«Walam yan kʼal axi in ajiyal axeʼ xi publicación in exlal jitaʼ axi jokʼtsej», jats jawaʼ in uluw an revista The Watch Tower (La Torre del Vigía) axi ti 1 a junio ti 1912. Axéʼ xi revista jayej in uluw abal waʼatsak i publicaciones abal an atiklábchik axi yab u tsuʼux. Jayej in uluw: «Axéʼ xi publicaciones in kwaʼal i puntitos axi in tólmiyal an atiklábchik axi jokʼtsej abal kin ajiy kʼal in kʼubak. An atiklábchik axi jokʼtsej u lej kulbél kom in exlál abal neʼets ka waʼtsin jun a kʼicháj tam neʼets kin batsʼuwchik yan i lablixtaláb».

 Ma nixéʼ xi támub waʼatsakits i publicaciones abal an atiklábchik axi jokʼtsej pero yab tsʼejkamejak jun i programa abal ka kaldháj al más i kawintaláb. Xowéʼ i aynanchal ki kaldhaʼ i publicaciones abal an atiklábchik axi jokʼtsej pero al watʼadh cincuenta i kawintaláb. ¿Jantʼiniʼ tu tsʼejkáb axéʼ?

 Okʼox kwaʼal ka dhuchan an publicación ti braille kʼal i puntitos axi u eyendháb ti braille. A Michael Millen axi u tólmix ban servicio de procesamiento de texto ti Patterson (Nueva York) in ulal: «Ti biyál i tsʼaʼiyalak i programas abal ki dhuchaʼ an publicaciones ti braille pero yab u eynalak al yan i kawintaláb. Xowéʼ i eyendhál an programa Watchtower Translation System, axéʼ tu tólmiyal abal ki dhuchaʼ an publicaciones al yan i kawintaláb. Yab waʼats kʼeʼat i programa ejtíl axeʼ».

 An publicaciones yab expidh in olnál an olchixtaláb, in wilkʼál an imágenes axi u tejwamél. Jun i tʼiplab, antsanáʼ tu wilkʼáb an dibujo axi u tejwamél ban portada kʼal an libro Kit kʼwajiy kulbél abal etsʼey: Jun i inik u belal al jun i bel axi lej alubél juʼtáj ti waʼats i wits ani tsʼen. A Jamshed axi pel i tolmix okʼnom ani precursor, jajáʼ in ulal: «Abal nanáʼ lej exbadh kin ólchin jawaʼ u tejwamél ban imágenes».

 Talbél ti dhuchnenekits an publicación ti braille u eyendháb jun i uw axi yab u mitsʼkʼanal belits max ka eyendháj yanil, tʼojojoyáb an publicación jantʼiniʼ tin tomnál ka kʼalej, ejtíl max pel jun i libreta. Talbél u abnal ti tamkuntaláb kʼal axi más an publicaciones. Tam neʼets ka abchij jantʼoj jun i atikláb axi jokʼtsej, talchik i paqueterías yab in konial ka jalbinchat. Max jun i epchal axi yab u tsuʼux in lej yejenchalits an publicaciones abal an tamkuntaláb o jun i púlik tamkuntaláb, an sucursal dhubatkʼij in abchal.

 Abal ka tʼajan patal axéʼ in yéjenchal yan i kʼij ani tumín. Tam an imprenta axi ti Wallkill (Nueva York) kin tsʼejkaʼ 50.000 i Biblia xi ti uw, al jayetsejkʼi tam kʼij u tʼajnal tsab axi ti braille. Jun i Biblia axi ti braille axi yab in kwaʼal yan i puntitos in kwaʼal 25 i volúmenes. Abal ka tsʼejkáj an Biblia axi ti braille u yejencháb 123 i kalel más abal ka tsʼejkáj an Biblia axi ti uw. a Abal ka tsʼejkanchat in otʼól jun i Biblia xi ti braille u pakuwáb 150 dolares.

 Xowéʼ ki exlaʼ jantʼoj in atsʼál an epchalchik axi u tólmix abal ka tsʼejkáj axéʼ xi publicaciones. A Nadia, axi u tólmix ban sucursal axi ti Sudáfrica in ulal: «Lej kʼibat in atsʼál an epchalchik axi yab u tsuʼux pero nanáʼ u lej belál abal u lej kʼanidhábchik kʼal a Jehová».

 ¿Jantʼoj kwaʼal kin tʼajaʼ jun i atikláb axi yab in éjtowal ti ajum braille? In tʼajál jayits i támub tsʼejkaʼ jun i folleto axi in bij Aprenda a leer braille. Axéʼ xi folleto in kwaʼal i letras ani puntitos axi ti braille. Axéʼ xi folleto kʼwajat tsʼejkadh abal an atikláb kin exóbnaʼ braille bélits max u tsuʼux o imbáj. Axéʼ xi folleto in chiʼdhál jun i tsakam regla ani jun tsakam patʼál abal ka exóbnaʼ tit dhuchum max wilkʼidh ka eyendhaʼ neʼets ka exlaʼ jantʼoj in leʼ kin uluw an puntitos ani dhubat neʼets ka exlaʼ kʼal a chʼuchub.

 ¿Jantʼiniʼ tu tolmiyáb an epchalchik axi yab u tsuʼux kʼal axéʼ xi publicación? Ki tsuʼuw jawaʼ in watʼalak a Ernest, axi u kʼwajíl ti Haití. Jajáʼ u kʼalelak ti tamkuntaláb, pero yab in kwaʼalak i publicación axi ti braille. Jaxtám in tsʼatʼalak tin katsín patal an tokʼtsixtaláb axi in leʼak kin bínaʼ ti tamkuntaláb. «Pero xowéʼ in lej kulbél, yabáts in jikʼél ku dhayaʼ u kʼubak abal ku bínaʼ jun i tokʼtsixtaláb -in ulal jajáʼ-. Xowéʼ u atsʼál más utat kʼal an epchalchik kom i kwaʼal i publicaciones axi ti braille.

 A Jan pel jun i ókʼnom axi ti Austria. Jajáʼ yab u tsuʼux alwaʼ, pero bélits antsanáʼ jajáʼ in binál an exobintaláb kʼal an revista La Atalaya ani an exobintaláb kʼal an Biblia axi ti tamkuntaláb. Jajáʼ in ulal: «Yab kʼibat u atsʼál ku exbay an publicaciones axi in tsʼejkál an ólchixchik kʼal a Jehová. Ejtíl an página in kwaʼal i número, yab kʼibat ki elaʼ an notas ani lej tajax jawaʼ u olnáb tin kwéntaj an imágenes».

 Ti Corea del Sur, u kʼwajíl jun i precursora axi in bij Seon-ok. Jajáʼ yab u otsʼox nibal u tsuʼux. Ti biyál in yejenchalak ka tólmiyat abal ka ólchin jawaʼ kʼwajatak ti uluwáb. Pero xowéʼ in éjtowalits kin ajiy jawakits tam publicaciones axi ti braille. Jajáʼ in ulal: «Ti biyál, lej kʼibatak u atsʼál ku ajiy i publicaciones axi yab in kʼal an ólchixchik kʼál a Jehová, kom junchikíl in kʼibalejak i puntitos o yab bolidh jantʼiniʼ ti dhuchadh o junchikíl kom an uw lej dhadhat. Pero an publicaciones axi in tsʼejkal an ólchixchik kʼal a Jehová yab kʼibat u atsʼál ku ajiy kom an uw yab dhubat u odhel ani an puntitos kʼwajat alwaʼ tsʼejkadh. Ti biyál expidh u ajiyalak an Biblia max waʼatsak jitaʼ ti kin tólmiy, pero xoʼ u ajiyalits nanáʼ tu kwetemtal. U lej kulbetnál kin tʼojojon abal an tamkuntaláb ani ku bínaʼ i tokʼtsixtaláb. Nanáʼ u ajiyal patal an publicaciones ti braille axi kin chanchin. ¡U lej kulbetnál!

 An publicaciones axi ti braille ani al píl i kawintaláb in chiʼdhál axéʼ xi kaw: «Axéʼ xi dhuchadh uw u bukʼuwáb tin puwél an tsabál abal kin tólmiy an atiklábchik abal kin exbay an Biblia ani u tsʼejkáb kʼal an tumín axi an atiklábchik in binál kʼal in kulbetal. Yab u nujuwáb». Kʼakʼnamal kʼal an donaciones axi tatáʼchik a binál ti donate.pr418.com, kom kʼwajat ti tsʼejkáb yan i publicaciones kʼal axi tu tolmiyáb yan i atiklábchik ani jayej an atiklábchik axi yab u tsuʼux. I lej kʼakʼnál kom i lej alwaʼ inikchik ani a binál i tolmixtaláb kʼal patal a kulbetal.