«U examal ku ajiy an Biblia, pero k’ibat u ats’ál kom lej yan i letras in kwa’al» (Briana, 15 i támub).

Max a wat’amal ejtíl a Brianna, axé’ xi artículo ne’ets ti tólmiy.

•  ¿Jale’ ti lej exbadh ki ajiy an Biblia?

•  Jant’ini’ a éjtowal ka ajiy an Biblia

•  Jawa’ in ulal talchik i tsakam

¿A it’ixnál ka ajiy an Biblia? Walám kom’íj, ani játs kom in kwa’al yan i letras ani yab in kwa’al i dibujos. Walám más a kulbetnál ka tsu’uw i videos o an televisión.

Pero ka tsalpay k’al axé’: max ka ela’ak jun i caja lej biyálits, pero a exlál abal in kwa’al yan i tumín, ¿yab aníts abal ne’ets ka lé’na’ ka japiy?

An Biblia pel ejtíl axé’ xi caja. Tin ál ne’ets ka ela’ yan i exobchixtaláb axi ne’ets ti tólmiy abal:

• Ka exla’ jant’oj ka t’aja’ k’al a ejatal.

• Kit ne’dháxin alwa’ k’al a papá ani a mamá.

• Ka ela’ a ja’úb axi chubax ti tólmiy.

• Yab kit lej t’e’pin.

¿Jale’ ti belál abal jun i libro axi lej biyálits, in éjtowal ti tólmiy? Játs kom «patal jawaʼ in ulal an tʼokat dhuchlab, chubax u tólmix» (2 Timoteo 3:16). Axé’ xi kaw tu t’ilchal abal patal an exobchixtaláb axi k’wajat ti Biblia, tal k’al a Jehová.

A éjtowal ka ajiy tin tujtal ani ma ka talabédha’. Axé’ ne’ets ti tólmiy abal ka exla’ k’al jant’oj in kawnál an Biblia. ¿Jant’ini’ a éjtowal ka t’aja’? Ki tsu’uw tsab i tolmixtaláb:

•  A éjtowal ka ajiy an 66 i libros tin ay. Ki tujey ti Génesis ani ka talabédha’ ti Revelación (Apocalipsis).

•  A éjtowal ka ajiy patal an t’ilab antsaná’ jant’ini’ ti k’alej ti wat’el.

Jawa’ a éjtowal ka t’aja’: Ban sección 4-A in k’ál an folleto Guía para el estudio de la Palabra de Dios ne’ets ka ela’ jun i lista axi in olnál jant’ini’ ti k’alej ti wat’el patal jawa’ in t’aja’ a Jesús ban Tsabál.

A éjtowal ka takuy jun i t’ilab axi u kaw tin kwéntaj jun i k’ibataláb axi k’wajat a wat’ál. Jun i t’iplab:

• ¿A lé’ ka ko’oy jun a ja’úb axi chubax ti tólmiy tam más a yéjenchal? Tam, ka ajiy an t’ilab tin kwéntaj a David ani a Jonatán (1 Samuel, capítulos 18 ma ti 20). Talbél ka tsu’uw an pejach, «Cómo encontrar amigos de verdad» abal ka tsu’uw jant’ini’ in éjtowal ti tólmiy axé’ xi pejach.

• ¿A ats’ál k’ibat ka t’aja’ jawa’ tekedh? Ka ajiy tin kwéntaj a José abal ka exla’ k’al jant’oj ti tólmiyat abal yab ka atáj k’al jun i kidháb t’ajbiláb (Génesis, capítulo 39). Talbél, ka tsu’uw axé’ xi tsab i pejach «Cómo resistir las tentaciones» ani «Acusado falsamente», abal ka tsu’uw jant’oj in éjtowal ti tólmiy.

• ¿A lé’ ka exla’ jant’ini’ ti tólmiyal an oláb? Ka tsu’uw jant’oj in wat’a’ a Nehemías (Nehemías, capítulo 2). Talbél, ka tsu’uw an pejach «Jehová contestó su oración», taná’ ne’ets ka kaldha’ yan i exobchixtaláb.

Jawa’ a éjtowal ka t’aja’: Tam ka lé’na’ ka ajiy an Biblia, ka aliy ju’táj kit k’wajiy kwetém ani yab jita’ ti it’ixbédha’.

Wa’ats k’e’at jant’oj axi a éjtowal ka t’aja’, ka ajiy jun i t’ilab o jun i salmo, ani ka tsalpay jant’ini’ in éjtowal ti tólmiy. Talbél ta ajiyamal, ka tsalpay k’al talchik i konowixtaláb ejtíl axé’:

•  ¿Jale’ in aba’ a Jehová abal ka dhuchan ti Biblia?

•  ¿Jant’oj tin exóbchal tin kwéntaj a Jehová?

•  ¿Jant’ini’ u éjtowal ku eyendha’ tu ejatal jawa’ u ajiy?

Jawa’ a éjtowal ka t’aja’: Ka dhucha’ jayk’i’ a tsálpayal kit tujey ka ajiy an Biblia. A éjtowal ka eyendha’ an «Programa abal ka ajiy an Biblia» axi k’wajat ban página ti Internet.