A Jesús in uchaʼ in aykolchik: «Neʼets tin ólnanchichik u bij [...] tin puwél an tsabál» (Hechos 1:8). An ólchixchik kʼal a Jehová, in tsápnanchal kin tʼajaʼ axéʼ xi tʼojlab kʼal yan i kulbetaláb. Bélits antsanáʼ, yab i ejtowámal ki ólnaʼ an alwaʼ kaw al talchik i kwénchal axi lej ówdhaʼ ani waʼats yan i atikláb. Ani al talchik i kwénchal yab waʼats yan i ólchix (Mateo 9:37, 38). ¿Jantʼoj kʼwajat i tʼajál abal ki tʼílmay más i atikláb?

 Abal ki putuw axéʼ xi uchbilab, an Comité de Servicio kʼal an Kwenél i ókʼnom in kʼál an ólchixchik kʼal a Jehová in abal i misioneros juʼtáj ti waʼats más i yejenchixtaláb. Xowéʼ ta kʼicháj waʼats 3.090 i misioneros axi kʼwajat ti tólmix tin puwél an tsabál. a Axéʼ xi epchalchik tʼojojyámej al i escuelas, ejtíl, an Escuela para Evangelizadores del Reino. Axéʼchik xi epchal in jilámal in kʼimaʼ ani kʼalnek al kʼeʼat i kwénchal axi yab in exlál. Kʼal an tʼojláb axi in tʼajálchik in ejtowámal kin tólmiy yan i atiklábchik ani jayej axi itéj in tujuwámal kin ólnaʼ an alwaʼ kaw.

 Ban sucursal, an Sección de Ministros en el Campo ani an Comité de Servicio u tʼojnalchik junax kʼal an Comité de Sucursal abal kin exlaʼ jantʼoj in yéjenchal an misioneros. U pidhnál juʼtáj ka chudhey, abal kin béletnaʼ in iniktal ani weʼ i tumin abal kʼal jawaʼ kin yéjenchij. Ban tamub de servicio ti 2020, an ólchixchik kʼal a Jehová in eyendhámal 27 millones i dólares abal kin tólmiy an misioneros. Kʼal axéʼ xi tolmixtaláb, an misioneros in ejtowal kin éyendhaʼ patal an tsapláb ani an kʼij abal kin tólmiy an atiklábchik axi ban olnomtaláb ani an epchalchik.

 ¿Jantʼiniʼ u tólmix axéʼchik xi misioneros ban olnomtaláb? A Frank Madsen, u tólmix ban Comité de Sucursal ti Malaui, in ulal: «Kʼal an tsapláb ani an kanataláb axi in kwaʼal an misioneros in tolmiyámal abal an epchalchik axi ban tamkuntaláb ka olnomáts al juʼtáj ti lej ówdhaʼ o lej kʼibat kit ulits o juʼtáj tu kawnáb kʼeʼat i kawintaláb. Tam in tsápnanchalchik kin exóbnaʼ an kawintaláb ani in exlaʼ an atiklábchik, in púnuwal jun i alwaʼ tʼiplab. Jayej, in tólmiyalchik an tsakam abal kin tʼójonchij más a Jehová. I lej kʼakʼnanchal a Jehová kom in abal i misioneros».

 Kʼeʼat i epchal axi u tólmix ban Comité de Sucursal in ulal: «Jawaʼ in tʼajál an misioneros, in tejwamedhál abal an ólchixchik kʼal a Jehová kʼwajat junkudh ani in olnál an alwaʼ kaw tin puwél an tsabál. Ani jitaʼchik yab pel i ólchix in jikʼpál kom in tsuʼtal abal chubax u kʼanidhax, bélits abal pil tu walkidh ani juʼtáj tu tal. An Biblia tu exóbchal abal kwaʼal ku kʼanidháxin».

 ¿Ani an misioneros jantʼiniʼ tin tólmiyal an epchalchik axi ban tamkuntaláb? A Paulo, u kʼwajíl ti Timor Oriental, in lej kʼakʼnál an tʼojlab axi in tʼajál an misioneros axi kʼwajat ban tamkuntaláb.Jajáʼ in ulal: «Juʼtaj tu kʼwajíl lej kʼakʼ. Bélits abal an misioneros yab in újnam an kʼakʼem in áynanchalchik ti ólnom. Etsʼey u kalelchik ti ólnom dhajuw ani in áynanchalchik ti ólnom tam tsʼejel kʼicháj, bélits abal lej kʼakʼ ani in áynanchalchik ti ólnom ma wakletal, in tolmiyámalchik yan i atikláb kin exlaʼ an chubaxtaláb. Nanáʼ jayej tin tólmiy. An kulbetaláb axi in tejwamédhal tam in tʼojonchal a Jehová, in tólmiyal an epchalchik abal kin tʼojonchij más a Jehová».

 A Ketti, pel jun i precursora ti Malaui, ani in olnál jantʼiniʼ ti tólmiyat in yanél kʼal an misioneros: «Tam ti ulitschik ban tamkuntaláb, expidh nanáʼ u tʼojonchalak a Jehová. Jajáʼchik tin lej tólmiy ani in jaʼubnaʼchik u yanél. Kʼal in tʼiplabil an misioneros u tsakámil in tʼajaʼchik ti kwéntaj, abal i atsʼál kulbél tam i tʼojonchal a Jehova. Kʼal in tʼiplabil tu tólmiy kom tsʼikʼachil xowéʼ in tʼajámal ti precursoras ani u tomkíl kʼwajat ti exóbal kʼal an Biblia».

 ¿Juʼtáj ti elál an tumín abal ki tólmiy an misioneros? Kʼal an donaciones axi tatáʼchik a binál. Ani yan i donaciones u bináb ti donate.pr418.com. Kʼakʼnámal kʼal an tolmixtaláb axi a binálchik axi a binálchik