Imbáj. An Tsabál yab jaykʼiʼ neʼets ka talabedháj, nibal ka chikan. An Biblia in ulal abal a Dios in tsʼejkaʼ an Tsabál abal ka kʼwajiy abal etsʼey.

•   «An bólidhchik neʼets kin kʼalnaʼ an Tsabál, ani neʼets ka kʼwajiy tanáʼ abal etsʼey» (Salmo 37:29).

•   «Jajáʼ in alwaʼ kubaʼ an Tsabál. Yab jaykʼiʼ neʼets ka tixkʼáj» (Salmo 104:5).

•   «An Tsabál neʼets ka kʼwajiy abal etsʼey» (Eclesiastés 1:4).

•   «Jajáʼ in Tsʼejkaʼ an Tsabál ani in alwaʼ kubaʼ. Yab alkʼidhkʼij tin tsʼejkaʼ, in tsʼejkaʼ abal ka kʼwajiy an atiklábchik» (Isaías 45:18).

 A Dios yab neʼets kin jilaʼ ka ódhnachikat an Tsabál ani ka talabedháj kʼal an pextaláb ani kʼeʼat jantʼoj. An Biblia in ulal abal a Dios «neʼets kin kʼibedhaʼ, kʼal jitaʼ xeʼets ti kʼibedhom kʼal jawaʼ waʼats tejéʼ Tsabál» (Revelación [Apocalipsis] 11:18). ¿Jantʼiniʼ neʼets kin tʼajaʼ?

 A Dios neʼets kin punuw jun i eyaltaláb ti éb, axi neʼets kin kalchiy an eyalchik axi tejéʼ ti Tsabál (Daniel 2:44; Mateo 6:9, 10). Axéʼ xi eyaltaláb neʼets ka okʼnáj kʼal a Jesucristo, in tsakámil a Dios (Isaías 9:6, 7). Tam ti a Jesús kʼwajiy tejéʼ Tsabál, in ejtow kin abatnaʼ an ikʼlom (Marcos 4:35-41). Kʼal in Eyaltal a Dios, a Jesús neʼets kin tʼajaʼ abal yabáts jantʼoj kin ódhnaʼ an Tsabál. Neʼets kin tʼojojoy an Tsabál abal junílekʼij ka kʼwajiy alabél ejtíl an jardín de Edén (Mateo 19:28; Lucas 23:43).

 Imbáj. Yan i atikláb in tsálpayal antsanáʼ kom yab in éxbayalchik tekedh jawaʼ in ulal 2 Pedro 3:7: «An éb ani an Tsabál axi xowéʼ, in ulumalits a Dios abal ka jílkʼon ma tam kin bájuwits an kʼicháj abal ka talaʼ tʼaʼiy». Ki exóbnaʼ tsab i tsalap axi neʼets tu ku tólmiy, abal ki exbay alwaʼ axéʼ xi texto:

1.   Junchikíl an Biblia in eyendhál an kaw éb, tsabál ani kʼamal, abal kin tʼipoy kʼeʼat jantʼoj. Jun i tʼiplab, Génesis 11:1 in ulal: «Patal an Tsabál in eyendhalak junkáts i kawintaláb». Tejéʼ, eyendháj an kaw «Tsabál» abal ka bíjiyat an atiklábchik.

2.   Talchik i versículos axi kʼwajat okʼxidh kʼal a 2 Pedro 3:7, in olnál jantʼoj in léʼ kin uluw an «éb», an «tsabál» ani an «kʼamal». Ban versículos 5 ani 6 in olnál jawaʼ watʼey tin kʼichájil a Noé. Al nixéʼ a kʼicháj, jawaʼ talabedháj ban ukʼeltaláb, pel an atiklábchik, yab an Tsabál. An atikláb játs axi u bijiyáb ti «Tsabál», ani talabedháj an atikláb axi pojkax (Génesis 6:11). Jayej talabedháj an «éb», axéʼ in léʼ kin uluw abal talabedháj an eyalchik axi waʼatsak al nixéʼ a kʼicháj. Kʼal axéʼ i éxbayal abal talabedháj an atiklábchik axi pojkax, yab an Tsabál. A Noé ani in yanél in kʼaniychik in ejatal tam ti talabedháj an xeʼtsintaláb, ani junílekʼij yaneychik tin eb (Génesis 8:15-18).

 An Diluvio axi tin kʼichájil a Noé in talabédhaʼ an atiklábchik axi pojkax. Jayej, an «kʼamal» axi u ólnab ti 2 Pedro 3:7, neʼets kin talabédhaʼ an atiklábchik axi pojkax, yab an Tsabál. A Dios in ulumal abal neʼets ku kʼwajiy al i «ít eb ani i ít tsabál» tanáʼ «neʼets ki ujnaʼ walim jawaʼ alwaʼ» (2 Pedro 3:13). An kaw «tsabál», in léʼ kin uluw an atiklábchik axi neʼets ka kʼwajiy tanáʼ, ani an «eb», in léʼ kin uluw jun i ít eyaltaláb, in Eyaltal a Dios. Axéʼ xi Eyaltaláb neʼets kin tʼajaʼ abal an Tsabál ka wenkʼon ti jun i paraíso (Revelación 21:1-4).