Ban támub 2020, watʼey yan i yajchiktaláb ani jayej tujey an yawʼláts in kʼál an COVID-19. ¿Jantʼoj in tʼajaʼ an ólchixchik kʼal a Jehová abal kin tólmiy jitaʼchik in watʼaʼ i yajchiktaláb?

 Ban támub 2020, a an Kwenél i Ókʼnom in uchaʼ an Comité de Coordinadores abal kin eyendhaʼ 28 millones i dólares b abal kin tólmiy an epchalchik. Axéʼ xi tumín eyendhámej abal ka tólmiyat an epchalchik axi in yajchiknámal kʼal an COVID-19, kʼal an ciclones ani kʼal an ukʼenib axi waʼtsin ti África. Jayej eyendháj abal ka tólmiyat an epchalchik axi ti Venezuela kom yab in kwaʼal i kʼapnel, ani an epchalchik axi ti Zimbabue kom waʼtsinének i wayénib. An tumín pákuwat abal ka tsʼaʼyat i kʼapnél, i jáʼ, i toltom, i ilál ani kʼeʼat jantʼoj. Jayej eyendháj abal ka tsʼaʼyat jawaʼ u yejencháb abal ka tʼokdháj jun i atáj, abal ka tʼojojyat ani abal ka tsab tsʼejkáj. Ki tsuʼuw talchik i tʼiplab juʼtáj ti tolmiyámej talchik i epchal axi in watʼamal jun i yajchiktaláb.

 An COVID-19. Axéʼ xi yawʼláts in tʼajámal abal an epchalchik axi tin puwél an Tsabál ka yawʼláts, ka tʼeʼpin ani yab kin koʼoy i tumín. Jaxtám, bijiyámej watʼadh 800 i Comités de Socorro abal ka tólmiyat an epchalchik. Axéʼ xi comités in tʼajál ti kwéntaj patal jawaʼ in yéjenchal an epchalchik ani in ólchal an Comité de Coordinadores abal kin abaʼ an tolmixtaláb.

 Tin naktal an támub, an Comités de Socorro in tólmiy an epchalchik abal kin koʼoy i kʼapnél, i jáʼ, i ilál ani kʼeʼat jantʼoj axi in yéjenchal. Al talchik i bichow, jayej in tólmiy an ókʼnomchik abal kin tsuʼuw max an eyal kʼwajat in binál jun i tolmixtaláb axi kin ejtow kin batsʼuw an epchalchik.

 Ma an atiklábchik axi yab in kʼakʼnál a Jehová, in tʼajámal ti kwéntaj jantʼiniʼ u tolmiyáb an epchalchik. Jun i tʼiplab, a Field Simwinga, pel jun i jefe de policía axi ti Nakonde (Zambia), jajáʼ in uchaʼ an epchalchik: «I lej kʼakʼnál kom tatáʼchik dhúbatkʼij a tólmiy an atiklábchik axi in yajchiknaʼ».

 Tam ti yab lej waʼatsak i kʼapnél ti Angola. An COVID-19 in tʼajaʼ abal ti Angola, ka weʼméj an kʼapnél ani ka nújuwat lej jálbidh. An epchalchik in atsʼálak lej kʼibat kin tsʼaʼiy i kʼapnél.

 Jaxtám, konchat an sucursal axi ti Brasil abal kin abchij i kʼapnél an epchalchik axi ti Angola. An epchalchik kʼwajiy in tsuʼtal jantʼiniʼ in éjtowal kin eyendhaʼ alwaʼ an donaciones abal kin abaʼ an kʼapnél. Tam, jawaʼ in tʼajaʼ ti kwéntaj játs abal más alwaʼ kin tsʼaʼiy ti yándhaʼ. Aban yan i paquetes axi in kwaʼalak axi más u eynal, ejtíl, i arroz, i tsánakʼw ani i aceite. Abal ka tsʼejkáj i paquetes axi in além utat 20 kilos ani ka aban, jálbiyat 22 i dólares. Ma xowéʼ, abnének 33.544 i paquetes kʼal i kʼapnél. Axéʼ in além 654 i toneladas. Axéʼ in bajuw abal ka bukʼchat i kʼapnél watʼadh 50.000 i atikláb.

 ¿Jantʼiniʼ tin atsʼál an epchalchik? A Alexandre u kʼwajíl al jun i tsakam kwenchaláb lej ow axi ti Angola, jajáʼ in ulal: «U tʼajámal ti kwéntaj abal yab in kʼwajat kwetém, abal a Jehová tin lej kʼanidhál ani abal in bichówil u lej tʼeʼpinal kʼal nanáʼ». A Mariza, pel jun i epchal axi in beletnál kwetém in tsakámil, jajáʼ in ulal: «A Jehová tin atsʼanchij u olábil, u lej kʼakʼnanchal Jajáʼ ani in bichówil».

 An wayénib ti Zimbabue. Ti 2020, waʼtsin jun i wayénib ti Zimbabue axi in tʼajaʼ abal millones i atikláb kin watʼaʼ i jayil. Yan i epchal in kwaʼalak lej wéʼ i kʼapnél.

 Bíjiyat boʼ i Comités de Socorro abal ka abchat i kʼapnél an epchalchik. Tólmixin yan i epchal abal ka tsʼejkáj an paquetes kʼal i kʼapnél, abal ka kitnáj ani abal ka neʼdháj. c Ti 2020, pákuwat 691.561 i dólares abal ka tsʼaʼyat i kʼapnél ani ka tólmiyat 22.700 i atikláb.

 Tam ti ulits an tolmixtaláb, talchik i epchal yabáts in kwaʼalak i kʼapnél. An epchalchik in lej kʼakʼnanchij a Jehová ani talchik ma in tujchij ti ajat.

 Al jun i tsakam kwenchaláb, tsab i epchal axi kwetémits, kʼalej al jun i tamkuntaláb axi in tʼajaʼ i atiklábchik abal kin konoy i tolmixtaláb. Axéʼ xi tolmixtaláb yab neʼetsak kin bínaʼ an eyal (ONG). Pero tam, an atiklábchik in tujchij kin tʼilaʼ tin kwéntaj an política. An epchalchik in uluw abal yab neʼets kin batsʼuw an tolmixtaláb. Tam ti neʼtsits ka ayinchik, telan ani uchan: «Pero talbél yabchik kit chich ka konoy i kʼapnél». Tsab i semana talbél, an epchalchik ulits kʼal an tolmixtaláb ani axéʼ xi tsab i epchal pidhan i kʼapnél. Pero an tolmixtaláb axi in konoy axi kʼeʼat an atikláb oweyej abal ka ulits.

 An tolmixtaláb axi bináj ti Zimbabue, jayej in tʼajaʼ abal ka exlaʼ más tin kwéntaj a Jehová. Jun i tʼiplab játs jawaʼ in watʼaʼ a Prisca, jajáʼ u kʼwajíl al jun i tsakam kwenchaláb. Bélits abal waʼtsak i wayénib, a Prisca u kalelak ti ólnom miércoles ani viernes. U Kalelak ti ólnom bélits max pel an kʼij abal kin tʼaychij an tsabál. Kʼal in at kʼwajíl, u télnalak ani u uchnal: «¡Expidh it xeʼets ti ólnom, neʼets ka tsemdhaʼ a yanél kʼal i jayil!». Pero a Prisca u tókʼtsinalak: «A Jehová yab jaykʼiʼ in walbámal in tʼojnalil». Wéʼ i kʼicháj talbél, nenchat i kʼapnél kʼal an epchalchik. In at kʼwajíl in lej jikʼpaʼ ani in uluwchik: «A Dios yab jaykʼiʼ ti walbámal, tu ku tʼilchij más tin kwéntaj Jajáʼ». Xowéʼ, buk in at kʼwajíl in atsʼál an tamkuntaláb ban radio.

 Kom u kʼwajat tin taltal an xeʼtsintaláb, neʼets ki tsuʼuyej yan i yajchiktaláb (Mateo 24:3, 7). I lej kʼakʼnál an donaciones axi a binálchik ti donate.pr418.com. Neʼets ka lej eyan abal ka tólmiyat an epchalchik axi kʼwajat in watʼál jun i yajchiktaláb.