t’ajál ti kwéntaj jant’ini’ játs in ey a Dios. Jajá’ lej tsapik, lej tsalpadh ani k’anidhom (Romanos 1:20).
Jawa’ talchik in belál: A Dios yab in kwa’al i tsapláb ani yab in exlál patal max yab u k’wajíl ju’támkij.
An chubaxtaláb: An espíritu santo pel an tsapláb axi a Dios in eyendhál abal kin putuw in tsalápil. K’al axé’ xi tsapláb a Dios in éjtowal kin exla’ patal, ani yab in yéjenchal ka k’wajiy ju’táj u yejencháb an tolmixtaláb (Salmo 139:7).
Jawa’ talchik in belál: Salmo 139:8 in tejwamedhál abal a Dios a Dios u k’wajíl ju’támkij, kom in ulal axé’: «Max kin k’alej ti éb, taná’ ne’ets kit k’wajiy ani max kin k’alej ban jolimtaláb, jayej ne’ets kit k’wajiy taná’».
An chubaxtaláb: Axé’ xi texto yab tu exóbchal abal a Dios k’wajat ju’támkij. Tu tejwamédhanchal abal a Dios in éjtowal tu ku tólmiy ju’támakits ku k’wajiy.
a An Biblia in ulal abal a Dios in bij Jehová.
Puede que también le interese
KONOWIXTALÁB TIN KWÉNTAJ AN BIBLIA
¿Jant’oj játs an espíritu santo?
An Biblia in ulal abal an espíritu santo pel ejtíl in «k’ubak» a Dios. ¿Jale’?
TIN KWÉNTAJ WAWÁ’
U léʼ abal an ólchixchik kʼal a Jehová ti kin tsaʼbiy
¿A léʼ ka exlaʼ más tin kwéntaj an Biblia ani tin kwéntaj an ólchixchik kʼal a Jehová?