An ólchixchik k’al a Jehová tsabíl ti semana u támkunalchik ban atáj tamkuntaláb. ¿Jant’oj in t’ajálchik taná’? ¿Jale’ ti lej alwa’ kit k’alej ban tamkuntaláb axi jajá’chik in t’ajál?

•  ¿Jant’oj u t’ajnál taná’?

•  ¿Jale’ ti lej alwa’ kit k’alej ban tamkuntaláb axi jajá’chik in t’ajál?

•  Jawa’ in ulal talchik i tsakam

I exobnál tin kwéntaj an Biblia, patal axé’ tu lej tólmiyal. An tamkuntalábchik jayej ne’ets ti tólmiy abal:

• Ka exla’ más tin kwéntaj a Dios.

• Ka exla’ jale’ ti k’wajat ti wat’el yan jant’oj xowé’ ta k’icháj.

• Ka jalk’uy jant’ini’ a ey.

• Ka ela’ a ja’úb axi ti tólmiy.

¿A exlálak? ¿A exlál jale tu bijiyáb Salones del Reino ju’táj tu támkunal an ólchixchik k’al a Jehová? Kom jawa’ más u t’ilnal taná’, játs tin kwéntaj in Eyaltal a Dios (Mateo 6:9, 10; 24:14; Lucas 4:43).

Jawa’ u olnáb taná’ ne’ets ti lej tólmiy. Jawa’ u exobnáb ti tamkuntaláb, ne’ets ti lej tólmiy abal ka exla’ jant’oj ka t’aja’ ta ejatal (Proverbios 4:5). An Biblia ne’ets ti tólmiy abal ka takuy ka t’aja’ jawa’ tekedh ani jayej ne’ets ti tók’tsinchij talchik i konowixtaláb, ejtíl:

• ¿Jale’ tu k’wajat tejé’?

• ¿Pel a Dios axi in t’ajál ki yajchikna’?

• ¿In áynanchal ejat an tsemélom?

Axé’ játs talchik i konowixtaláb axi u tok’tsiyáb ban tamkuntaláb axi u t’ajnal tin taltal an semana:

• ¿Jale’ ti lej exbadh ki jila’ abal an Biblia tu ku exóbchij?

• ¿Jita’ in éjtowal tu ku tólmiy tam u lej t’e’pidh?

• ¿Jant’oj k’wajat in t’ajál in Eyaltal a Dios abal k’al wawá’?

«U juntal exóbal k’alej ti tamkuntaláb ani ketlen k’al u yanél. Jayej, i matinchij an publicaciones. Talbél tin ucha’ abal in lej jik’pa’ abal patal u tók’tsinalak tam u t’ajnalak i konowixtaláb. Jayej tin ucha’ abal ban iglesia ju’táj jajá’ u k’alel, yab in kwa’al i publicaciones abal kin exbay an Biblia» (Brenda).

¿A exlálak? Yab kwa’al ka jalbiy abal kit otsits ti Atáj tamkuntaláb, nibal u konoyáb i tumín.

An atiklábchik axi ka exla’ taná’ ne’ets ti lej kanatbédha’. An Biblia in ulal abal jita’chik pel i aykol k’al a Cristo, in tomnál ka tamkun abal ka kanatbedháxin (Hebreos 10:24, 25). Kom al axé’ xi xe’tsintaláb wa’ats i atikláb axi expidh in tsálpayal k’al jajá’, jaxtám lej exbadh ki junkuw i atiklábchik axi in k’ak’nál a Dios, ani axi u t’e’pinal k’al axi k’e’at, kom jajá’chik ne’ets tu ku lej kanatbédha’.

«Tam junchikíl, u ats’ál lej t’e’pidh ani tsékenek, pero u ats’ál lej kanat tam kin k’alej ti Atáj Tamkuntaláb. Tam kin ayinits tu k’imá’, u ats’ál in kulbél ani k’al i tsapláb abal ku áynanchij» (Elisa).

¿A exlálak? Tin puwél an Tsabál wa’ats 120.000 i tamkuntaláb in k’ál an ólchixchik k’al a Jehová ani 60.000 i atáj ju’táj tu támkunalchik. Támub ti támub, u ts’ejkab 1.500 i Atáj Tamkuntaláb, kom más i atikláb k’wajat ti wénk’onal ti ólchix k’al a Jehová. *