Aníts, in éjtowal ti tólmiy «kom pel in Káwintal a Dios ani in tólmiyal axi lej tʼeʼpidh» (2 Corintios 7:6). Bélits abal pel jun i libro kʼal jitaʼ u yaʼúl kʼal jawaʼ in atsʼál. Pero an Biblia in tolmiyámal jitaʼ u yaʼúl kʼal in tsalápil ani in tsalpayámal kin tixkʼaʼ in éjatal. An tolmixtaláb axi in kwaʼal an Biblia jayej in éjtowal ti tólmiy tatáʼ.

•  ¿Jantʼoj tam tolmixtaláb tu pidhál an Biblia?

•  ¿I elál ti Biblia i tʼiláb kʼal i atiklábchik axi in léʼnamal kin tixkʼaʼ in éjatal?

•  ¿Jawaʼ tam textos kʼal an Biblia neʼets ti tólmiy abal yab ka tsálpay ka tixkʼaʼ a éjatal?

•  ¿Jantʼoj i éjtowal ki tʼajaʼ max jun i jaʼúb tu ku uchaʼ, «abal yabáts in léʼ ka kʼwajiy éjat»?

•  ¿Ani max u examalits ku tixkʼaʼ u éjatal?

• ● Ka uluw jawaʼ a atsʼál.

   An Biblia in ulal: «Jun i jaʼúb axi chubax, pel axi etsʼey in tejwamedhál i kʼanidhomtaláb ani pel jun i epchal tam a watʼenchal i yajchiktaláb» (Proverbios 17:17).

   Jawaʼ in léʼ kin uluw: Tam i kwaʼal i tsalap axi tu tʼeʼpindhál i yéjenchal i tolmixtaláb.

   Max yab ka tʼílchij jitaʼ jawaʼ a atsʼál an tʼeʼpintaláb neʼets ti ataʼ. Pero max ka uluw jawaʼ a atsʼál, neʼets ka weʼmej an tʼeʼpintaláb ani neʼets ka tsuʼuw abal yab lej púlik an kʼibataláb axi a kwaʼal.

   Ka takaʼ ka tʼajaʼ axéʼ: Ka tʼílmay jitaʼ kʼal jawaʼ a atsʼál, walám kʼal jun a jaʼúb o a yanél. a Jayej a éjtowal ka dhuchaʼ jawaʼ a atsʼál.

• ● Ka aliy an tolmixtaláb kʼal an lab ilálix.

   An Biblia in ulal: «An atikláb axi lubach yab in yéjenchal i lab ilálix, pero axi yaʼúl aníts» (Mateo 9:12).

   Jawaʼ in léʼ kin uluw: Tam i kwaʼal jun i yawláts kwaʼal ki aliy an lab ilálix.

   An tsalap ka léʼnaʼ ka tixkʼaʼ a éjatal, pel jun i yawláts axi kʼwajat ta katsín o pel jantʼoj a watʼámal ta éjatal. Antsanáʼ jantʼiniʼ yab u tidhebél tam i kwaʼal jun i yawláts ti putat, jayej yab kwaʼal ku tidhebéj kʼal jun i yawláts axi i kwaʼal ti katsín. Ki tʼilaʼ, waʼats i ilál abal axéʼ xi yaw’láts.

   Ka takaʼ ka tʼajaʼ axéʼ: Ka aliy jun i lab ilálix dhubatkʼij.

• ● Ka tʼilaʼ abal lej a kwaʼal a jalbíl tin tamét a Dios.

   Jawaʼ in ulal an Biblia: «U nujuwab boʼ i gorriones kʼal tsab i tumín axi wéʼ in jalbíl, ¿yab chubax? Ni jun kʼal jajáʼchik u ukʼchiyab kʼal a Dios. . . . Ani ma i xiʼíl ti ókʼ kʼwajat patal ajidh. Yab kit jikʼeychik. Tatáʼchik a kwaʼal mas a jalbíl ke an gorriones» (Lucas 12:6, 7).

   Jawaʼ in léʼ kin uluw: Lej a kwaʼal a jalbíl tin tamét a Dios.

   Walám a tsálpayal abal it kʼwajat kwetém, pero yab aníts a Dios in exlál jawaʼ kʼwajat a watʼenchal, Bélits abal a itʼixnál a éjatal. A Dios u lej tʼeʼpinál kʼal tatáʼ. An Salmo 51:17 in ulal: «Jun i atikláb axi lej tʼeʼpidh ani in atsʼál abal yab jantʼoj in jalbíl. A Dios yab neʼets kin jilaʼ kwetém» Chubax abal a Dios ti kʼanidhál ani yab in léʼ kin tsuʼuw abal ka kʼibaʼ a éjatal.

   Ka takaʼ ka tʼajaʼ axéʼ: Ka aliy i tʼiplab ban Biblia axi in tejwamedhál abal a Dios ti lej kʼanidhál. Ejtíl ti capítulo 24 in kʼál an libro Acerquémonos a Jehová neʼets ka elaʼ talchik i tʼiplab.

• ● Ka ólonchij a Dios.

   Jawaʼ in ulal an Biblia: «Jayétsekʼij ka uchaʼ patal a tʼeʼpintal a Dios Jajáʼ u lej tʼeʼpinál kʼal tatáʼchik» (1 Pedro 5:7).

   Jawaʼ in léʼ kin uluw: A Jehová in léʼ ka tʼílchij jawaʼ a atsʼál ta éjatal ani jawaʼ ti tʼeʼpindhál.

   A Dios in léʼ ti pidhaʼ i koyataláb ani in léʼ ti tólmiy (Filipenses 4:6, 7, 13). Antsanáʼ tu tólmiyal a Dios max ku útey kʼal Jajá’ (Salmo 55:22).

   Ka takaʼ ka tʼajaʼ axéʼ: Ka ólonchij a Jehová xowéʼ. Ka tawnaʼ tin bij, a Jehová ani ka ólchij jawaʼ a atsʼál (Salmo 83:18). Ka konchij ti tólmiy abal ka watʼenchij an kʼibataláb.

• ● Ka lupudh tsálpay kʼal an alabél aychixtaláb axi i áychal axi taʼtál a kʼicháj.

   Jawaʼ in ulal an Biblia: «Axéʼ xi aychixtaláb pel jantʼiniʼ an patʼál axi u palchinal jun i tan abal ka koʼoyat kubat juniniʼ», antsanáʼ tu tólmiyal ti éjatal (Hebreos 6:19).

   Jawaʼ in léʼ kin uluw: An tʼeʼpintaláb in éjtowal ti jalkʼunchij a tsalápil ani ti neʼdhaʼ juʼtamitskʼij, ejtíl in tʼajál an tsapik ikʼ kʼal an tan.

   An aychixtaláb axi in binál an Biblia, pel ejtíl an patʼál axi u palchinal an tan abal ka kʼwajiy juniniʼ. Axéʼ xi aychixtaláb yab pel jun i alkʼidh kaw. Axéʼ pel jun i aychixtaláb axi a Dios in ulúmal abal neʼets kin tʼajaʼ ani neʼets kin talabédhaʼ patal jawaʼ in tʼajál ki yajchiknaʼ (Revelación 21:4).

   Ka takaʼ ka tʼajaʼ axéʼ: Ka ajiy más tin kwéntaj an aychixtaláb axi in binál an Biblia, Ban ajumtaláb 5 in kʼál an folleto Jawaʼ a Dios tu ólchal lej alwa’.

• ● Ka tʼajaʼ axi a lej kulbetnál.

   Jawaʼ in ulal an Biblia: «An atikláb axi etsʼey xeʼets kulbél, neʼets ka kʼwajiy más kanat» (Proverbios 17:22).

   Jawaʼ in léʼ kin uluw: Ki tʼajaʼ jawaʼ i kulbetnál, neʼets tu ku tólminchij i katsín ani i tsalápil.

   Ka takaʼ ka tʼajaʼ axéʼ: Ka tʼajaʼ jantʼoj axi a lej kulbetnál. Jun i tʼiplab, ka atsʼaʼ an son axi a lej kulbetnál, ka tʼajaʼ jantʼoj o ka ajiy jantʼoj axi ti kanatbédhaʼ. Jayej neʼets ti kulbédhaʼ tam ka tólmiy axi kʼeʼat, bélits max ka tólmiy lej wéʼ (Hechos 20:35).

• ● Ka lej béletnaʼ ta báʼ.

   Jawaʼ in ulal an Biblia: «Lej alwaʼ max ka exobindhaʼ a iniktal» (1 Timoteo 4:8).

   Jawaʼ in léʼ kin uluw: Ka exobindhaʼ a iniktal ani kit wayits alwaʼ ani ka kʼapuw an kʼapnél axi neʼets ti lej tólmiy.

   Ka takaʼ ka tʼajaʼ axéʼ: Kit kʼalej ta belál ani kit wéʼ adhláts, nixéʼ a éjtowal ka tʼajaʼ al 15 i minutos.

• ● Ka tʼilaʼ abal patal an tʼeʼpintaláb axi a atsʼál ta éjatal u jálkʼunal, jantʼiniʼ kʼeʼat i tʼajbiláb ti éjatal u jálkʼunal.

   Jawaʼ in ulal an Biblia: «Tatáʼchik yab a tsoʼob jantʼoj neʼets ka watʼaʼ Kalám» (Santiago 4:14).

   Jawaʼ in léʼ kin uluw: An tʼeʼpintaláb axi i kwaʼal ani axi i tsálpayal abal yab neʼets ki éjtow ki tsʼejkaʼ, kʼal an kʼij, i éjtowal ki ukʼchiy yajum yajum.

   Bélits max ki tsuʼuw abal lej kʼibat jawaʼ kʼwajat i watʼál xowéʼ ta kʼicháj, jun a kʼicháj neʼets ka jálkʼun. Jaxtám, yab ka wálbaʼ ta báʼ (2 Corintios 4:8). Axi taʼtal a kʼicháj an kʼibataláb yabáts neʼets ka koʼoy. Pero max ki tixkʼaʼ i éjatal yabáts neʼets ki éjtow ki wichbaʼ.

   Ka takaʼ ka tʼajaʼ axéʼ: Ka ajiy i tʼiplabchik ti Biblia, kʼal i atiklábchik axi lej tʼeʼpidhak ani in léʼakchik ka tsemets. Ka exóbnaʼ jantʼiniʼ ti jálkʼunchik in éjatal talbél, junchikíl ma jantʼiniʼ yab in áychalak. Ki tsuʼuw talchik i tʼiplab.

 Aníts. An Biblia in olnál kʼal i atiklábchik axi in léʼnamal kin tixkʼaʼ in éjatal, a Dios yab tsákuy kʼal jajáʼchik. Jajáʼ, in éjtowal kin tʼajaʼ jayétsekʼij kʼal tatáʼ.

Elías

•  ● ¿Jitaʼ jatsák a Elías? Bélits abal pel jun i kawlómej axi in tejwamédhaʼ yan i iniktaláb. Jun i kʼicháj in koʼoy jun i púlik jikʼeltaláb. Santiago 5:17 in ulal abal a Elías, «pelak jun i inik wálbidh ani junchikíl i atsʼálak lej tʼeʼpidh, ejtilíts wawaʼ».

•  ● ¿Jaleʼ tin léʼak ka tsemets? Jun a kʼicháj a Elías in tsálpayalak abal kʼwájatak kwetém ani abal u léʼnabak ka tsemdháj, a Elías lej jikʼey, in atsʼaʼ abal kʼwájatak kwetém ani abal yab jantʼoj in jalbílak. Jaxtám in konchij a Jehová: «Oh, Jehová ti kin tixkʼanchij u éjatal» (1 Reyes 19:4).

•  ● ¿Kʼal jantʼoj ti tólmiyat? A Elías in ólchij a Jehová kʼal patal jawaʼ tu tʼeʼpindhabak. ¿Jantʼiniʼ ti kanatbedháj kʼal a Jehová? A Jehová in tólmiy a Elías, kom in tejwamédhanchij abal in kʼanidhál ani an tsapláb axi in kwaʼalak. Jayej in uchaʼ abal in kwaʼalak yan in jalbíl abal Jajáʼ ani in pidhaʼ jun in tolmiwál.

•  ▸ Ka ajiy tin kwéntaj a Elías: 1 Reyes 19:2-18.

Job

•  ● ¿Jitaʼ jatsák a Job? Pelak jun i atikláb lej tuminladh ani in kwaʼalak yan in yanél ani jayej pelak in pútudh tʼojnálil a Jehová.

•  ● Tam, ¿Jaleʼ tin konoy ka tsemets? Kom jun dhubatkʼij, a Job in watʼaʼ yan i kʼibataláb. In kʼibaʼ patal jawaʼ in kwaʼalak. Patal in tsakámil tsemets dhubatkʼij. Ani in koʼoy jun i yawláts lej kidháb. Talbél wálbiyat kʼal jawaʼ kʼwájatak in watʼál. A Job kʼwajatak in lej yajchiknál. Jaxtám ulits kin uluw: «Yabáts u léʼ u éjatal» (Job 7:16).

•  ● ¿Kʼal jantʼoj ti tólmiyat? A Job in ólonchij a Jehová ani jayej tʼilmáts kʼal kʼeʼatchik (Job 10:1-3). Pero lej kanatbedháj kʼal jun in jaʼúb axi in bij Elihú, ani tólmiyat kin tsuʼuw an kʼibataláb lej pílits. Pero jawaʼ más exbadh, játs abal a Job in jilaʼ ka tólmiyat kʼal a Jehová.

•  ▸ Ka ajiy tin kwéntaj a Job: Job 1:1-3, 13-​22; 2:7; 3:1-13; 36:1-7; 38:1-3; 42:1, 2, 10-13.

Moisés

•  ● ¿Jitaʼ pelak a Moisés? Jajáʼ in ókʼnaʼ in bichówil a Jehová ani in tsapik tʼójonchalak kʼal i putudhtaláb.

•  ● ¿Jaleʼ tin léʼak ka tsemets? A Moisés in kwaʼalak yan i tʼojláb ani wilkʼidh u kawliyábak ani ulits kin atsʼaʼ lej tsekenek. Jaxtám in konchij a Dios: «Ti kin tixkʼanchij u éjatal» (Números 11:11, 15).

•  ● ¿Kʼal jantʼoj ti tólmiyat? A Moisés in tʼílchij a Jehová jantʼiniʼ tin atsʼálak. A Dios in tólmiy kʼal patal an tʼojláb axi in kwaʼalak abal yab ka lej tʼeʼpin.

•  ▸ Ka ajiy tin kwéntaj a Moisés: Números 11:4-6, 10-17.