Jun i encuesta axi t’ajan ti Estados Unidos, in tejwamédha’ abal an 80% k’al an tsákamchik in t’ajchal i oláb a Dios. Pero expidh ts’ejel k’al axé’chik xi tsakam, játs axi chudhél in t’ajál i oláb. Walám talchik kin konowiy tin bá’: «¿Walám an oláb expidh pel abal ku ats’a’ alwa’ tu ejatal?»

•  ¿Jant’oj játs an oláb?

•  ¿Chubax tin ats’ál a Dios?

•  ¿Jant’oj u éjtowal ku ólchij a Jehová tu olábil?

•  Jawa’ in ulal talchik i tsakam

Ku oláts in lé’ kin uluw ki t’ilmay a Jehová, axi in ts’ejka’ patal jawa’ wa’ats. Bélits abal a Dios lej púlik in éy, an Biblia in ulal abal «yab ów ti k’wajat k’al wawá’» (Hechos 17:27). Jayej tu uchál: «Kit uteychik k’al a Dios, ani Jajá’ ne’ets ka utey k’al tatá’chik» (Santiago 4:8).

¿Jant’oj a éjtowal ka t’aja’ abal kit utey k’al a Dios?

• Kit oláts. Antsaná’ a t’ilmayal tatá’.

• Ka exóbna’ an Biblia. Antsaná’ játs jant’ini’ a Dios ti «t’ilmayal».

Max ka ólonchij a Dios ani ka exóbna’ an Biblia, ne’ets ti tólmiy abal ka t’aja’ ta ja’úb.

«Ka t’ilmay a Jehová pel jun i ts’ejwalixtaláb axi expidh pidhnének an atiklábchik» (Jeremy).

«Tam ku ólchij a Jehová patal jawa’ u ats’ál, tin tólmiyal ku ats’a’ más utat k’al Jajá’» (Miranda).

Walám a belál k’al a Dios ani a ólonchal, pero walám jayej a ats’ál k’ibat ka bela’ abal chubax ti ats’ál. Pero an Biblia in ulal abal a Dios in «ots’owiyal an oláb» (Salmo 65:2). Jajá’ in lé’ abal ka ólchij patal jawa’ ti t’e’pindhál. ¿Jale’? Kom a Dios u t’e’pinal k’al tatá’ (1 Pedro 5:7).

Ka tsalpay k’al axé’: ¿A kwa’al jun a ja’úb axi a lej t’ilmayal? Jayetsej a éjtowal ka t’aja’ k’al a Dios. Ka tawna’ wílk’idh ani ka eyendhanchij in bij, Jehová (Salmo 86:5-7; 88:9). Ma an Biblia in ulal abal a éjtowal ka ólonchij wílk’idh (1 Tesalonicenses 5:17).

«An oláb pel abal kin t’ilmáts k’al a Jehová, abal ku ólchij patal jawa’ u ats’ál tu ichích» (Moises).

«Tam in t’ilom k’al a Jehová, u ólchal patal jawa’ pel exbadh abal naná’, u t’ilmayal ejtíl tam in t’ilom k’al u mamá ani u ja’úbchik» (Karen).

An Biblia in ulal: «Yab ka walka’ a ichích kit t’e’pindhanchat k’al ni jant’oj, ka ólonchij a Dios ani ka lej konchij in tólmixtal. Jayej ka konchij jawa’ a yéjenchal ani ka pidha’ i k’ak’namal» (Filipenses 4:6).

Tam, ¿a éjtowal ka ólchij an t’e’pintaláb axi a kwa’al? ¡Aníts! An Biblia játs axi tu uchál ki t’aja’: «Ka ólchij a Jehová jawa’ a ats’ál ani Jajá’ ne’ets ti tsapliy» (Salmo 55:22).

Pero, yab expidh in tomnál ka ólchij an k’ibataláb axi a kwa’al. Jun i ts’ik’ách axi in bij Chantelle in ulal: «Max a Jehová pel u lej alwa’ ja’úb, ne’ets ku ólonchij ets’ey ani yab expidh tam u yéjenchal jant’oj. U tsálpayal abal jawa’ más exbadh játs ku k’ak’nanchij a Jehová patal jawa’ tin pidhál chudhél chudhél. Yab jayk’i’ ne’ets ku taliy ki tala’ k’ak’nanchij patal jawa’ tu pidhál».

Ka tsalpay k’al axé’: ¿Jant’oj játs axi a lé’ ka k’ak’nanchij a Dios? Ka tsalpay k’al ox jant’oj axi a éjtowal ka k’ak’nanchij a Jehová axé’ a k’icháj.

«Tam ka tsu’uw jun i tsakam wíts, a éjtowal ka ólonchij a Jehová abal ka k’ak’nanchij» (Anita).

«Ka tsalpay k’al jun i texto axi ti Biblia axi a lej kulbetnál, o k’al jant’oj axi in ts’ejkámal a Jehová ani a lej jik’pál. Talbél a éjtowal ka k’ak’nanchij» (Brian).