Ban tamub 2020 játs an kaʼál kalel tamub tam ti punuwat ti internet an Púlik tamkuntaláb regional. An epchalchik axi ti Malaui ani ti Mozambique in éjtowchik kin tsuʼuw an Púlik tamkuntaláb bélits abal yab in kwaʼal i internet. ¿Jantʼiniʼ tin tʼajaʼchik?

 An Comité de Coordinadores ani de Enseñanza kʼal an Kwenél i Ókʼnom, in uluwchik abal neʼetsak ka watʼbáj an púlik tamkuntaláb ban radio ani ban televisión, ti Malaui ani ti Mozambique. ¿Jaleʼ tin tsalpaychik kin watʼbaʼ antsanáʼ? Ti Malaui játs juʼtáj ti más jálbidh abal ka éyendhaj an internet. Jaxtám ti lej wé i epchal in ejtowal kin koʼoy an internet. A William Chumbi, axi u tólmix ban Comité de Sucursal ti Malaui, in ulal: «Taná expidh u eynál an radio ani an televisión abal ka watʼbáj an púlik tamkuntaláb». A Luka Sibeko, u tólmix ban Comité de Sucursal ti Malaui, jajá in ulal: «Max yab i eyendhámalak an televisión ani an radio, expidh talchik i epchal neʼetsak kin éjtow kin tsuʼuw an púlik tamkuntaláb». Ti Mozambique an epchalchik in kwaʼal jun i kʼibataláb ejtíl axé. Lej wéʼ an epchalchik axi in éjtowal kin tsʼaʼiy jun i celular abal kin kin tsuʼuw an púlik tamkuntaláb ani jayej yab in éjtowalchik kin tsʼaʼiy an internet axi neʼets kin yéjenchij.

 Kom kʼwajat an coronavirus, kʼwajatakits ti watʼbáb an tamkuntaláb axi i kwaʼal ti semana ban radio ani ban televisión. a An epchalchik in uchaʼchik abal neʼets kin yéjenchij más i horas abal ka watʼbáj an Púlik tamkuntaláb regional.

 An epchalchik axi ti Malaui, jayej in tamétnaʼ axéʼ xi kʼibataláb. An radio ani an televisión expidh in jilál jun i hora abal ka watʼbáj jantʼoj, kom in tsʼejnál max kin tsekedhaʼ jitaʼ neʼets kin atsʼaʼ o kin tsuʼuw jawaʼ neʼets ka watʼbáj. In ólchichik abal jawaʼ neʼets ka watʼbáj pel abal ka tólmiyat an atiklábchik. Bélits abal u kʼwajat mapudh, in éjtowalchik kin atsʼaʼ jun i alwaʼ kaw tin kwéntaj an Biblia. In éjtowal ka tólmiyatchik abal ka kʼwajiy alwaʼ kʼal an atiklábchik ani kʼál in yanél. Talbél tin atsʼámal patal axéʼ, an dhabal kʼal an radio in jilaʼ abal ka punuwat más i kʼij an púlik tamkuntaláb.

 Ti Malaui, expidh eyendháj jun i emisora kʼal an radio ani jun i canal kʼal an televisión abal kin watʼbáj an púlik tamkuntaláb regional. Kom axéʼ xi emisora ani an canal kʼal an televisión, in bájuwal tin putat an bichow ti Malaui. Ti Mozambique, eyendháj 85 i emisoras kʼal an radio ani jun i canal kʼal an televisión abal kin watʼbaʼ an púlik tamkuntaláb regional.

 Eyendháj 28.227 dólares abal ka watʼbáj an púlik tamkuntaláb regional ti televisión ani 20.000 dólares abal ka watʼbáj ban radio, ti Mozambique ani ti Malaui. An emisoras kʼal an radio in konoy 15 ma 2.777 dólares, in tʼajalakchik ti kwéntaj abal kin jalbiy kʼal in yaném an atiklábchik axi neʼetsak kin bajuw kin atsʼaʼ an púlik tamkuntaláb. b

 An epchalchik in lej tʼajaʼ ti kwéntaj abal kin éyendhaʼ alwaʼ an tumín axi an epchalchik in binámal. Ti Malaui an epchalchik in tʼílmay an dhábal kʼal an radio abal ka tsaʼkanchat in jalbíl abal kin éyendhaʼ an emisora. Antsanáʼ an epchalchik yab in jalbíy an 30%, jun i 1.711 dólares. Talchik i emisoras ti Mozambique in tsaʼkanchij jawaʼ neʼetsak kin jálbiy an epchal, kom in exlálak abal jajáʼchik yab kʼambix, in jalbiyal tam in ulalchik abal neʼets kin tʼajaʼ.

 An epchalchik in lej kʼakʼnál kom eyendháj an radio ani an televisión abal an púlik tamkuntaláb. A Patrick, pel jun i ókʼnom kʼal jun i tamkuntaláb ti Malaui, in uluw: «I lej kʼakʼnanchal an Kwenél i Ókʼnom kom tu tʼajaʼ ti kwéntaj abal ki éjtow ki tsuʼuw ani ki atsʼaʼ an púlik tamkuntaláb». A Isaac in uluw: «I lej kʼakʼnanchal a Jehová kom tu tólmiy ani i éjtow ki atsʼaʼ an púlik tamkuntaláb ban radio. I lej kʼakʼnanchal a Jehová ani in bichówil kʼal axéʼ xi lablixtaláb kom i éjtow ki atsʼaʼ an exobchixtaláb axi Jajáʼ tu pidhál. I lej belál, abal a Jehová in lej kʼanidhál in bichówil».

 Jun i epchal axi kʼaʼál kʼwajiy ba jun i púlik tamkuntaláb ti al an tamub 2020. Jajáʼ in uluw: «Axéʼ tin tejwamédhanchij abal a Jehová, Patal in ejtowal kin tʼajaʼ. An corona virus yab in tʼokʼbay abal a Jehová tu ku pidhaʼ jawaʼ i yéjenchal, u tʼajaʼ ti kwéntaj abal an epchalchik chubax u kʼanidháx ani abal axéʼ pel an belomtaláb axi chubax».

 Jun i ókʼnom axi in bij Wyson in uluw: «U lej kʼakʼnanchal an tʼojnál axi putudh ani tsalpadh kom tu lej tʼajál ti kwéntaj, bélits abal kʼwajat an coronavirus. Wawáʼ u lej tsʼejwantal ani juʼtáj tu kʼwajíl yab lej waʼats i tumín. Kom i éjtow ku kʼwajiy ban Pulik tamkuntaláb, i éjtow ki kanchij in alwáʼ ani u kʼwajat más kulbél».

 An Comité de Coordinadores ani de Enseñanza in uluw abal junílekʼij ban tamub 2021, neʼets ka eyendháj an radio ani an televisión abal ka watʼbáj an púlik tamkuntaláb al talchik i kwenchal. ¿Jantʼiniʼ tu jalbiyáb abal ka watʼbaj an púlik tamkuntaláb ban radio ani ban televisión? U jalbiyáb kʼal an tumín axi tatáʼ a binál ti donate.pr418.com. Kʼakʼnámal kʼal patal jawaʼ a binál.