Imbáj, kom yabchik junat jantʼiniʼ in kʼakʼnál a Dios. Ti Biblia i elál yan i tʼiplab axi in tejwamedhál jaleʼ ti a Dios yab in bátsʼuwal jun i kʼakʼnaxtaláb. Neʼets ki tsuʼuw tsab i tʼiplab.

1: An belomtalábchik axi in kʼakʼnál i dioses axi yab tekedh

 An Biblia in ulal abal yab jantʼoj ti exbadh max ki kʼakʼnaʼ kʼeʼat i dioses (Jeremías 10:3-5; 16:19, 20). Ti biyál, a Jehová in uchaʼ axéʼ an bichow Israel: «Expidh Nanáʼ ti kin kʼakʼnaʼ, yab ka koʼoychik kʼeʼat i dioses» (Éxodo 20:3, 23; 23:24, Dios habla hoy). a Tam ti an israelitas in kʼakʼnaʼ kʼeʼat i dioses, «a Jehová lej tsakuy» (Números 25:3; Levítico 20:2; Jueces 2:13, 14).

 A Dios yab in jalkʼuyámal in tsalapil, belej yab in kulbetnál «abal ka kʼakʼnáj kʼeʼat i dioses» (1 Corintios 8:5, 6; Gálatas 4:8). Jajáʼ in ulal abal max i léʼ ki kʼakʼnaʼ, yab kwaʼal ki junkuw jitaʼchik in kʼakʼnál kʼeʼat i dioses. A Dios in ulal abal max i léʼ abal tu ku bátsʼkʼunchij an kʼakʼnaxtaláb axi i pidhál, yab kwaʼal ku támkun kʼal an kʼakʼnaxtaláb axi yab chubax. An Biblia in ulal: «Kit tíxkʼanchik kʼal jawaʼ yab alwaʼ ani kit xeʼtsin pil» (2 Corintios 6:14-17). Max a Dios in bátsʼuwalak patal an kʼakʼnaxtaláb, ¿walám neʼets tu ku uchaʼ axéʼ?

2: Jitaʼchik in kʼakʼnál a Dios jantʼiniʼ Jajáʼ yab in kulbetnál

 A Jehová in pojkaʼ an israelitas tam ti tujey ti kʼakʼnáb antsanáʼ jantʼiniʼ tu kʼakʼnábak kʼeʼat i dioses (Éxodo 32:8; Deuteronomio 12:2-4). A Jesús in tsapik tawnaʼ an ókʼnomchik kʼal an belomtaláb kom yab in kʼakʼnálak a Dios jantʼiniʼ tin tomnál. Jajáʼchik in tʼajálak ejtíl max in kʼakʼnál a Dios pero yab in tʼajálakchik «jawaʼ más exbadh», ejtíl ka «xeʼtsinchik bolidh», kin «yájnanchij an inikchik» ani kin «lej belaʼ a Dios» (Mateo 23:23).

 Xowéʼ ta kʼicháj expidh waʼats jun i kʼakʼnaxtaláb axi a Dios in bátsʼuwal, játs jitaʼchik in kaldhál an exobchixtaláb ti Biblia (Juan 4:24; 17:17; 2 Timoteo 3:16, 17). An kʼakʼnaxtalábchik axi yab in kaldhál an exobchixtaláb ti Biblia, in owmedhál an atiklábchik kʼal a Dios. Yan i atikláb in belál abal an Biblia in olnál abal a Dios ox tin eb, abal an tsemélom in áynanchal ejat ani abal axi pójkaxchik u petʼnáb al i kʼamal, pero axéʼchik xi exobchixtaláb kalej tam ti tujey ti kʼakʼnáb kʼeʼat i dioses. Patal axéʼchik xi kʼakʼnaxtaláb yab in kwaʼal in exbádh, kom pel i alkʼidh exobchixtaláb, yab játs jawaʼ in kónoyal a Dios (Marcos 7:7, 8).

 A Dios in pojkál an kʼakʼnaxtaláb axi in ulalkʼij abal in kʼakʼnál a Dios pero yab chubax (Tito 1:16). Abal jun i kʼakʼnaxtaláb tu ku utuw kʼal a Dios yab in yéjenchal i ajib. In yéjenchal tu ku tólmiy abal ki jalkʼuy i ejatal. Jun i tʼiplab, an Biblia in ulal: «Max i tsálpayal abal u lej kʼakʼnax kʼal a Dios ani i wiʼnál i kaw axi yab alwaʼ, tokot i kʼambiyal i kweteʼ ichích ani jolát i kʼakʼnaxtal. Max chubax i kʼakʼnál a Dios, neʼets ki tólmiy axi ódh inik ani axi pel i tsemchidh uxumchik kʼal i yejenchixtaláb jawaʼ in kwaʼal, neʼets ki alwaʼ béletnaʼ i ichích abal yab ka kidhabméj kʼal jawaʼ waʼats kidháb tejéʼ Tsabál. Jaʼits an lej kʼakʼnaxtaláb axi in kulbetnál a Dios» (Santiago 1:26, 27; notas). An Biblia La Palabra de Dios para Todos in eyendhál an kaw «kʼakʼnaxtaláb axi tʼokat».